භූමිකම්පාවෙන් තුර්කියේ සහ සිරියාවේ සිදුවූ මරණ 5,000 ඉක්මවයි (UPDATE 10)
ඊයේ (06) සිදුවූ භූමිකම්පාවෙන් තුර්කියේ සහ සිරියාවේ මරණ 5,000 කට වැඩි සංඛ්‍යාවක් මේ වන විට තහවුරු වී තිබෙන බව විදෙස් මාධ්‍ය පවසනවා.
තුර්කියේ මරණ සංඛ්‍යාව අවම වශයෙන් 3,419 දක්වා ඉහළ ගොස් ඇති බව එහි උප සභාපති Fuat Oktay පවසා තිබෙනවා .
තවත් 20,534ක් තුවාල ලබා ඇති අතර ගොඩනැගිලි 6,000කට ආසන්න ප්‍රමාණයක් කඩා වැටී ඇති බවද ඔහු සඳහන් කළ බවයි විදෙස් මාධ්‍ය පවසන්නේ.
සිරියාවේ මරණ සංඛ්‍යාව 1,602 දක්වා ඉහළ ගොස් තිබෙන බවද විදෙස් මාධ්‍ය පවසනවා.
තුර්කියේ ආපදා සහ හදිසි කළමනාකරණ අධිකාරිය සිය නවතම යාවත්කාලීනවලින් සඳහන් කර තිබෙන්නේ පුද්ගලයින් 24,400 කට අධික පිරිසක් සෙවීම් සහ ගලවා ගැනීමේ මෙහෙයුම් සඳහා සහාය වන බවයි.
දැඩි සීතල තත්ත්වය මෙම උත්සාහයන්ට බාධාවක් විය හැකි බවටද විශ්වාසය පළ කර තිබෙනවා.
එක්සත් ජාතීන්ගේ සංවිධානය, යුරෝපා සංගමය, නේටෝ සහ එක්සත් ජනපදය, එක්සත් රාජධානිය, චීනය, රුසියාව, ඉන්දියාව, ජපානය, ඉරාකය, ඉරානය, ඕස්ට්‍රේලියාව, නවසීලන්තය, ග්‍රීසිය, සහ පාකිස්ථානය වැනි රටවලින් බලපෑමට ලක් වූ කලාපයට ආධාර යැවීමට පටන් ගෙන ඇති බවද විදෙස් මාධ්‍ය පවසනවා.
ලෝක සෞඛ්‍ය සංවිධානය (WHO) ඇස්තමේන්තු කර ඇති පරිදි තුර්කිය සහ සිරියාව පුරා මිලියන 23 ක ජනතාවක් පීඩාවට පත්ව ඇති බවට ඇස්තමේන්තු කර තිබෙනවා
මෙයට ළමුන් මිලියනයකට අධික සංඛ්‍යාවක් ඇතුළත් වන බවද ලෝක සෞඛ්‍ය සංවිධානයේ ජ්‍යෙෂ්ඨ හදිසි අවස්ථා නිලධාරි Adelheid Marschang එක්සත් ජාතීන්ගේ සෞඛ්‍ය ඒජන්සියේ විධායක කමිටුවට සඳහන් කර ඇති බවද විදෙස් මාධ්‍ය පවසනවා.
මේ අතර තුර්කියේ ගලවා ගැනීමේ ප්‍රයත්නයන්ට සහාය වීම සඳහා චීනය යුවාන් මිලියන 400ක් වටිනා ආධාර වෙන් කර තිබෙනවා
මෙයට ගලවා ගැනීමේ සහ වෛද්‍ය නිලධාරීන් මෙන්ම විවිධ හදිසි සැපයුම් ද ඇතුළත් වන බවයි චීන ජාත්‍යන්තර සංවර්ධන සහයෝගිතා ඒජන්සියේ උප සභාපති ඩෙන් බොකිං පවසා තිබෙන්නේ
පාකිස්ථානයද තුර්කියේ භූමිකම්පාවෙන් විපතට පත් ප්‍රදේශවලට ගලවා ගැනීමේ පිරිස් සහ සහන භාණ්ඩ යවා ඇති බවද විදෙස් මාධ්‍ය පවසනවා
…………………………………………………………………………….
Feb 7, 2023 at 14:15
භූමිකම්පාවෙන් සිදුවූ මරණ සංඛ්‍යාව 4,800 ඉක්මවයි- 20,426කට තුවාල -මෙහෙයුම් තවදුරටත් -(UPDATE 9)
ගිනිකොණදිග තුර්කියේ- සිරියානු දේශසීමාව ආසන්නයේ පුළුල් ප්‍රදේශයකට බලපෑ භූමිකම්පාවෙන් සිදුවූ මරණ සංඛ්‍යාව 4,800 ඉක්මවා තිබෙන බව විදෙස් මාධ්‍ය පවසනවා.
තුර්කියේ, මෙම භූමිකම්පා හේතුවෙන් මියගිය පුද්ගලයින්ගේ සංඛ්‍යාව 3,381 දක්වා ඉහළ ගොස් ඇති බව එරට ආපදා අධිකාරිය සඳහන් කරනවා.
තවත් 20,426 ක් තුවාල ලබා ඇති අතර ගොඩනැගිලි 5,775 ක් කඩා වැටී ඇති බව ආපදා සහ හදිසි කළමනාකරණ අධිකාරියේ නිලධාරියෙකු පවසා තිබෙනවා.
ඒ අනුව තුර්කියේ සහ අසල්වැසි සිරියාවේ මරණ සංඛ්‍යාව 4,890 දක්වා ඉහළ ගොස් තිබෙනවා.
සෙවීම් සහ ගලවා ගැනීමේ මෙහෙයුම් සඳහා සහාය වීම සඳහා රටවල් 65 කින් පුද්ගලයින් 2,660 ක් සම්බන්ධ වී ඇති බව තුර්කියේ ආපදා සහ හදිසි අවස්ථා ඒජන්සිය සඳහන් කරනවා.
තුර්කියේ දැනටමත් 13,740 දෙනෙකු ආපදා ප්‍රදේශයේ වැඩ කිරීමට අනුයුක්ත කර ඇති අතර ඔවුන් දොඹකර 629 ක් සහ වාහන 360 ක් භාවිතා කරමින් මෙහෙයුම් සිදු කරන බවද විදෙස් මාධ්‍ය පවසනවා.
ගුවන් පාලමක් ස්ථාපිත කර ඇති අතර ආධාර බෙදා හැරීමේදී භාණ්ඩ වර්ග 146 ක් දැනටමත් බෙදා හැර ඇති බවද විදෙස් මාධ්‍ය සඳහන් කරනවා .
සමස්තයක් වශයෙන්, බ්ලැන්කට් 300,000 ක් සහ පවුලේ කූඩාරම් 41,504 ක් හීටර් සහ මුළුතැන්ගෙයි කට්ටල බෙදා දී ඇති බවයි පැවසෙන්නේ
…………………………………………………………………………………………………
Feb 7, 2023 at 13:15
තුර්කියේ මරණ සංඛාව තවත් ඉහළ යා හැකියි – ලෝක සෞඛ්‍ය සංවිධානය අනතුරු අඟවයි -ශ්‍රී ලංකාවත් සහාය පළ කිරීමට සූදානමින් -VIDEO (UPDATE 8)
තුර්කියේ සිදුවූ භූකම්පනයෙන් ගලවාගැනීම්වලට ගොදුරු වූවන් වැඩි සංඛ්‍යාවක් සොයා ගැනීමත් සමග මරණ සංඛ්‍යාව තවත් ඉහළ යා හැකි බව ලෝක සෞඛ්‍ය සංවිධානය අනතුරු අඟවා තිබෙනවා.
භූ කම්පන විද්‍යාඥයින් පවසා තිබෙන්නේ එය තුර්කියේ මෙතෙක් වාර්තා වී ඇති විශාලතම කම්පනයක් බවයි.
එමෙන්ම අවම වශයෙන් පුද්ගලයින් 2,921 දෙනෙකු තුර්කියේ පමණක් මිය ගොස් ඇති බව වාර්තා වනවා.
දිවි ගලවා ගත් අය පවසන්නේ සෙලවීම නතර වීමට මිනිත්තු දෙකක් පමණ ගත වූ බවයි.
පසුව ඇති වූ කම්පනයෙන් වැඩි බලපෑම සිදුව තිබෙන්නේ කහරමන්මාරස් පළාතේ එල්බිස්තාන් දිස්ත්‍රික්කයේයි .
දැඩි සීතල හා වර්ෂාවත් සමඟ විදුලියද විසන්ධි වී තිබෙන බවයි පැවසෙන්නේ.
ගලවා ගැනීමේ ප්‍රයත්නයන්ට විශේෂඥ කණ්ඩායම්, සුනඛ සුනඛයන් සහ උපකරණ ලබාදෙමින් ලොව පුරා රටවල් සහාය පළ කර තිබෙනවා
මෙම භූමිකම්පාව තුර්කිය පුරා ගුවන් තොටුපළ තුනකට සැලකිය යුතු හානියක් සිදු කර ඇති අතර ආධාර සැපයීම සඳහාද බාධා සිදුව ඇති බවයි පැවසෙන්නේ
තුර්කි දේශසීමාවේ කඳවුරුවල මිලියන ගණනක් සරණාගතයින් ජීවත් වන සිරියාවේ අවම වශයෙන් පුද්ගලයින් 1,400 ක් පමණ මේවන විට මිය ගොස් තිබෙනවා
එක්සත් ජාතීන්ගේ මහලේකම් ඇන්ටෝනියෝ ගුටරෙස්ද ජාත්‍යන්තර ආධාර ඉල්ලා සිටිමින් පවසා ඇත්තේ,දැනටමත් ළඟා විය නොහැකි ව්‍යසනයෙන් පීඩාවට පත් බොහෝ පවුල් සිටින බැවින් ඔවුන්ට කඩිනමින් මානුෂීය ආධාර අවශ්‍යව සිටින බවයි.
යුරෝපා සංගමය තුර්කිය වෙත සෝදිසි සහ ගලවා ගැනීමේ කණ්ඩායම් යවමින් සිටින අතර නෙදර්ලන්තයේ සහ රුමේනියාවේ ගලවා ගන්නන් දැනටමත් පැමිණෙමින් සිටින බව විදෙස් මාධ්‍ය වාර්තා කරනවා .
එක්සත් රාජධානිය පවසා ඇත්තේ විශේෂඥයින්, උපකරණ සහ ගලවා ගැනීමේ සුනඛයන් 76 දෙනෙකු යවන බවයි.
ප්‍රංශය, ජර්මනිය, ඊශ්‍රායලය සහ එක්සත් ජනපදය ද උදව් කිරීමට පොරොන්දු දී තිබෙනවා
රුසියානු ජනාධිපති ව්ලැඩිමීර් පුටින් ඉරානයට මෙන් තුර්කියට සහ සිරියාවට උදව් කිරීමට ඉදිරිපත් වී සිටින බවයි විදෙස් මාධ්‍ය පවසන්නේ
මේ අතර ශ්‍රී ලංකා ජනාධිපති රනිල් වික්‍රමසිංහ මහතාගේ උපදෙස් පරිදි විපතට පත්වූවන් මුදා ගැනීමේ මෙහෙයුම්වලට සහාය දැක්වීමට යුද හමුදා වෛද්‍ය සහ ඉංජිනේරු බලකායේ 300ක පමණ කණ්ඩායමක් සූදානමින් සිටින බවද විදේශ අමාත්‍ය අලි සබ්‍රි මහතා සඳහන් කළා
……………………………………………………………………………..
Feb 7, 2023 at 12:56
තුර්කියට සහාය දැක්වීමට රටවල් 65ක පුද්ගලයින් ආපදා ප්‍රදේශයට-VIDEO (UPDATE 07)
තුර්කි ගලවාගැනීම් මෙහෙයුම්වලට සහාය වීම සඳහා රටවල් 65කින් පුද්ගලයින් 2,600 කට වැඩි පිරිසක් ආපදා ප්‍රදේශයට යවා ඇති බව තුර්කියේ හදිසි ඒජන්සිය පවසා තිබෙනවා .
සමස්තයක් වශයෙන්, බ්ලැන්කට් 300,000 ක් සහ පවුලේ කූඩාරම් 41,00 කට වඩා ලබා දී ඇති බවද විදෙස් මාධ්‍ය පවසනවා .
තුර්කියේ සිදුවූ භූමිකම්පාවෙන් සිදුවූ තහවුරු කරන ලද මරණ සංඛ්‍යාව 4,300 ට වඩා වැඩි වී ඇති බවද විදෙස් මාධ්‍ය සඳහන් කරනවා.
ඊයේ (06) අලුයම මිනිසුන් නිදා සිටියදී තුර්කියේ Gaziantep අසල ඇති වූ රික්ටර් පරිමාණයේ 7.8 ක භූමිකම්පාවෙන් පසු ගොඩනැගිලි දහස් ගණනක් කඩා වැටී තිබෙන බව විදෙස් මාධ්‍ය වාර්තා කළා .
රික්ටර් පරිමාණයේ 7.5 ක පසු කම්පනයක් පැය කිහිපයකට පසුව ඒ අසල ඇති වූ අතර, ඒ වන විටත් දැඩි ලෙස හානියට පත් වූ කලාපයට තවදුරටත් එයින් හානි සිදුව තිබෙනවා.
එමෙන්ම අද (07) අලුයම භූමිකම්පා කලාපයට ඉස්තාන්බුල් ගලවා ගැනීමේ භටයින් 13,000 ක් පමණ යවා ඇති බව එහි ආණ්ඩුකාර අලි යෙර්ලිකායා සඳහන් කරනවා.
කාර්යය මණ්ඩලයකින් සහ ස්වේච්ඡා සේවකයන්ගෙන් සමන්විත මෙම කණ්ඩායම විශේෂයෙන්ම දැඩි ලෙස විනාශයට පත්ව ඇති Hatay පළාතට යැවූ බවයි පැවසෙන්නේ
Hatay ගුවන් තොටුපලේ ධාවන පථයද දෙකට බෙදී ඇති බව විදෙස් මාධ්‍ය වාර්තා කරනවා
ගිනිකොණදිග තුර්කියේ සිදු වූ විනාශකාරී භූමිකම්පාවෙන් දිවි ගලවා ගත් අය සොයා ගැනීමට සහනකරුවන් දැඩි වර්ෂාව සහ හිම මධ්‍යයේ උත්සාහ කරමින් සිටිනවා
⏰06.00 itibarıyla #İstanbul’umuzdan;
✅ 7️⃣3️⃣ uçak ile
✅ 1️⃣2️⃣.7️⃣5️⃣2️⃣ personelimiz ve AFAD Gönüllülerimiz,başta #Hatay olmak üzere #deprem bölgesine sevk edildi.
Hakkınız ödenmez,minnettarız. pic.twitter.com/hlVNnS09u9
— Ali Yerlikaya (@AliYerlikaya) February 7, 2023
…………………………………………………………………………
Feb 7, 2023 at 10:50
ඉරානයේ සහ ඉරාකයේ හදිසි සැපයුම් සිරියාවට පැමිණෙයි -රටවල් රැසකින් ආධාර ලබා දීමට එකඟතාවය (UPDATE 6)
ඉරානයේ සහ ඉරාකයේ ආධාර රැගත් ගුවන් යානා Damascus ජාත්‍යන්තර ගුවන් තොටුපළට පැමිණ තිබෙන බව විදෙස් මාධ්‍ය පවසනවා.
ඉරාක ගුවන් යානා රැගෙන ආ හදිසි සැපයුම් අතර ආහාර, වෛද්‍ය සැපයුම් සහ බ්ලැන්කට් ටොන් 70 ක් පමණ තිබු බව සිරියානු රාජ්‍ය මාධ්‍ය වාර්තා කරනවා.
ඉරාක අගමැති මොහොමඩ් ෂියා අල්-සුඩානි ඊයේ(06) ප්‍රකාශ කළේ ඔවුන් ප්‍රථමාධාර, නවාතැන් සැපයුම්, බෙහෙත් සහ ඉන්ධන වශයෙන් ආධාර තොගයක් යවන බවයි.
සිරියාවේ භූමිකම්පාවෙන් විපතට පත් ප්‍රදේශවලට මානුෂීය ආධාර යැවීමට තම රට සූදානම් බව ඉරාන විදේශ අමාත්‍ය Hossein Amirabdullahian ද ඊයේ (06) ප්‍රකාශ කර තිබුණා
ගලවා ගැනීමේ කණ්ඩායම්වලට බලපෑමට ලක්වූ ප්‍රදේශවලට ළඟා වීමටද අසීරු වී ඇති බවද විදෙස් මාධ්‍ය වාර්තා කරනවා .
අද (07) දිනයේත් රික්ටර් පරිමාණයේ 5.5 ක කම්පනයක් ගොල්බාසි නගරය ආසන්නයේ සිදුව ඇති බව එක්සත් ජනපද භූ විද්‍යා සමීක්ෂණ ආයතනය පවසනවා
මේ අතර, ප්‍රංශය පදනම් කරගත් යුරෝපීය මධ්‍යධරණී භූ කම්පන මධ්‍යස්ථානය (EMSC) ගොල්බාසි අසල භූමිකම්පාවේ ප්‍රබලත්වය 5.6 ක් ලෙස සටහන් කර තිබෙනවා
මේ අතර තුර්කියේ සෝදිසි කිරීම් සහ ගලවා ගැනීමේ ප්‍රයත්නයන්ට සහාය වීම සඳහා ජපානය ආපදා සහන ගලවා ගැනීමේ කණ්ඩායමක් යවා ඇති බවද විදෙස් මාධ්‍ය පවසනවා
එමෙන්ම භූමිකම්පා කලාපවලට රිය පැදවීමෙන් වළකින්නැයි ස්වේච්ඡා සේවකයන් අනතුරු අඟවා තිබෙනවා.
තුවාලකරුවන් බේරා ගැනීම සඳහා රුධිරය පරිත්‍යාග කරන ලෙසද ඉල්ලා තිබෙන බවයි වාර්තා වන්නේ
ඕස්ට්‍රේලියානු අගමැති Anthony Albanese පවසා තිබෙන්නේ තම රජය ඕස්ට්‍රේලියානු ඩොලර් මිලියන 10 ක් ආධාර වශයෙන් ලබා දෙන බවයි.
ඕස්ට්‍රේලියාවේ සංචාරයක නිරත වන නවසීලන්ත අගමැති ක්‍රිස් හිප්කින්ස් ද සිය රජය නවසීලන්ත ඩොලර් මිලියන 1.5ක් ලබාදෙන බව නිවේදනය කර තිබෙනවා
තවද, තුර්කියේ සහ සිරියාවේ දැන් ශීත කාලය බැවින් මුදා ගැනීමේ මෙහෙයුම්වලට බාධා ඇතිව තිබෙන බවද විදෙස් මාධ්‍ය පවසනවා.
………………………………………………………………………………….
Feb 7, 2023 at 09:05
දකුණු තුර්කියේ සහ උතුරු සිරියාවේ තවදුරටත් මෙහෙයුම් – 4,300කට වැඩි පිරිසක් මරුට (UPDATE 05)
ඊයේ (06) උදෑසන සිදුවූ භූමිකම්පාවෙන් පසු දකුණු තුර්කියේ සහ උතුරු සිරියාවේ බොහෝ ප්‍රදේශවල තවදුරටත් මුදා ගැනීමේ මෙහෙයුම් ක්‍රියාත්මක වන බව විදෙස් මාධ්‍ය පවසනවා.
මේ වනවිට පුද්ගලයන් 4,300කට වැඩි පිරිසක් මිය ගොස් ඇති බවයි විදෙස් මාධ්‍ය වාර්තා කරන්නේ.
රිච්ටර් මාපකයේ 7.8 ක ප්‍රබලත්වයෙන් යුත් භූමිකම්පාව ඊයේ (06) අලුයම Gaziantep අසලදී මිනිසුන් නිදා සිටියදී ඇතිවූ බවයි විදෙස් මාධ්‍ය වාර්තා කරන්නේ.
පළමු භූමිකම්පාවෙන් පසු තුර්කියේ පමණක් 2,921 කට වැඩි පිරිසක් මියගොස් ඇති අතර 15,000 කට වැඩි පිරිසක් තුවාල ලබා ඇති බව එරට ආපදා ඒජන්සිය සඳහන් කර තිබෙනවා.
සිරියාවේ 1400කට වැඩි පිරිසක් මියගොස් ඇතැයි වාර්තා වනවා
තුර්කිය උදව් ඉල්ලා නිවේදනයක් නිකුත් කිරීමෙන් පසු එක්සත් ජනපදය සහ දකුණු කොරියාව ඇතුළු රටවල් ආධාර යැවීමට ආරම්භ කර තිබෙන බවද විදෙස් මාධ්‍ය පවසනවා
දැඩි සීතල, හිම සහ වර්ෂාව තුර්කියේ රාත්‍රිය පුරා දිවි ගලවා ගත් අය සෙවීමේ උත්සාහයට බාධා කර ඇති බවද විදෙස් මාධ්‍ය සඳහන් කරනවා .
……………………………………………………………………….
Feb 6, 2023 at 16:10
දකුණු තුර්කියේ සහ උතුරු සිරියාවේ පුද්ගලයන් 1,200කට වැඩි පිරිසක් ජීවිතක්ෂයට (UPDATE 04)
රිච්ටර් මාපකයේ 7.8 ක ප්‍රබලත්වයෙන් යුත් භූමිකම්පාවෙන් පීඩාවට පත් දකුණු තුර්කියේ සහ උතුරු සිරියාවේ ජනතාව සොයා බොහෝ ප්‍රදේශවල මුදා ගැනීමේ මෙහෙයුම් තවදුරටත් ක්‍රියාත්මක වනවා.
පුද්ගලයන් 1,200කට වැඩි පිරිසක් මේ වනවිට මිය ගොස් ඇති බවද විදෙස් මාධ්‍ය පවසනවා.
තුර්කියේ පමණක් 912 දෙනෙකු මියගොස් 5,300 කට වැඩි පිරිසක් තුවාල ලබා ඇති බව තුර්කි ජනාධිපති එර්ඩෝගන් පවසා තිබෙනවා .
තුර්කිය ආධාර සඳහා ජාත්‍යන්තර වශයෙන් ඉල්ලීමක් කිරීමෙන් පසු එක්සත් රාජධානියේ අගමැති රිෂි සුනක් සහ ප්‍රංශ ජනාධිපති එමානුවෙල් මැක්‍රොන් ඇතුළු ලෝක නායකයින් ආධාර යැවීමට පොරොන්දු වී ඇති බවයි විදෙස් මාධ්‍ය සඳහන් කරන්නේ
සෝදිසි කිරීම් සහ ගලවා ගැනීමේ මෙහෙයුම් අඛණ්ඩව සිදුවන බැවින් මරණ සංඛ්‍යාව කොපමණ ඉහළ යනු ඇත්දැයි අනාවැකි කිව නොහැකි බවද තුර්කි ජනාධිපතිවරයා වැඩිදුරටත් සඳහන් කරනවා.
භූමිකම්පාවෙන් පීඩාවට පත් තුර්කියේ නගර සහ පළාත් 10 ක පාසල් සතියක කාලයක් වසා තබන බව එරට උප ජනාධිපති ෆුට් ඔක්ටේ පවසනවා
Hatay පළාතේ ගුවන් තොටුපළ වෙත සහ ඉන් පිටත ගුවන් ගමන් අත්හිටුවා ඇති අතර, Maraş සහ Antep හි ගුවන් තොටුපළ ද සිවිල් ගුවන් ගමන් සඳහා වසා දමා ඇති බව තුර්කි උප ජනාධිපතිවරයා සඳහන් කරනවා .
………………………………………………………………………………….
Feb 6, 2023 at 14:55
තුර්කියේ හදිසි තත්ත්වයක් ප්‍රකාශයට (UPDATE 3)
රටවල් දෙකකට බලපෑ භූමිකම්පාවෙන් සිරවී සිටින්නන් සොයා තවදුරටත් මෙහෙයුම් සිදු කෙරෙමින් පවතින බව විදෙස් මාධ්‍ය පවසනවා.
සිරියානු දේශසීමාව ආසන්නයේ ගිනිකොණදිග තුර්කියට බලපෑ රිච්ටර් මාපකයේ 7.8 ක විශාල භූමිකම්පාවෙන් මියගිය සංඛ්‍යාව 500 ඉක්මවන නමුත් එය වැඩි වීමට ඉඩ ඇති බව තුර්කියේ සහ සිරියාවේ නිලධාරීන්ගේ ප්‍රකාශ උපුටා දක්වමින් විදෙස් මාධ්‍ය වාර්තා කරනවා
තුර්කිය බලපෑමට ලක් වූ පළාත්වල හදිසි තත්ත්වයක් ප්‍රකාශයට පත් කර ඇති අතර ගලවා ගන්නන් සම්බන්ධීකරණය කිරීමට ඉඩ දීම සඳහා ජංගම දුරකථන භාවිතා නොකරන ලෙස ජනතාවගෙන් ඉල්ලා තිබෙනවා.
තුර්කිය, සිරියාව, ලෙබනනය, සයිප්‍රසය සහ ඊශ්‍රායලය පුරා සිටින මිලියන සංඛ්‍යාත ජනතාවට මෙම භූමිකම්පාව දැනී ඇති බවද විදෙස් මාධ්‍ය පවසනවා.
මේ වනවිට සිරියාවේ මරණ 320 ක් වාර්තා වී තිබෙනවා
එමෙන්ම සිරියාවේ ජනාධිපති බෂාර් අසාද්ගේ ප්‍රධානත්වයෙන් අද(06) පෙරවරුවේ හදිසි රැස්වීමක් පවත්වා තිබෙන බවද විදෙස් මාධ්‍ය පවසනවා.
යුරෝපීය නායකයෝ මෙම කලාපයට උදව් කිරීමට පොරොන්දු වී තිබෙනවා
නෙදර්ලන්ත අගමැති Mark Rutte නිවේදනය කර ඇත්තේ තුර්කියේ සහ සිරියාවේ දිවි ගලවා ගත් අය සෙවීම සඳහා එරට සෙවීම් සහ මුදාගැනීමේ කණ්ඩායමක් එක්කරන බවයි.
ග්‍රීසිය ද විපතට පත් ප්‍රදේශවලට වහාම ආධාර සපයන බව ප්‍රකාශ කර ග්‍රීක අගමැති Kyriakos Mitsotakis තිබෙනවා
සර්බියාවේ සහ ස්වීඩනයේ නායකයින් ද කලාපයට ආධාර යැවීමට පොරොන්දු වී තිබෙන බවයි විදෙස් මාධ්‍ය වැඩිදුරටත් වාර්තා කරන්නේ
………………………………………………………………………….
Feb 6, 2023 at 13:20
භූමිකම්පාවෙන් මිය ගිය පිරිස 500 ඉක්මවයි – 3,000කට වැඩි පිරිසකට තුවාල (UPDATE 2)
ගිනිකොණදිග තුර්කියේ සිරියානු දේශසීමාව ආසන්නයේ පුළුල් ප්‍රදේශයකට බලපෑ භූමිකම්පාවෙන් 500 කට වැඩි පිරිසක් මිය ගොස් ඇති අතර තවත් බොහෝ පිරිසක් සිරවී සිටින බව විදෙස් මාධ්‍ය වාර්තා කරනවා.
තුර්කි උප ජනාධිපති Fuat Oktay පවසා තිබෙන්නේ තුර්කියේ මියගිය සංඛ්‍යාව මේ වන විට 284 දක්වා ඉහළ ගොස් ඇති බවයි.
සිරියාවේ පුද්ගලයන් 230 කට වැඩි පිරිසක් මිය ගිය බවද එරට රාජ්‍ය මාධ්‍ය වාර්තා කර තිබෙනවා.
Aleppo, Latakia, Hama සහ Tartus යන පළාත්වලද පුද්ගලයන් මියගොස් ඇති බව සිරියානු සෞඛ්‍ය අමාත්‍යාංශය සඳහන් කරනවා
ඉදිරි පැය කිහිපය තුළ මරණ සංඛ්‍යාව සීඝ්‍රයෙන් ඉහළ යනු ඇති බවට විශ්වාස කෙරෙන බවද විදෙස් මාධ්‍ය වැඩිදුරටත් වාර්තා කරනවා
බොහෝ ගොඩනැගිලි කඩා වැටී ඇති අතර විශාල සුන්බුන් ගොඩවල්යට දිවි ගලවා ගත් අය සෙවීම සඳහා ගලවා ගැනීමේ කණ්ඩායම් යොදවා ඇති බවද සඳහන් වනවා
තුර්කියේ අවම වශයෙන් පුද්ගලයන් 2,323 ක් සහ සිරියාවේ 639 ක් තුවාල ලබා ඇති බවයි විදෙස් මාධ්‍ය වාර්තා කරන්නේ
එක්සත් ජනපද භූ විද්‍යා සමීක්ෂණ ආයතනය පැවසුවේ රිච්ටර් මාපකයේ 7.8 ක කම්පනයක් සිදුව ඇති බවයි
………………………………………………………………………………………………………..
Feb 6, 2023 at 11:15
භූමිකම්පාවෙන් මිය ගිය ගණන100 ඉක්මවයි – බොහෝ පිරිස් තවමත් සිරවී (UPDATE 1)
ගිනිකොණදිග තුර්කියේ සිරියානු දේශසීමාව ආසන්නයේ පුළුල් ප්‍රදේශයකට බලපෑ භූමිකම්පාවෙන් තවත් බොහෝ පිරිස් සිරවී සිටින බව විදෙස් මාධ්‍ය වාර්තා කරනවා
තුර්කියේ, නිලධාරීන් විසින් මේ වන විට මරණ 76 කට වඩා තහවුරු කර ඇති අතර නගර දහයකට බලපෑම් එල්ල වී ඇති බවයි පැවසෙන්නේ
එක්සත් ජනපද භූ විද්‍යා සමීක්ෂණ ආයතනය පැවසුවේ රිච්ටර් මාපකයේ 7.8 ක කම්පනයක් ඇතිව තිබෙන බවයි
සිරියාවේ අවම වශයෙන් පුද්ගලයින් 42 දෙනෙකු මියගොස් ඇති බව එරට රාජ්‍ය මාධ්‍ය වාර්තා කරනවා
බොහෝ ගොඩනැගිලි කඩා වැටී ඇති අතර විශාල සුන්බුන් ගොඩවල් යට දිවි ගලවා ගත් අය සෙවීම සඳහා ගලවා ගැනීමේ කණ්ඩායම් යොදවා ඇති බවද විදෙස් මාධ්‍ය පවසනවා.
Gaziantep හි ඊසාන දෙසින් පිහිටි Malatya පළාතේ අවම වශයෙන් පුද්ගලයින් 23 දෙනෙකු මිය ගිය බව එරට ප්‍රාදේශීය බලධාරීහු සඳහන් කර තිබෙනවා
………………………………………………………………
Feb 6, 2023 at 10:01
ගිනිකොණදිග තුර්කියේ සිදුවූ භූ කම්පනයකින් 17ක් මරුට (VIDEO & PHOTOS)
සිරියාවේ දේශසීමා ආසන්නයේ ගිනිකොණදිග තුර්කියේ Gaziantep ප්‍රදේශයට බලපෑ ප්‍රබල භූමිකම්පාවක් හේතුවෙන් පුද්ගලයන් 17 දෙනෙකු ජීවිතක්ෂයට පත්ව තිබෙන බව විදෙස් මාධ්‍ය වාර්තා කරනවා .
එක්සත් ජනපද භූ විද්‍යා සමීක්ෂණ ආයතනය පවසා තිබෙන්නේ රිච්ටර් මාපකයේ 7.8ක කම්පනයක් Gaziantep නගරය ආසන්නයේ ඇති වූ බවයි.
ගොඩනැගිලි රැසක් කඩා වැටී ඇති අතර පුද්ගලයන් සිරවී සිටින බවටත් මරණ සංඛ්‍යාව ක්‍රමයෙන් ඉහළ යමින් පවතින බවත් විදෙස් මාධ්‍ය වාර්තා කරනවා.
තුර්කි අභ්‍යන්තර කටයුතු අමාත්‍ය Suleymon Soylu පවසා තිබෙන්නේ නගර 10 කට බලපෑම් එල්ල වී ඇති බවයි
ඒ අනුව Gaziantep, Kahramanmaras, Hatay, Osmaniye, Adiyaman, Malatya, Sanliurfa, Adana, Diyarbakir සහ Kilis යන නගරවලට බලපෑම් එල්ලවී ඇති බවත් එමෙන්ම මෙම කම්පනය සිරියාව, ලෙබනනය සහ සයිප්‍රසයට ද දැනී ඇති බවත් විදෙස් මාධ්‍ය සඳහන් කරනවා
ගලවා ගැනීමේ මෙහෙයුම් ක්‍රියාත්මක අතර සිරියානු සිවිල් ආරක්ෂක සාමාජිකයින්, කඩා වැටුණු ගොඩනැගිලි යට සිරවී සිටින පුද්ගලයින් බේරා ගැනීමේ කටයුතු ආරම්භ කර තිබෙනවා.
