නාවල ඉන්ධන පිරවුම්හල කොල්ල කෑ පිරිසෙන් දෙදෙනෙක් අත්අඩංගුවට (වීඩියෝ)

නුගේගොඩ, මිරිහාන, නාවල ප්‍රදේශයේ ඉන්ධන පිරවුම්හලක සේවකයින්ට පහර දී මුදල් කොල්ල කෑමේ සිද්ධියට සම්බන්ධ සැකකරුවන් දෙදෙනෙකු පොලිසිය අත්අඩංගුවට ගෙන තිබෙනවා.

පොලිසිය පැවසුවේ සැකකරුවන් අත්අඩංගුවට ගන්නා අවස්ථාවේ ඔවුන් සතුව හෙරොයින් මත්ද්‍රව්‍යද තිබූ බවයි.

මිරිහාන, නාවල ප්‍රදේශයේ පිහිටි මෙම ඉන්ධන පිරවුම්හලට ත්‍රිරෝද රථයකින් පැමිණි නාඳුනන පිරිසක් එහි සේවකයින්ට කඩුවලින් පහර දී රුපියල් දෙලක්ෂ පනස්දහසකට අධික මුදලක් කොල්ල කා තිබුණේ පෙරේදා දිනයේයි.

මෙම සිද්ධිය සම්බන්ධයෙන් පරීක්ෂණ සිදුකළ මිරිහාන පොලිසිය ඊයේ (19) පස්වරුවේ සැකකරුවන් දෙදෙනෙකු අත්අඩංගුවට ගත්තේ හෙරොයින් මත්ද්‍රව්‍යද සමඟයි.

අත්අඩංගුවට ගත් සැකරුවන් දෙදෙනා සන්තකයේ තිබී හෙරොයින් ග්‍රෑම් 10 යි මිලි ග්‍රෑම් 300 ක් සොයාගත් බවයි පොලිසිය සඳහන් කළේ.

අපරාධය සිදුකිරීමට සැකකරුවන් පැමිණි ත්‍රීරෝද රථය සහ කඩු 04ක් කොල්ලකන ලද මුදලින් රුපියල් දස දහසක මුදලක් ද පොලිස් භාරයට ගෙන තිබෙනවා.

අත්අඩංගුවට ගත් සැකකරුවන් වසස අවුරුදු 24 සහ 37 යන වයස්වල පසුවන්නන් වන අතර ඔවුන් නාරාහේන්පිට සහ මොරගස්මුල්ල ප්‍රදේශවල පදිංචිකරුවන් බවයි පොලිසිය පැවසුවේ.

තවත් සැකකරුවන් තිදෙනෙකු අත්අඩංගුවට ගැනීමට නියමිත අතර අත්අඩංගුවට ගත් සැකකරුවන් දෙදෙනා අද (20) නුගේගොඩ මහේස්ත්‍රාත්වරයා හමුවට ඉදිරිපත් කිරීමට නියමිතයි.