නිර්මාංශ භෝජන සංග්‍රහ මැද කෙරුණු ඉන්දු ඇමරිකන් නායක කතා
ඉන්දීය අග්‍රාමාත්‍ය නරේන්ද්‍ර මෝදි වෙනුවෙන් ධවල මන්දිරයේ දකුණු තණතීරුවේ පැවති රාජ්‍ය රාත්‍රී භෝජන සංග්‍රහයට එක්සත් ජනපද ජනාධිපති ජෝ බිඩෙන් සහ ජනාධිපති ආර්යාව ජිල් බිඩෙන් විසින් ඊයේ(23) සත්කාරකත්වය සපයන ලද බව විදෙස් මාධ්‍ය පවසනවා.
මෙම රාත්‍රී භෝජන සංග්‍රහයට තාක්‍ෂණ ලෝකයේ දැවැන්තයින් සහ මුකේෂ් අම්බානි, ගූගල් ප්‍රධාන විධායක නිලධාරී සුන්දර් පිචායි සහ ඇපල් ප්‍රධාන විධායක නිලධාරී ටිම් කුක් වැනි ප්‍රකෝටිපති කර්මාන්තකරුවන් සහභාගීවී සිටිනු දැකගත හැකි වූ බවද එම වාර්තාවල සඳහන්.
ඊට පෙර, අගමැති මෝදි ඕවල් කාර්යාලයේදී ජනපති ජෝ බයිඩන් සමඟ ද්විපාර්ශ්වික සාකච්ඡා පැවැත්වීමෙන් පසු එක්සත් ජනපද කොංග්‍රසය ඇමතීය.
නරේන්ද්‍ර මෝදි එක්සත් ජනපද කොන්ග්‍රසය අමතමින් යුක්රේනය, ත්‍රස්තවාදය, එක්සත් ජනපදය සමඟ ආරක්ෂක සබඳතා සහ තවත් බොහෝ දේ ගැන කතා කළ අතර . මෙය අග්‍රාමාත්‍ය මෝදි විසින් එක්සත් ජනපද ඒකාබද්ධ රැස්වීමක් අමතා කළ දෙවන දේශනයයි. මෙය ඉන්දියානුවෙකු සඳහා වූ පළමු සහ ලෝක නායකයන්ට ලැබෙන දුර්ලභ ගෞරවයකි.
එම අවස්ථාවන්ට පෙර, ඇන්ඩෲස් ගුවන් කඳවුරේදී අගමැති මෝදි උත්සවාකාර පිළිගැනීමකින් සහ ගෞරවාචාරයකින් පිළිගනු ලැබුවා. ජනාධිපති ජෝ බයිඩන් සහ ජනාධිපති ආර්යාව ජිල් බිඩෙන් නිර්මාංශ රාත්‍රී භෝජන සංග්‍රහයක් පවත්වමින් මොණරුන්ගෙන් සහ නෙළුම් මල් වලින් සරසා ඇති ධවල මන්දිරයට අගමැති මෝදිව පිළිගත්තේ ඉන් අනතුරුව බවයි විදෙස් මාධ්‍ය පවසන්නේ.
අගමැති මෝදි ජුනි 21 වන දින ඉන්දීය වේලාවෙන් අලුයම 1.30 ට වොෂින්ටනයට ගොඩබැස්සේ ඉතාම කාර්යබහුල කාලසටහනක් සහිතවය. විශේෂයෙන්ම 21වැනිදා ඔහු එක්සත් ජාතීන්ගේ මූලස්ථානයේ ජාත්‍යන්තර යෝගා දිනය නිමිත්තෙන් පැවැත්වෙන සැමරුම් උත්සවයටද නායකත්වය ලබාදුන්න් බව විදෙස් මාධ්‍ය වාර්තා කර තිබුණා.
එහිදී අගමැති නරේන්ද්‍ර මෝදිගේ එක්සත් ජනපදයේ නිල රාජ්‍ය සංචාරය වෙනුවන් සම්මානලාභී ජාත්‍යන්තර ගායිකා මේරි මිල්බෙන් සිය ගායනාවන්ද ඉදිරිපත් කරනු ලැබුණා.
මෝදි සහ බයිඩන් අතර හමුවේදී විශේෂයෙන් දෙරට අතර ආයුධ ගිවිසුම්වලට එළඹෙනු ඇති බවට විශ්ලේෂකයන් අනාවැකි පළකර තිබුණා. කෙසේවෙතත් එවැනි ගිවිසුම්වලට එළඹුනේදැයි මෙතෙක් නිල වශයෙන් අනාවරණය කර නැත. ඉන්දියාව දිගු කලක් තිස්සේ එක්සත් ජනපදයෙන් SeaGuardian ඩ්‍රෝන යානා මිලදී ගැනීමට උනන්දු වී ඇතත් ඩොලර් බිලියන 2 සිට ඩොලර් බිලියන 3 දක්වා වටිනාකමක් ඇති, තවමත් ක්‍රියාත්මක වී නොමැති මෙම ගනුදෙනුව “නිලධාරී බාධා කිරීම්” මගින් දිගු කලක් තිස්සේ ප්‍රමාදවී තිබෙනවා.මෙම ඩ්‍රෝන යානා මගින් ඉන්දීය සන්නද්ධ හමුදාවන්ට “බුද්ධි-අධීක්ෂණ-ඔත්තු බැලීමේ හැකියාවන්” වැඩිදියුණු කරන අතර එමඟින් දේශසීමා ආරක්ෂා කර ගැනීමට රටට උපකාර වන බව වාර්තා සඳහන් කරනවා.මීට අමතරව එක්සත් ජනපදයේ පෞද්ගලික අංශ ප්‍රහාරක ජෙට් එන්ජින් නිෂ්පාදනය කිරීම සඳහා දෙරට එක්ව කටයුතු කිරීමට සූදානම් වීමත් සමඟ ඉන්දියාව තුළ වඩාත් වැදගත් ආයෝජන සිදු කිරීම ආරම්භ වීමද මෙම සංචාරය හරහා සිදුවනු ඇතැයි පැවසෙනවා.
එක්සත් ජනපදය ඉන්දියාවට ආයුධ අපනයනය කිරීමේ වර්ධනයක් පෙන්වන නමුත් ඒ 11%ක ප්‍රතිශතයක් පමණි. ඒ අනුව, එක්සත් ජනපදය ඇත්තේ ඉන් 29%ක කොටසක් හිමි ප්‍රංශයට පසුපසිනුයි.එබැවින් ඇතැම් මහා පරිමාණයේ ආරක්ෂක ගනුදෙනු සිදුවීම නොවැළැක්විය හැකිඉ.. බොහෝ විට ඔවුන්, යුද්ධ කටයුතුවලදී පරීක්ෂා කරනු ලැබ ඇති MQ-9A “රීපර්” ඩ්‍රෝන යානා මිල දී ගැනීම සම්බන්ධයෙන් සහ ඉන්දියාවේ ප්‍රහාරක ජෙට් යානාවල එන්ජින් නිෂ්පාදනය කිරීම සඳහා ජෙනරල් එලෙක්ට්‍රික් සමාගම (GE) සහ ඉන්දියානු රජයේ සමාගම් අතර ගිවිසුම්ගත වීමක් නිවේදනය කිරීමට මෙම සංචාරය අවසානයේ ඉඩ පවතිතැයි අපේක්ෂා කෙරෙනවා.
මේ අතර, අගමැති මෝදිගේ සංචාරය අතරතුර සාකච්ඡාවට බඳුන් වීමට නියමිත අනෙකුත් ප්‍රධාන ක්ෂේත්‍ර අතරට තාක්ෂණය, ආරක්‍ෂාව සහ ගෝලීය සැපයුම්දාම කළමනාකරණය ඇතුළත් . තීරණාත්මක හා නැගී එන තාක්ෂණය පිළිබඳ වැඩසටහන ලෙස ඔවුන් හඳුන්වන ගිවිසුමකට දෙරට අත්සන් තබා තිබේ. මෙම ගිවිසුම අනුව, තොරතුරු තාක්ෂණය, අභ්‍යවකාශය, ආරක්‍ෂාව, කෘත්‍රිම බුද්ධිය, අධ්‍යාපනය සහ සෞඛ්‍ය ඇතුළු විවිධ අංශවල එක්සත් ජනපද සහ ඉන්දියානු සමාගම් සහ විශ්වවිද්‍යාලවලට එක්ව කටයුතු කිරීමට ඉඩ සැලසෙනවා. තාක්‍ෂණික ක්ෂේත්‍රය තුළ, විශේෂයෙන් ම, චීනය ආධිපත්‍යය දරන අර්ධ සන්නායක නිෂ්පාදන ක්ෂේත්‍රය තුළ සහයෝගිතාව වැඩිදියුණු කර ගැනීම පිළිබඳව ද දෙරටේ නායකයින් ප්‍රකාශයක් නිකුත් කරනු ඇති.ආරක්ෂක අංශය යනු, පොදු මතයක් පැවති යුතු ප්‍රධාන කරුණක් ලෙස ඉස්මතු වූ තවත් අංශයකි. ඉන්දියාව ලොව විශාලතම ආයුධ ආනයනකරු වන අතර, ඉන් වැඩි කොටසක් (45%ක්) තවමත් රුසියාවෙන් ආනයනය කරන බව 2017 සහ 2022 වසරවල විශ්ලේෂණය කරන ලද දත්ත පෙන්වා දෙනවා.නමුත් වැදගත් දෙය නම්, එය 2016 දක්වා පැවතියේ 65%ක ප්‍රතිශතයක වීමයි. එබැවින් එය වාසිදායක තත්ත්වයක් ලෙස එක්සත් ජනපදය දකියි.
එක්සත් ජනපදය ඩොලර් බිලියන 130ක් වටිනාකමකින් යුත් ගනුදෙනුවලට හිමිකම් කියමින් ඉන්දියාවේ විශාලතම වෙළෙඳ හවුල්කරු බවට පත්ව තිබෙනවා. නමුත් විශ්ලේෂකයින් පවසන්නේ තවමත් භාවිතා නොකළ විශාල විභවයක් පවතින බවයි.තීරුබදු සහ අපනයන පාලනය සම්බන්ධයෙන් දෙරට අතර ප්‍රධාන වෙනස්කම් පවතිනවා. ඉන්දියාව, ඕස්ට්‍රේලියාව සහ ඩුබායි යන රටවල් සමග නිදහස් වෙළෙඳ ගිවිසුමක් අත්සන් කර ඇති අතර, කැනඩාව, එක්සත් රාජධානිය සහ යුරෝපා සංගමය ඇතුළු අනෙකුත් රටවල් සමග ද එවැනි ම ගිවිසුම් පිළිබඳව සාකච්ඡා කරමින් සිටින බව වාර්තා වනවා.මෙම සංචාරයේ එවැනි කිසිදු ගිවිසුමකට එළඹීම සිදු නොවනු ඇති නමුත් ඒ පිළිබඳව නායකයින් සාකච්ඡා කිරීමට හෝ අනාගතයේ දී අවම වශයෙන් වෙළෙඳ කටයුතුවලට අදාළ ගැටලු විසඳීමට අවශ්‍ය මඟ සැකසෙනු ඇති.
ඉන්දීය අගමැති මෝදිගේ එක්සත් ජනපද සංචාරය සිදුවන්නේ අමෙරිකාව සහ චීනය අතර තීව්‍ර තරඟයක් මධ්‍යයේයි.. එසේම ඉන්දියාව දැන් ජනගහනය අනුව ලෝකයේ විශාලතම රට සහ ප්‍රධාන භූ දේශපාලනික හා ආර්ථික බලවතෙක් බවට පත්ව සිටී. එක්සත් රාජධානිය පරයමින් ලොව පස්වන විශාලතම ආර්ථිකය බවට ඉන්දියාව පත්වූයේ පසුගිය වසරේදීයි. එක්සත් ජනපද නිලධාරීන් විසින් මේ මොහොතේ ඉන්දියාව ආසියා-පැසිෆික් කලාපයේ තම වැදගත් පාර්ශ්වකරුවකු ලෙස නිරන්තරයෙන් ප්‍රශංසා කරනු ලබනවා. ඊට සමගාමීව දකුනු චීන මුහුදට චීනය හිමිකම් කීම ඇතුළු කරුණු ගණනාවක් එක්සත් ජනපදයේ දැඩි විවේචනයට ලක්ව තිබුණා.ධවල මන්දිරය පසුගිය මාසයේ අගමැති මෝදිගේ සංචාරය නිවේදනය කරමින් සඳහන් කළේ, ජාතීන් දෙක අතර “ගැඹුරු සහ සමීප හවුල්කාරිත්වය තහවුරු කිරීම” සඳහා ජනාධිපති ජෝ බයිඩෙන් ඔහුට සත්කාරකත්වය සපයනු ඇති බව පවසමිනුයි.