බොලිවු සිනමාවේ යුග තරුවක් වන “ධර්මේන්ද්‍ර” ජීවිත අඹරෙන් බැස යයි
බොලිවුඩ් සිනමාවේ යුගයක් බැබලවූ ප්‍රවීණ චිත්‍රපට නළු ධර්මේන්ද්‍ර අද(24) උදෑසන මුම්බායි හි ඔහුගේ නිවසේදී හදිසි අසනීප තත්ත්වයකින් පසු අභාවප්‍රාප්ත වී තිබෙනවා.
අභාවප්‍රාප්ත වන විට ඔහු ගේ වයස අවුරුදු 89 ක්.
ධර්මේන්ද්‍ර ගේ 90 වන උපන්දිනය යෙදී ඇත්තේ මේ වසරේ දෙසැම්බර් 8 වන දිනටයි.
ඉන්දීය මාධ්‍ය වාර්තා කළේ ඔහුගේ අවසන් කටයුතු පවන් හාන්ස් ආදාහනාගාරයේදී සිදු කරන බවයි.
හුස්ම ගැනීමේ අපහසුතාවයක් හේතුවෙන් ධර්මේන්ද්‍ර මුම්බායි හි බ්‍රීච් කැන්ඩි රෝහලට ඇතුළත් කර තිබුණේ ඔක්තෝබර් 31 වන දිනයි.
ශ්‍රීරාම් රාඝවන්ගේ බොහෝ අපේක්ෂාවෙන් සිටි යුද නාට්‍යයක් වන ඉකිස්, ධර්මේන්ද්‍රගේ පුළුල් තිරයේ අවසන් පෙනීසිටීම සනිටුහන් කළා.
1960 දී “දිල් භි ටෙරා හම් භි ටෙරේ” සමඟින් සිය මංගල රංගන ගමන ආරම්භ කළ ධර්මේන්ද්‍ර, 1960 දශකයේ “අන්පාද්, බන්දිනි, අනුපමා සහ ආයා සවන් ජූම් කේ” වැනි චිත්‍රපටවල පොදු මිනිසුන්ගේ චරිත නිරූපණය කරමින් සිය වෘත්තීය ජීවිතය ආරම්භ කළා.
පසුව ඔහු ෂෝලේ, ධරම් වීර්, චුප්කේ චුප්කේ, මේරා ගාඕන් මේරා දේශ් සහ ඩ්‍රීම් ගර්ල් හි ප්‍රධාන චරිත නිරූපණය කිරීමට සමත් වුණා.
ධර්මේන්ද්‍ර අවසන් වරට දක්නට ලැබුණේ ෂාහිඩ් කපූර් සහ ක්‍රිති සනොන් රඟපෑ “ටෙරී බාටන් මේන් අයිසා උල්ජා ජියා” චිත්‍රපටයේයි.
ඔහුගේ ඊළඟ සිනමා රංගනය දැකිය හැකි වන්නේ අමිතාබ් බච්චන්ගේ මුනුබුරා වන අගස්ති නන්දා රංගනයෙන් දායක වන “ඉක්කිස්”.