ගාසා තීරයේ මියගිය සංඛ්‍යාව 10,000 ඉක්මවයි
පසුගිය මාසයේ ඊශ්‍රායලය විසින් පලස්තීන භූමියට බෝම්බ හෙලීමට පටන් ගත් දා සිට එහි පුද්ගලයන් 10,000 කට වැඩි පිරිසක් මියගොස් ඇති බව ගාසා තීරයේ හමාස් පාලනය යටතේ පවතින සෞඛ්‍ය අමාත්‍යාංශය පවසනවා .
මියගිය අයගෙන් 4,000 කට වැඩි පිරිසක් ළමුන් බවයි අමාත්‍යාංශය පවසන්නේ .
ඊශ්‍රායලය ගාසා තීරයට බෝම්බ ප්‍රහාර එල්ල කිරීම ආරම්භ කළේ හමාස් සංවිධානය විසින් පුද්ගලයන් 1,400ක් ඝාතනය කර තවත් 200කට අධික පිරිසක් ඔක්තෝබර් 7 වැනිදා පැහැරගෙන යාමෙන් පසුවයි .
එක්සත් ජනපද ජනාධිපති ජෝ බයිඩන් සෞඛ්‍ය අමාත්‍යාංශයේ සංඛ්‍යාලේඛනවල නිරවද්‍යතාවය පිළිබඳව මීට පෙර ප්‍රශ්න කර ඇති අතර ඊශ්‍රායල ආරක්ෂක හමුදාව (IDF) පවසන්නේ ත්‍රස්තවාදී සංවිධානයක් විසින් සපයනු ලබන ඕනෑම තොරතුරක් ප්‍රවේශමෙන් බැලිය යුතු බවයි.
හමාස් යනු එක්සත් රාජධානිය සහ එක්සත් ජනපදය ඇතුළු බොහෝ රටවල තහනම් ත්‍රස්ත සංවිධානයක් .
කෙසේ වෙතත්, කයිරෝ හි පිහිටි ලෝක සෞඛ්‍ය සංවිධානයේ (WHO) කලාපීය හදිසි අධ්‍යක්ෂ රිචඩ් බ්‍රෙනන් පසුගිය සතියේ කියා සිටියේ සෞඛ්‍ය අමාත්‍යාංශය විසින් සපයන ලද සංඛ්‍යා විශ්වාස කළ හැකි යැයි තමා විශ්වාස කරන බවයි.
ඊශ්‍රායල හමුදාව පවසන්නේ තමන් පසුගිය පැය 24 තුළ ඉලක්ක 450කට පහර දී ඇති අතර හමාස් සංවිධානය විසින් පවත්වාගෙන යනු ලබන සෞඛ්‍ය අමාත්‍යාංශය පැවසුවේ එක රැයකින් සිදුවූ සමූල ඝාතනවලින් දිවි පිදූවන් 200කට වැඩි සංඛ්‍යාවක් වාර්තා වූ බවයි.
මේ අතර ගාසා නගරයේ අල්-ෂිෆා රෝහලේ අධ්‍යක්ෂවරයා පවසා තිබෙන්නේ මිනිසුන් සිරුරු රැගෙන යාමට බූරුවන් සහ ඔවුන්ගේම මෝටර් රථ භාවිතා කරන බවත්, සන්නිවේදන විසන්ධි වී ඇති නිසා ගිලන්රථ සේවා වෙත ළඟා වීමට නොහැකි වූ බවත්ය.
මේ වනවිට සන්නිවේදනය යථා තත්ත්වයට පත් කළ නමුත් ගාසා නගරයෙන් තොරතුරු ලබා ගැනීම දුෂ්කර බව විදෙස් මාධ්‍ය වාර්තා කරනවා
සියලුම එක්සත් ජාතීන්ගේ නියෝජිතායතනවල ප්‍රධානීන් වහාම මානුෂීය සටන් විරාමයක් ඉල්ලා සිටිමින් ඒකාබද්ධ ප්‍රකාශයක් නිකුත් කර තිබෙනවා