කලාඔය පාලම මත සැඩ පහරට හසුවූ බස් රථයේ සිටි පිරිසෙන් මේවන විට 25 කට වැඩි පිරිසක් මුදාගනී
අනුරාධපුර – පුත්තලම මාර්ගයේ කලාඔය පාලම මත සැඩ පහරට හසුවූ බස් රථයේ සිටි පිරිසෙන් මේ වන විට 25 කට වැඩි පිරිසක් මුදා ගෙන තිබෙනවා.
එම පිරිස අසල නිවසක වහලයක් මත රැඳීසිටින අතර ඔවුන් එම ස්ථානයෙන් මුදාගැනීමේ නවතම මෙහෙයුම ජනාධිපතිවරයා සජීවීව නිරීක්ෂණය කළා.
පිරිස මුදාගැනීම සඳහා මෙම මෙහෙයුම ආරම්භ කළේ නාවික හමුදාවයි.
පැවති සැඩ පහර හේතුවෙන් ඊයේ (28) රාත්‍රියේ ඒ සඳහා කළ උත්සාහය ව්‍යාර්ථ වී තිබුණා.
දැඩි අයහපත් කාලගුණය මැද බස් රථයෙන් මුදාගත් පිරිස මෙලෙස අසල තිබෙන නිවසක වහලයක් මත රැඳී සිටිනවා.
නාවික හමුදාවේ ක්‍රියාකාරි යාත්‍රා බලගනය, ශ්‍රී ලංකා නාවික කිමිදුම් අංශය, විශේෂ යාත්‍රා බලගනය ආදී අංශවලින් සැදුම්ලත් අතිරේක භට පිරිස් මෙම මුදවා ගැනීම් සඳහා එක්වී ඇති බව සඳහන්.
අද උදැසන(29) නිකවැරටිය ප්‍රදේශයේ අවතැන්ව සිටි ස්වාමීන් වහන්සේ නමක් ඇතුළු පුද්ගලයින් 04 දෙනෙකු පාලවිය කඳවුරෙන් පිටත් වූ Bell–412 හෙලිකොප්ටර් යානය මගින් මුදා ගෙන ආරක්ෂිත ස්ථාන වෙත යොමු කර තිබෙනවා.
රත්මලාන කඳවුරෙන් පිටත් වූ Bell–412 හෙලිකොප්ටර් යානය මගින් දොම්පේ ප්‍රදේශයේ ගංවතුර හේතුවෙන් සිර වී සිටි පුද්ගලයෙකු මුදා ගෙන ආරක්ෂිත ස්ථාන කරා යොමු කළා.
ජා – ඇල ප්‍රදේශයෙන් අද පෙරවරුවේ අධිවේගී මාර්ගය ජලයෙන් යටවී පැවතුනා.
ගිරිඋල්ල නගරය දිස් වූයේ ද ජලයෙන් යටවී පැවති ආකාරයයි.
