දේශබන්දුගේ නම 2020 වසරේ සිට ඡන්ද හිමි නාමලේඛනයේ නැහැ -අද අධිකරණයේදී හෙළිවූ දේ (VIDEO)
හිටපු පොලිස්පති දේශබන්දු තෙන්නකෝන්ගෙ නම 2020 වසරේ සිට ඡන්ද හිමි නමලේඛනයේ පවා නොමැති බවත් ඔහු මේ සමාජයේ ජිවත්ව ඇත්තේ “ගොස්ට්”(හොල්මනක්) ලෙස බවත් අතිරේක සොලිසිටර් ජනරාල් දීලිප පිරිස් මහතා මාතර මහේස්ත්‍රාත් අධිකරණයට දැනුම් දී තිබෙනවා.
2023 වසරේ මාතර, වැලිගම ප්‍රදේශයේ පිහිටි W15 හෝටලයට වෙඩි ප්‍රහාරයක් එල්ල කිරීමේ සිද්ධිය සම්බන්ධයෙන් අත්අඩංගුවට ගැනීමට නියමිතව සිටියදී අධිකරණයට ඉදිරිපත් වූ පොලිස්පති දේශබන්දු තෙන්නකෝන් සම්බන්ධයෙන් මාතර මහෙස්ත්‍රාත් අධිකරණයට කරුණු දක්වමින් නීතිපතිවරයා වෙනුවෙන් පෙනී සිටි අතිරේක සොලිසිටර් ජනරාල් දීලිප පිරිස් මහතා මෙලෙස වැඩිදුරටත් සඳහන් කළා.
“ස්වාමිනි.. දින විස්සක් පුරා මේ තැනැත්තා සොයමින් සිටින අවස්ථාවක අධිකරණයේ බංකුව දක්වා පැමිණියේ කොහොමද කාගෙවත් ඇසකට හසු නොවි. ඒ වගේම පහුගිය දවස් 20 පුරා සැඟවිලා හිටිය තැන ගැන විශේෂයෙන්ම විමර්ශනය කළ යුතුයි. මේ තැනැත්තා පොලිස්පතිවරයාට නෙවෙයි අඩුම පොලිස් කොස්තාපල් තනතුරටවත් සුදුසු නෑ. පොලිස් කොස්තාපල් කෙනෙක් කියලා කියන ඒ අයටත් කරන නිගරුවක්. දැනට සොයාගෙන තියෙනවා මොහුට ගෙවල් අටක් හිමියි කියලා… 2020 වසරේ සිට ඡන්ද හිමි නාමලේඛනයේවත් මොහුගේ නම නෑ. හොල්මනක් විදියට සමාජයේ ඉදලා තියෙන්නේ. හරක් කටා, මාකදුරේ මධුෂ්ට වඩා දරුණු ගණයේ සංවිධානාත්මක අපරාධකරුවෙක් මොහු. තමන්ගේ බලය අනිසි ලෙස භාවිතා කරලා තියනවා. ඇප නොදී විමර්ශන අවසන් වන තෙක් රිමාන්ඩ් කරන ලෙස ඉල්ලා සිටිනවා.”
එහිදි දේශබන්දු තෙන්නකෝන්ට ඇප ඉල්ලා ජනාධිපති නිතිඥ රෝමේශ් ද සිල්වා මහතාගෙ උපදෙස් පරිදි ජනාධිපති නිතිඥ ශානක රණසිංහ මහතා කරුණු දැක්වුවා.
ඉදිරිපත් වූ සියලු කරුණු සලකා බැලු ප්‍රධාන මහේස්ත්‍රාත් අරුණ ඉන්ද්‍රජිත් බුද්ධදාස මහතා සඳහන් කළේ මෙම කරුණු සම්බන්ධයෙන් අධ්‍යයනය කර ඇප දෙනවාද නැද්ද යන්න නියෝගයද අද (19) ප්‍රකාශයට පත් කරන බවයි.
ඒ අනුව මහෙස්ත්‍රාත්වරයා හෙට දිනය දක්වා රිමාන්ඩ් කිරීමට නියෝග කළා.
අත්අඩංගුවට ගැනීමට නියෝග කිරීමෙන් පසුව පසුගිය 27 වනදා සිට අධිකරණ මගහැර සිටි දේශබන්දු තෙන්නකෝන් අද පෙරවරුවේ සිය නීතීඥවරු මාර්ගයෙන් මාතර මහේස්ත්‍රාත් අධිකරණයට ඉදිරිපත් වුණා.