කෘෂි හා කර්මාන්ත අංශ ඒකාබද්ධ කර ගනිමින් සමුපාකාර බැංකු පද්ධතියක් පිහිටුවීමට කොරියාවේ සහය
කෘෂි හා කර්මාන්ත අංශ ඒකාබද්ධ කර ගනිමින් සමුපාකාර බැංකු පද්ධතියක් පිහිටුවීමට කොරියාවේ සහය ලබා දෙන බව කොරියානු ජනරජයේ තානාපතිනි Miyon LEE මහත්මිය පවසනවා
ඇය මේ බව කියා සිටියේ කර්මාන්ත සහ ව්‍යවසායකත්ව සංවර්ධන අමාත්‍යාංශයේ දී කොරියානු ජනරජය හා ශ්‍රී ලංකාව අතර ආයෝජන අවස්ථා පුළුල් කර ගැනීම පිළිබඳව එරට තානාපතිනි Miyon LEE මහත්මිය සමඟ පැවති විශේෂ සාකච්ඡාවකදියි
එමෙන්ම සිය රටේ ක්‍රියාත්මක කරන සමුපාකාර බැංකු පද්ධතිය කොරියානු ආර්ථිකය වර්තමානයේ පවතින ඉහළ මට්ටමට ළඟා වීමට සුවිශේෂි සහයක් ලබාදුන් බවත් ශ්‍රී ලංකාවේද එවැනි බැංකු පද්ධතියක් ස්ථාපිත කිරීම සඳහා අවශ්‍ය සහාය ලබාදෙන බවත් ඇය එහිදී කියා සිටියා
මෙහිදී සුප්‍රසිද්ධ කොරියානු සන්නාම වලට ලංකාවේ ආයෝජනය සඳහා ආරාධනා කළ අතර එම ආයෝජකයන් සඳහා අවශ්‍ය සියලු පහසුකම් කර්මාන්ත අමාත්‍යාංශය ප්‍රමුඛ රජය විසින් ලබාදෙන බවට සහතික වී තිබෙනවා
මීට අමතරව කොරියානු ජනරජයේ ඉලෙක්ට්‍රොනික උපාංග හා තොරතුරු තාක්ෂණික ආයෝජකයින් ශ්‍රී ලංකාවේ ආයෝජනය සඳහා රැගෙන ඒමට කැමැත්ත පළ කළ ඇය එම ක්ෂේත්‍රවල වල නිෂ්පාදන ලංකාව තුළ සිදුකර එම නිෂ්පාදන දකුණු ආසියානු වෙළඳපලට යැවීමේ අවස්ථාව පිළිබඳවද අවධානය යොමු කර තිබෙනවා