බැකෝ සමන් ගේ බිරිදගෙන් සී.අයි.ඩී. ය ප්‍රශ්න කිරීම අරඹයි (VIDEO)
ඉන්දුනීසියාවේ ජකර්තා නුවරදී අත්අඩංගුවට ගත් සංවිධානාත්මක අපරාධ කල්ලි සාමාජිකයින් අතර සිටි බැකෝ සමන් නමැත්තාගේ බිරිඳ සහ දරුවා මෙරටට පැමිණීමෙන් පසු ඊයේ රාත්‍රියේ දී අපරාධ පරීක්‍ෂණ දෙපාර්තමේන්තුව රැගෙන ආවා.
එහි ආරංචි මාර්ග පැවසුවේ ඇයගෙන් අපරාධ පරීක්‍ෂණ දෙපාර්තමේන්තුව විසින් මේ වනවිට ප්‍රශ්න කිරීම් සිදුකෙරෙන බවයි.
ජාත්‍යන්තර රතු නිවේදන නිකුත් කර සිටි මෙරට ප්‍රධාන පෙළේ සංවිධානාත්මක අපරාධ කල්ලි සාමාජිකයෙකු වන මන්දිනු පත්මසිරි නොහොත් කෙහෙල්බද්දර පත්මේ ඇතුළු පිරිසක් ඉන්දුනීසියාවේ ජකර්තා නුවරදී මෙරටින් ගිය විශේෂ පොලිස් කණ්ඩායමක් හා ඉන්දුනීසියානු පොලිසිය ඒකාබද්ධව පසුගියදා අත්අඩංගුවට ගැනීමට කටයුතු කළා.
අත්අඩංගුවට ගත් පාතාල සාමාජිකයින් අතර, තවත් ප්‍රධාන පෙළේ සංවිධානාත්මක අපරාධ කල්ලි සාමාජිකයින් බවට පැවසෙන කමාන්ඩෝ සලින්ත, පානදුරේ නිලංග, බැකෝ සමන්, තැබිලි ලහිරු ද වනවා.
අත්අඩංගුවට ගත් සැකකරුවන් ජකර්තා පොලිසියේ දැඩි ආරක්‍ෂාවක් යටතේ පසුවන අතර, ඔවුන් සමඟ සිටි බැකෝ සමන්ගේ බිරිඳ සහ දරුවා එරට තානාපති කාර්යාලය හරහා මෙරටටෙවීමට කටයුතු කර තිබුණා.
ඒ, ඇයට ජාත්‍යන්තර රතු නිවේදන නිකුත් කර නොතිබීමත්, ඇය සම්බන්ධයෙන් වූ අපරාධ වාර්තාවක් ජාත්‍යන්තර පොලිසිය මගින් ඉන්දුනීසියානු පොලිසියට යොමු කර නොතිබීම හේතුවෙන්.
ඒ අනුව බැකෝ සමන් නමැත්තාගේ බිරිඳ සහ කුඩා දරුවා ඊයේ පස්වරු 5.50ට පමණ දිවයිනට පැමිණියා.
අනතුරුව එම කාන්තාව අපරාධ පරීක්‍ෂණ දෙපාර්තමේන්තුවේ අත්අඩංගුවට පත් වූ අතර, බැකෝ සමන් නමැත්තාගේ බිරිඳගෙන් මේ වනවිට ප්‍රශ්න කිරීම් සිදුකෙරෙන බව වාර්තා වනවා.
වැඩිදුරටත් තොරතුරු වාර්තා වුණේ 2022 වර්ෂයේදී ඇඹිලිපිටියේ පිහිටි නිමිඇදුම් සහ ගමන්මලු නිෂ්පාදන ආයතනයක ගබඩා කර තිබී හෙරොයින් කිලෝග්‍රෑම් 38 කට අධික ප්‍රමාණයක් සොයාගැනීමේ සිද්ධියකට අදාළව බවටයි.
මේ අතර, ඉන්දුනීසියාවේදී අත්අඩංගුවට ගත් කෙහෙල්බද්දර පද්මේ ඇතුළු අනෙක් සැකකරුවන් ඉදිරි දින දෙක තුළ මෙරටට රැගෙන ඒමට නියමිත බවද පොලිසිය සඳහන් කළා.
එමෙන්ම අදාළ සැකකරුවන්ට අයත් වත්කම් සහ දේපළ සම්බන්ධයෙන් මේ වනවිට විමර්ශන ආරම්භ කර ඇති අතර, ඔවුන් සමඟ සබඳතා පැවැත්වූ පුද්ගලයින් සම්බන්ධයෙන් හා මත්ද්‍රව්‍ය ජාවාරමට සහ අපරාධවලට ආධාර අනුබල දුන් පුද්ගලයින් පිළිබඳව ද පුළුල් විමර්ශනයක් ක්‍රියාත්මකයි.