අපරාධයකින් උපයා ගෙන විදේශීය රටවල පවතින වත්කම් ආපසු ලබා ගැනීම සඳහා ජාත්යන්තර සහාය
දුෂණයෙන් උපයාගත් බවට සැළකෙන විදේශිය රටවල පවතින වත්කම් නැවත පවරා ගැනීම සඳහා වු ක්රියාදාමයකට අවශ්ය තාක්ෂණික සහ විශේෂඥ සහයෝගය ලබාදීමට ලෝක බැංකුව සහ එක්සත් ජාතීන්ගේ මත්ද්රව්ය සහ අපරාධ කාර්යාලය යටතේ පවතින ස්ටාර් ආයතනයේ උසස් නිලධාරීන් (StAR inititive) එකඟත්වය පළ කර ඇතැයි අධිකරණ සහ ජාතික ඒකාබද්ධතා අමාත්යාංශය පවසනවා.
මේ කරුණු අනාවරණය වූයේ ඒ පිළිබඳව විශේෂ සාකච්ඡාවක් අධිකරණ සහ ජාතික ඒකාබද්ධතා අමාත්ය, නීතිඥ, හර්ෂණ නානායක්කාර මහතාගේ ප්රධානත්වයෙන් ඊයේ (02) පස්වරුවේ අධිකරණ සහ ජාතික ඒකාබද්ධතා අමාත්යාංශයේදීයි.
ඒ අනුව අපරාධයකින් උත්පාදිත දේ නැවත පවරා ගැනීමේ පනත යටතේ දුෂණයෙන් උපයාගත් බවට සැළකෙන විදේශිය රටවල පවතින වත්කම් නැවත පවරා ගැනීම සඳහා කටයුතු කිරීම වෙනුවෙන් අවශ්ය තාක්ෂණික සහ විශේෂඥ සහයෝගය ලබා ගැනීමට නියමිතව තිබෙනවා.
අමාත්යාංශය පවසන්නේ අපරාධයකින් උත්පාදිත දේ නැවත පවරා ගැනීමේ ක්රියාදාමයට අල්ලස් හෝ දුෂණ විමර්ශන කොමිෂන් සභාව, අධිකරණ සහ ජාතික ඒකාබද්ධතා අමාත්යාංශය, අපරාධයකින් උත්පාදිත දේ නැවත පවරා ගැනීමේ පොලිස් කොට්ඨාශය, නීතිපති දෙපාර්තමේන්තුව, පොලිස් දෙපාර්තමේන්තුව සහ මුල්ය බුද්ධි අංශය යන ආයතනවලට අවශ්ය සහාය ලබාදීමට ලෝක බැංකුව සහ එක්සත් ජාතීන්ගේ මත්ද්රව්ය සහ අපරාධ කාර්යාලය යටතේ පවතින ස්ටාර් ආයතනයේ ( StAR inititive) එකඟතාවය පළ කර ඇති බවයි.
මෙම ක්රියාවලිය විධිමත්ව සිදුකිරීම සඳහා කාර්ය සාධක බලකායක් පත් කිරීම පිළිබඳවද මෙහිදී සාකච්ඡා වු අතර, දුෂණ විරෝධී පනත, අපරාධයකින් උත්පාදිත දේ නැවත පවරා ගැනීමේ පනත සහ වත්කම් හා බැරකම් පනත සකස් කිරීම වෙනුවෙන් ද ඔවුන්ගේ සහාය ලබා දී තිබෙනවා.
ලෝක බැංකුව සහ එක්සත් ජාතීන්ගේ මත්ද්රව්ය සහ අපරාධ කාර්යාලය යටතේ ස්ටාර් ක්රියාදාමය සකස් කර ඇත්තේ දුෂණයෙන් උපයාගත් වත්කම් ආපසු ලබාගැනීම සඳහා ජාත්යන්තර වශයෙන් අවශ්ය තාක්ෂණික සහ විශේෂඥ සහාය ලබාදීමට එක්සත් ජාතීන්ගේ අන්තර් ජාතික දුෂණ විරෝධී සම්මුතිය අනුවයි.
ස්ටාර් ආයතනයේ (StAR Initiative) ජ්යෙෂ්ඨ ආර්ථික විශේෂඥ, Laura Pop, අධිකරණ සහ ජාතික ඒකාබද්ධතා අමාත්යාංශයේ ලේකම්, ජනාධිපති නීතිඥ, අයේෂා ජිනසේන මෙනෙවිය, අල්ලස් හෝ දුෂණ විමර්ශන කොමිෂන් සභාවේ අධ්යක්ෂ ජනරාල්, මහාධිකරණ විනිසුරු රංග දිසානායක, ලෝක බැංකුවේ මෙරට රාජ්ය පාලනය පිළිබඳ විශේෂඥ Till Hartmann, ස්ටාර් ආයතනයේ උපදේශක Dmytro Kotlyar, ,ස්ටාර් ආයතනයේ විශේෂඥ Karen Greenaway, යන මහත්ම මහත්මීන් සහ අධිකරණ සහ ජාතික ඒකාබද්ධතා අමාත්යාංශයේ උසස් නිලධාරීන් මෙම සාකච්ඡාවට එක්ව සිටියා.