චීනය තවත් චන්ද්‍රිකා කිහිපයක් සාර්ථකව කක්ෂගත කරයි
චීනයේ ෂැන්ඩොං පළාතේ හයියැංග් වෙරළ තීරයට ඔබ්බෙන් වූ සාගර කලාපයේ සිට චීනය නව අත්හදා බැලීමේ චන්ද්‍රිකා සමූහයක් දියත් කර තිබෙනවා.
බෙයිජිං වේලාවෙන් අද (09) පෙ.ව. 5:01ට පමණ තායියුවාන් චන්ද්‍රිකා දියත් කිරීමේ මධ්‍යස්ථානයේ සිට මෙම චන්ද්‍රිකා සමූහය අභ්‍යවකාශගත කෙරුණේ, ලෝන්ග් මාර්ච් -11 වාහක රොකට්ටුව ආධාරයෙන්.
එහිදී Shiyan-32 පරීක්ෂණ චන්ද්‍රිකා තුනක් සාර්ථකව කක්ෂයට ඇතුළු වුණා.
මෙම චන්ද්‍රිකා ප්‍රධාන වශයෙන් අභ්‍යවකාශ පාදක තාක්ෂණයන්හි අත්හදා බැලීම් සඳහා යොදා ගන්නා අතර, මෙම දියත් කිරීම ලෝන්ග් මාර්ච් වාහක රොකට් මාලාවේ 606 වන පියාසැරි මෙහෙයුම සනිටුහන් කළා.
මීට අමතරව, ලිජියන් -1 Y9 වාහක රොකට්ටුව ආධාරයෙන්, තාක්ෂණික අත්හදා බැලීමේ චන්ද්‍රිකා දෙකක් දියත් කිරීම ද චීනය අද (09) දින සිදු කර තිබෙනවා.
වයඹදිග චීනයේ Jiuquan චන්ද්‍රිකා දියත් කිරීමේ මධ්‍යස්ථානය අසල ඩොංෆෙංග් වාණිජ අභ්‍යවකාශ නවෝත්පාදන නියමු කලාපයෙන් එම රොකට්ටුව දියත් කෙරුණේ බෙයිජිං වේලාවෙන් පෙ.ව. 11:32 ට පමණයි.
එම චන්ද්‍රිකා ද සැලසුම් කළ කක්ෂය වෙත සාර්ථකව ඇතුළු වූ බව චීන බලධාරීන් දැනුම් දී ඇත.