කලා ඔය සිරවී සිටි 68 ක් මුදාගනී – කැලණි ගං වතුරට මුහුණ දෙන්න හමුදාවෙන් 7400 ක්
කලා ඔය ආශ්‍රිතව බස් රථක් ජලපහරට හසුව සිටිය දී වහලයක් මත සිරවී සිටි පුද්ගලයින් 68 දෙනකු ශ්‍රී ලංකා නාවික හමුදාව ඊයේ රාත්‍රියේ සිට සිදුකළ මෙහෙයුමකින් බේරා ගැනීමට සමත් වුණා.
එම ස්ථානයට බේරා ගැනීමේ කණ්ඩායම්වලට ලඟාවීම මහත් අසීරු වූ අතර ඊයේ රාත්‍රී නාවික හමුදාව මෙම පිරිස මුදාගැනිමේ කටයුතු ජනාධිපති අනුර කුමාර දිසානායක මහතා පෞද්ගලිකවම නිරීක්ෂණය කළා.
යුද හමුදාපති ලුතිනන් ජෙනරාල ලසන්ත රොද්‍රිගු මහතා පැවසුවේ අද උදෑසන මේ පිරිස මුදාගෙන රෝහල් කරා යොමුකළ බවයි.
මේ අතර කැලණි ගඟ ආශ්‍රිතව ඇතිවිය හැකි ආපදා තත්ත්වය වෙනුවෙන් යුද හමුදා භට පිරිස් 7900 ක් ස්ථානගතකර ඇති බව යුද හමුදාපති වරයා පැවසුවා.
යුද හමුදාපතිවරයා සඳහන් කළේ ඇතිවිය හැකි ඕනෑම ආපදා තත්ත්වයකට මුහුණ දීම සඳහා බස්නාහිර පළාත තුල පමණක් රාජකාරි සඳහා යුනිකෝන් රථ 18 ක්, බීටී ආර් රථ 26 ක්, බෝට්ටු 30 ක් සූදානම් කර ඇති බවයි.
මේ වන විට ආපදාවට පත් පිරිස් මුදාගැනීමේ කටයුති සඳහා යුද හමුදාවේ භටපිරිස් 22 400 ක් පමණ යොදවා ඇති අතර ඔවුන් පුද්ගලයින් 1551 ක් දෙනකු මුදාගෙන තිබෙනවා.
මීට අමතරව යුද හමුදාවේ භට පිරිස් අවහිර වූ මාර්ග සහ ගං ඉවුරු සකස් කිරීමේ කටයුතු සඳහා යොමු කර තිබෙනවා.
