ඩිජිටල් ආර්ථික අමාත්‍යාංශයේ 2025 වසරේ ප්‍රගති සමාලෝචන සාකච්ජාව ජනපති ප්‍රධානත්වයෙන්
2025 වසරට අදාළව ඩිජිටල් ආර්ථික අමාත්‍යාංශයේ ප්‍රගතිය සමාලෝචනය කිරීම සඳහා වූ සාකච්ජාවක් ජනාධිපති, ඩිජිටල් ආර්ථික අමාත්‍ය අනුර කුමාර දිසානායක මහතාගේ ප්‍රධානත්වයෙන්, ඊයේ (11) ඩිජිටල් ආර්ථික අමාත්‍යාංශ පරිශ්‍රයේදී පැවැත් වුණා.
ජනාධිපති කාර්යාලය පැවසුවේ ඩිජිටල් ආර්ථික අමාත්‍යාංශය යටතේ ක්‍රියාත්මක වන ශ්‍රී ලංකා විදුලි සංදේශ නියාමන කොමිෂන් සභාව (TRCSL), පුද්ගලයන් ලියාපදිංචි කිරීමේ දෙපාර්තමේන්තුව (DRP) සහ GovTech (Pvt) Ltd යන ආයතනවලට අයත් ඩිජිටල් සංවර්ධන ව්‍යාපෘතිවල ඉදිරි වැඩපිළිවෙළ පරීක්ෂා කිරීම, ක්‍රියාත්මකවීම ප්‍රමාද වීමට හේතු වන බාධක හඳුනා ගැනීම මෙන්ම, ඒ වෙනුවෙන් අවශ්‍ය ප්‍රතිපත්තිමය සහ පරිපාලන තීරණ ගැනීම අරමුණු කර ගනිමින් මෙම සාකච්ඡාවේ අරමුණ බවයි.
2026 වසර සඳහා යෝජිත අයවැය ප්‍රකාශයේ කේන්ද්‍රීය සාධකය වූ ඩිජිටල් ආර්ථිකය සම්බන්ධයෙන් කෙරෙන රජයේ ආයෝජන සඳහා ශක්තිමත් පදනමක් ස්ථාපිත කිරීම අවශ්‍ය බව ජනාධිපතිවරයා මෙම සාකච්ඡාවේදී අවධාරණය කර තිබෙනවා.
තවද, දිවයින පුරා පිහිටි දුරකථන කුලුනු සහ අනෙකුත් ඩිජිටල් යටිතල පහසුකම් සංවර්ධනය සඳහා පෞද්ගලික ආයෝජකයින් සහ වෙළඳපොළ හසුරුවන්නන්හට වඩාත් හිතකර පරිසරයක් ගොඩනැගීම වෙනුවෙන් ගත යුතු පියවර පිළිබඳවද මෙහිදී සාකච්ඡා කළ බව ජනාධිපති කාර්යාලය සඳහන් කළා.
“ගමට සන්නිවේදනය” ව්‍යාපෘතිය වේගවත් කිරීමේ අවශ්‍යතාවද අවධාරණය කරමින්, එම ව්‍යාපෘතිය යටතේ වසර තුනක කාලයක් තුළ කුලුනු 500 ක් ස්ථාපිත කිරීමේ ඉලක්කය පිළිබඳවද මෙහිදී අවධානය යොමු කර තිබෙනවා.
එසේම, ජාතික හැඳුනුම්පත් නිකුත් කිරීමේ වැඩපිළිවෙළෙහි මේ වනවිට පවතින ප්‍රමාදය කඩිනම්ව යළි යථාතත්ත්වයට පත්කිරීමට අවශ්‍ය කටයුතු කරන ලෙස පුද්ගලයන් ලියාපදිංචි කිරීමේ දෙපාර්තමේන්තුවේ නිලධාරීන්හට ජනපතිවරයා උපදෙස් ලබා දුන් බව ජනාධිපති කාර්යාලය සඳහන් කළා.
තවද, ශ්‍රී ලංකා අනන්‍ය ඩිජිටල් හැඳුනුම්පත් (SLUDI) ව්‍යාපෘතිය වේගවත් කිරීම, අමාත්‍යාංශයේ පරිපාලන සහ මෙහෙයුම් ව්‍යුහ ශක්තිමත් කිරීම, නව ඩිජිටල් ආර්ථික අධිකාරිය පිහිටු වීම සහ ශක්තිමත් ඩිජිටල් ආර්ථිකයක් ගොඩනැගීමට අවශ්‍ය මානව සම්පත ගොඩනැඟීම පිළිබඳවද මෙහිදී අවධානය යොමු වී තිබෙනවා.
ඩිජිටල් ආර්ථික නියෝජ්‍ය අමාත්‍ය එරංග වීරරත්න, ඩිජිටල් ආර්ථික අමාත්‍යාංශයේ ලේකම් (වැඩබලන) වරුණ ශ්‍රී ධනපාල, ඩිජිටල් ආර්ථිකය පිළිබඳ ප්‍රධාන ජනාධිපති උපදේශක ආචාර්ය හාන්ස් විජයසූරිය යන මහත්වරුද, අදාළ ආයතන ප්‍රධානීන් ඇතුළු ජ්‍යෙෂ්ඨ නිලධාරීන් පිරිසක්ද මීටෙක්ව සිටියා.
