එකම අංකයෙන් ධාවනය කළ තුන්වන රථයත් නිලධාරීන් භාරයට
නීති වීරෝධීව මෙරටට ආනයනය කළ ජීප් රථයක් ව්‍යාජ අංක සහිතව තලංගම ප්‍රදේශයේ ධාවනය වන බවට ලද තොරතුරකට අනුව ක්‍රියාත්මක වූ වලාන මධ්‍යම දූෂණ මර්දන ප්‍රහාරක බළකාය විසින් එම රථය අද (12) සිය භාරයට ගෙන තිබෙනවා.
එම ප්‍රහාරක බළකායේ බුද්ධි නිලධාරින් දෙදෙනෙකු ආවේක්ෂණ රාජකාරි කටයුතු සඳහා යොදවා පැලවත්ත ජපන් මිත්‍රත්ව පාරේ පාර්ලිමේන්තු පාර හංදිය අසලදී අදාළ ජීප් රථයත් එය පැදවූ පුද්ගලයාත් අත්අඩංගුවට ගෙන ඇති බව සඳහන්.
මිට්සුබිෂි මොන්ටෙරෝ වර්ගයේ රථයක් මෙලෙස නිලධාරීන් භාරයට ගෙන ඇති අතර අත්අඩංගුවට ගත් රථයේ රියදුරු 52 හැවිරිදි පුද්ගලයෙකු වනවා.
ඔහු මහර ආසනයේ ප්‍රබල දේශපාලන පක්ෂයක සංවිධායකයෙකු ලෙස කටයුතු කළ අයෙකු බවටත්, හිටපු ජනාධිපතිවරයෙකුගේ සම්බන්ධීකරණ ලේකම්වරයෙකු වශයෙන්ද එම පුද්ගලයා කටයුතු කර ඇති බවටයි තොරතුරු අනාවරණය වී ඇත්තේ.
පොලීසිය භාරයට ගත් මෙම ජීප් රථය කෝටි 04කට අධික වටිනාකමකින් යුතු වන අතර එය ඉතා සුක්ෂම ලෙස කන්ටේනරයක් තුළ බහා මෙරටට ආනයනය කර ඇති බවට තොරතුරු හෙළි වී තිබෙනවා.
නීතිවිරෝධීව මෙරටට ගෙන්වනු ලබන වාහන, මෝටර් රථ ප්‍රවාහන දෙපාර්තමේන්තුවේ පිරිසක් විසින් කූඨ ලේඛන සකස් කර පරිගණක දත්ත පවා වෙනස් කරමින් කටයුතු සිදුකරන බවට මෙම අත්අඩංගුවට ගැනීම හරහා පොලීසියට කරුණු වාර්තා වී ඇති බව සඳහන්.
නිලධාරීන් භාරයට මෙම රථයේ ලියාපදිංචි අංකයෙන්ම යුතු විදුලි කාර් රථයක් 2018 වර්ෂයේදී වලාන මධ්‍යම දුෂණ මර්දන ප්‍රහාරක බළකාය මගින් අත්අඩංගුවට ගෙන ඇති අතර එම අංකයෙන් යුත් මිට්සුබිෂි මොන්ටෙරෝ වර්ගයේ ජීප් රථයක් 2019 වර්ෂයේදී ද එම ප්‍රහාරක බළකාය විසින්ම සිය භාරයට ගෙන තිබෙනවා.
ඒ අනුව මෙවරද වලාන මධ්‍යම දුෂණ මර්දන ප්‍රහාරක බළකාය විසින්ම මෙම සුඛෝපභෝගි ජීප් රථය අත්අඩංගුවට ගැනීම විශේෂත්වයක්.