තාක්ෂණවේදය විෂයට සිසුන්ගේ දැඩි උනන්දුවක්
ගැහැණු පිරිමි භේදයකින් තොර ව තාක්ෂණවේදය විෂයට සිසුන්ගේ දැඩි උනන්දුවක් දක්වන බව අධ්‍යාපන අමාත්‍ය ආචාර්ය සුසිල් ප්‍රේමයන්ත මහතා පවසනවා
ඔහු මේ බව කියා සිටියේ ශ්‍රී ලාංකික කාන්තාවන් සවිබල ගැන්වීමේ අරමුණින් සිලෝන් විමෙන් සංවිධානය ඉදිරියේ දී මෙරට ක්‍රියාත්මක කිරීමට සංවිධානය කර ඇති ව්‍යාපෘති පිළිබඳ දැනුම්වත් කිරීමේ වැඩසටහනකට එක්වෙමින්
කලා විද්‍යා වාණිජ යන ප්‍රධාන විෂය ධාරා තුනට අමතර ව 2014 වර්ෂයේ දී පමණ පාසල් විෂය මාලාවට අලු‍තෙන් එක් වූ තාක්ෂණ විෂය ධාරාව යටතට ගැනෙන ජෛව තාක්ෂණය, ඉංජිනේරු තාක්ෂණය හා තොරතුරු තාක්ෂණය යන උපවිෂයන් හැදෑරීමට ශිෂ්‍ය ප්‍රජාව අතර මහත් උද්‍යෝගයක් පවතින බවත් ඒ අතර සිසුවියන් ඊට වැඩි උනන්දුවක් දැක්වීමේ ප්‍රවණතාවක් දැකිය හැකි බවත් අමාත්‍යවරයා එහිදී වැඩිදුරටත් පැවසුවා
එමෙන්ම පාර්ලිමේන්තුව තුළ මන්ත්‍රීවරුන් 225 දෙනා අතර කාන්තා නියෝජනය ඇත්තේ 12 දෙනකුගේ තරම් අතළොස්සක් බවත් මෙම තත්ත්වය වෙනස් කර දේශපාලන ක්ෂේත්‍රය තුළ පක්ෂ භේදයකින් තොර ව කාන්තා නියෝජනය වැඩි කිරීම මගින් දූෂණ වංචාවලින් තොර රටක් නිර්මාණය කළ හැකි වනු ඇති බවත් අමාත්‍යවරයා එහිදී කියා සිටියා