පොදුරාජ්‍ය මණ්ඩලීය පාර්ලිමේන්තු සංගමයෙන් ශ්‍රී ලංකා පාර්ලිමේන්තුවට සහය
ප්‍රජාතන්ත්‍රවාදී ගුණාංග තවදුරටත් වර්ධනය කරගැනීම සඳහා පාර්ලිමේන්තුව වෙත සිය සහය ලබාදෙන බව පොදුරාජ්‍ය මණ්ඩලීය පාර්ලිමේන්තු සංගමයේ නියෝජිතයින් ගරු කථානායක වෛද්‍ය ජගත් වික්‍රමරත්න සහ ප්‍රධාන නිලධාරීන් හමුවේ ප්‍රකාශ කර තිබෙනවා.
පොදුරාජ්‍ය මණ්ඩලීය පාර්ලිමේන්තු සංගමයේ, යහපාලන ව්‍යාපෘතියේ වැඩසටහන් කළමනාකරු ෆ්‍රේසර් මැකින්ටොෂ් (Fraser McIntosh) මහතා සහ සීෂෙල්ස් රාජ්‍යයේ, ජාතික සභාවේ නියෝජ්‍ය මහලේකම් ඇලෙක්සැන්ඩ්‍රියා ෆවුරේ (Alexandria Faure) මහත්මිය අතර පැවති හමුවකදී ඔවුන් මේ බව ප්‍රකාශ කර ඇති බවයි පාර්ලිමේන්තුවේ සන්නිවේදන දෙපාර්තමේන්තුව පැවසුවේ.
මෙහිදී පොදුරාජ්‍ය මණ්ඩලීය පාර්ලිමේන්තු සංගමය විසින් සමාලෝචනය කර ඉදිරිපත්කර ඇති ප්‍රජාතන්ත්‍රවාදී නීති සම්පාදන සඳහා නිර්දේශිත නිර්ණායකවල වැදගත්කම පිළිබඳව එම නියෝජිත පිරිස කථානායකවරයා දැනුවත් කර තිබෙනවා.
පාර්ලිමේන්තුවක් ස්ථාපිත කළ යුතු ආකාරය සහ එය ක්‍රියාත්මක විය යුතු ආකාරය පිළිබඳ අවම ප්‍රමිතියක් සහ මාර්ගෝපදේශයක් මෙම නිර්දේශිත නිර්ණායක මගින් සපයන බවත් ඒවා පාර්ලිමේන්තු තුළ ප්‍රයෝගිකව ක්‍රියාත්මක කිරීම ඔස්සේ වඩාත් ප්‍රජාතන්ත්‍රවාදී නීති සම්පාදන ක්‍රියාවලික් කරා යොමු වීමට පවතින හැකියාවන් පිළිබඳව ඔවුන් මෙහිදී වැඩිදුරටත් පෙන්වාදී ඇති බව සඳහන්.
එහිදී අදහස් දක්වමින් කථානායකවරයා ප්‍රකාශ කර ඇත්තේ වෙස්මිනිස්ටර් පාර්ලිමේන්තු සම්ප්‍රදාය තුළ බ්‍රිතාන්‍ය පාර්ලිමේන්තුවේ පවතින සම්මුතීන් පිළිබඳව ශ්‍රී ලංකා පාර්ලිමේන්තුව වඩාත් සැලකිලිමත්ව කටයුතු කරන බවයි.
එමෙන්ම වර්තමානය වනවිට ප්‍රජාතන්ත්‍රවාදී ව්‍යවස්ථාදායකයන් සඳහා වූ නිර්දේශිත නිර්ණායක ඔස්සේ යමින් ශ්‍රී ලංකා පාර්ලිමේන්තුව කටයුතු කරමින් සිටින බව එම හමුවේදී පෙන්වාදී ඇති කථානායකවරයා මේ වනවිට කාරක සභා, ආබාධ සහිත වූවන් සඳහා වන පාර්ලිමේන්තු සංසදය ඇතුළු සංසද, පාර්ලිමේන්තු මිත්‍රත්ව සංගම් ස්ථාපිත කර ඇති බවයි සඳහන් කර ඇත්තේ.