ආබාධිත සිසුවකුට තාක්ෂණ උපාධිය හැදෑරීමට විශ්වවිද්‍යාල ප්‍රතිපාදන කොමිසම අවස්ථාව නොදීම ගැන පෙත්සමක කරුණු තහවුරු කරන්න ශ්‍රේෂ්ඨාධිකරණයෙන් නියෝගයක්
ආබාධිතභාවයෙන් පෙළෙන හෙයින් තාක්ෂණ උපාධිය හැදෑරීමට අවස්ථාව ලබාදිය නොහැකි බව බවට විශ්වවිද්‍යාල ප්‍රතිපාදන කොමිසම ගෙන ඇති තීරණය තුළින් සිය මූලික මිනිස් අයිතිවාසිකම් උල්ලංඝණය වී ඇති බවට තීන්දුවක් ලබා දෙන ලෙස ඉල්ලා විශ්වවිද්‍යාල ප්‍රවේශය හිමි ශිෂ්‍යයෙකු විසින් ගොනු කරන ලද පෙත්සමක් කරුණු තහවුරු කිරීම සඳහා ලබන පෙබරවාරි මස 24 වැනිදා කැඳවන ලෙස ශ්‍රේෂ්ඨාධිකරණය නියෝග කළා.
මෙම පෙත්සම අගවිනිසුරු ප්‍රීති පද්මන් සූරසේන සහ ශිරාන් ගුණරත්න යන විනිසුරුවරුන්ගෙන් සමන්විත ශ්‍රේෂ්ඨාධිකරණ විනිසුරු මඩුල්ල ඉදිරියේ අද (17) කැඳවනු ලැබුවා.
මෙම පෙත්සම ඉදිරිපත් කර තිබුණේ බණ්ඩාරවෙල ප්‍රදේශයේ පදිංචි මනුෂ්‍ය අත්තනායක නමැති ශිෂ්‍යයෙක්.
පෙත්සම්කරු කියා සිටින්නේ, තමන් බණ්ඩාරවල ධර්මපාල විද්‍යාලයේ තාක්ෂණ විෂය ධාරාවෙන් අ.පො.ස. උසස් පෙළ විභාගයට පෙනී සිට විශ්වවිද්‍යාල ප්‍රවේශය සඳහා සුදුසුකම් ලැබූ ආබාධිත ශිෂ්‍යයෙකු බව යි.
2024/2025 වර්ෂය සඳහා තාක්ෂණ උපාධිය හැදෑරීමට තමා අයැදුම්පතක් ඉදිරිපත් කළ ද ආබාධිත ශිෂ්‍යයන්ගේ කාණ්ඩය යටතේ තාක්ෂණ උපාධිය හැදෑරීමට ප්‍රතිපාදන නොමැති බව සඳහන් කරමින් එම ඉල්ලීම විශ්වවිද්‍යාල ප්‍රතිපාදන කොමිසම ප්‍රතික්ෂේප කළ බවට ඔහු සිය පෙත්සමින් චෝදනා කර තිබෙනවා.
විශ්වවිද්‍යාල ප්‍රතිපාදන කොමිසමේ මෙම තීරණය තුළින් සිය මූලික මිනිස් අයිතිවාසිකම් උල්ලංඝනය වී ඇති බවට තීන්දුවක් ලබා දෙන ලෙස පෙත්සම්කරු ශ්‍රේෂ්ඨාධිකරණයෙන් ඉල්ලා සිටීයා.
ඊට අමතරව, තාක්ෂණ උපාධිය හැදෑරීමට තමන්ට අවස්ථාව ලබා දෙන ලෙස නියෝග කරන ලෙස ඉල්ලා සිටින පෙත්සම්කරු ආබාධිත ශිෂ්‍යයන්ට අධ්‍යයන කටයුතු සිදුකිරීම සඳහා “ප්‍රතිපත්තියක්” සකස් කරන ලෙස විශ්වවිද්‍යාල ප්‍රතිපාදන කොමිසම වෙත නියෝගයක් නිකුත් කරන ලෙසත් පෙත්සම්කරු වැඩිදුරටත් අධිකරණයෙන් ඉල්ලා සිටීනවා.