දෙවන ජන රැලිය මේ මස 29දා
ශ්‍රී ලංකා නිදහස් පක්ෂය ප්‍රමුඛ නව සන්ධාන පාර්ශ්වය විසින් ඒකාබද්ධව පවත්වන ජන රැලි මාලාවේ දෙවන ජන රැලිය මොණරාගල දිස්ත්‍රික්කයේ,වැල්ලවාය නගර මධ්‍යයේදී මේ මස 29දා පස්වරු 2.00 ට පැවැත්වීමට සියලු කටයුතු සූදානම් කර තිබෙනවා.
දිනුම රටට – එක්ව පෙරට යන තේමාව පෙරදැරි කොටගෙන මේ ජන රැලිය පවත්වන අතර විදේශ රැකියා ප්‍රවර්ධන රාජ්‍ය ඇමැති ජගත් පුෂ්පකුමාර මහතා විසින් මෙය සංවිධාන කරනු ලැබුවා.
නව සන්ධානය ආරම්භ කිරීමත් සමඟ ශ්‍රී ලංකා නිදහස් පක්ෂය සමඟ ඒකාබද්ධව නව සන්ධාන වැඩපිළිවෙළ වඩාත් ශක්තිමත් කර තිබෙනවා.
පාර්ලිමේන්තුව නියෝජනය කරන මන්ත්‍රීවරුන් වැඩිම පිරිසකගේ සහභාගිත්වයෙන් යුතුව දැවැන්ත සන්ධානයක් ගොඩනැඟීමට නව සන්ධානය ප්‍රමුඛ අනෙකුත් පාර්ශ්වයන් කටයුතු කරමින් සිටිනවා.
ඒ සඳහා විවිධ දේශපාලන පක්ෂ,වෘත්තීය සමිති,සිවිල් සංවිධාන රැසක් නව සන්ධානය වටා ඒකරාශිවීමට සූදානමින් සිටින බවටයි වාර්තා වෙන්නේ.
නිමල් සිරිපාල ද සිල්වා,මහින්ද අමරවීර,ලසන්ත අලගියවන්න,දුමින්ද දිසානායක,ජගත් පුෂ්පකුමාර,සුසිල් ප්‍රේම්ජයන්ත,නලින් ප්‍රනාන්දු,අනුර ප්‍රියදර්ශන යාපා, නිමල් ලාන්සා, ප්‍රියංකර ජයරත්න මහත්වරුන්,නව සන්ධානයට සහාය දක්වන පාර්ලිමේන්තු මන්ත්‍රීවරුන්,හිටපු පාර්ලිමේන්තු මන්ත්‍රීවරුන්,පළාත් සභා මන්ත්‍රීවරුන්,ප්‍රාදේශීය සභා මන්ත්‍රීවරුන්,වෘත්තීය සමිති නියෝජිතවරුන් හා සිවිල් සංවිධාන ක්‍රියාකාරීහු ඇතුළු පිරිසක් මේ ජන රැලියට එක්වෙනවා.