ඉන්දීය අගමැතිගේ ශ්‍රී ලංකා සංචාරය නිසා විශේෂ ආරක්ෂක සහ රථවාහන සැලැස්මක්
ඉන්දීය අගමැති නරේන්ද්‍ර මෝදිගේ ශ්‍රී ලංකා සංචාරය හේතුවෙන් කොළඹ සහ ප්‍රදේශ කිහිපයක විශේෂ රථවාහන සැලැස්මක් සහ විශේෂ ආරක්ෂක සැලැස්මක් ක්‍රියාත්මක බව පොලිසිය පවසනවා.
ඉන්දීය අග්‍රාමාත්‍යවරයා අනිද්දා (04) මෙරටට පැමිණෙන අතර එදින සිට එම විශේෂ රථවාහන සැලැස්ම සහ විශේෂ ආරක්ෂක සැලැස්ම ක්‍රියාත්මක බවයි පොලිසිය සඳහන් කළේ.
එදින සවස 06.00 සිට රාත්‍රී 10.00 දක්වා කොළඹ කටුනායක අධිවේගී මාර්ගය හා බේස්ලයින් මාර්ගය අවස්ථා කිහිපයකදී වසා තැබෙනු ඇති.
එමෙන්ම අදාළ කාලසීමාව තුළ කටුනායක ගුවන් තොටුපළ වෙත පැමිණෙන තැනැත්තන් මේ පිළිබඳව අවධානය යොමු කරමින් තමන්ගේ සංචාරය සැලසුම් කරගන්නා ලෙසයි පොලිසිය දැනුම්දෙන්නේ.
ලබන 5 වන දින ගාලු මුවදොර, නිදහස් චතුරශ්‍රය සහ බත්තරමුල්ල අපේගම පරිශ්‍රය යන ප්‍රදේශයන්හි මාර්ග අවස්ථා කිහිපයකදී වසා තැබීමට ද නියමිතයි.
ඒ අනුව අදාළ කාලසීමාව තුළ සිදුවන රථවාහන තදබදය අවම කර ගැනීම සඳහා විකල්ප මාර්ග භාවිත කරන ලෙසයි පොලිසිය දැනුම්දෙන්නේ.