මානව හිමිකම් කොමිසමේ සභාපතිවරයාගෙන්, මහජන ආරක්ෂක අමාත්‍යාංශයේ ලේකම්වරයාට ලිපියක්
ශ්‍රී ලංකා මානව හිමිකම් කොමිසමේ සභාපති විනිසුරු එල්. ටී. බී.දෙහිදෙනිය මහතා මහජන ආරක්ෂක සහ පාර්ලිමේන්තු කටයුතු අමාත්‍යාංශයේ ලේකම්
ඩී.ඩබ්ලිව්.ආර්.බී. සෙනෙවිරත්න මහතා වෙත ලිපියක් යොමුකර තිබෙනවා.
එම ලිපියේ දැක්වෙන්නේ රාජ්‍ය නොවන සංවිධාන (ලියාපදිංචි කිරීම සහ අධීක්ෂණ) පනත් කෙටුම්පත සම්බන්ධයෙන් තම කොමිසම ගැසට් කිරීමට පෙර දැනුවත් කරන ලෙසයි.
එය සකස් කිරීමේදී මහජන ආරක්ෂක සහ පාර්ලිමේන්තු කටයුතු අමාත්‍යාංශය සම්බන්ධ වී ඇති බව ශ්‍රී ලංකා මානව හිමිකම් කොමිසම නොදන්නා බවද එහි සදහන්.
අදාල ලිපියේ දක්වා ඇත්තේ එම පනත් කෙටුම්පත රාජ්‍ය නොවන සංවිධාන ලියාපදිංචි කිරීම සහ අධීක්ෂණය සඳහා විධිවිධාන සැලසීම සහ 1980 අංක 31 දරන ස්වේච්ඡා සමාජ සේවා සංවිධාන (ලියාපදිංචි කිරීම සහ අධීක්ෂණ) පනත අවලංගු කිරීම අරමුණු කර ගෙන ඇති බව මානව හිමිකම් කොමිසම හොඳින් තේරුම් ගෙන ඇතැයි ද පෙන්වා දෙනවා.
1996 අංක 21 දරන ශ්‍රී ලංකා මානව හිමිකම් කොමිෂන් සභා පනතේ 10(c) වගන්තියට අනුව කොමිසමට තම වරම ඉටු කිරීමට හැකි වන පරිදි, නීති සම්පාදනය කිරීමේදී රජයට උපදෙස් දීමට සහ සහාය වීමට එම විධිවිධානය කොමිසමට බලය පැවරෙන බවද එම කොමිසමේ සභාපතිවරයා නිකුත් කළ නිවේදනයෙන් සිහිපත් කරනවා.
2024 මාර්තු මාසයේදී, රාජ්‍ය නොවන සංවිධාන සඳහා වූ ජාතික ලේකම් කාර්යාලයේ අධ්‍යක්ෂ ජනරාල්වරයා කොමිසමට දන්වා ඇත්තේ , පනත් කෙටුම්පතේ පෙර අනුවාදය අනුකූලතා සහතිකය ලබාගැනීම සඳහා නීතිපති දෙපාර්තමේන්තුවට ඉදිරිපත් කර ඇති බවත්, සහතිකය ලබාගත් පසු, අමාත්‍යාංශය පනත් කෙටුම්පතේ පිටපතක් කොමිසමට යොමු කරන බවට මනව හිමිකම් කොමිසමේ ලිපියෙන් සිහිපත් කරනවා.
කෙසේ වෙතත්, කොමිසමට තවමත් පනත් කෙටුම්පතේ පිටපතක් ලැබී නොමැති බව පවසන මානව හිමිකම් කොමිසමේ සභාපතිවරයා, පනත් කෙටුම්පතේ වත්මන් අනුවාදය පිළිබඳව එහි නිරීක්ෂණ ලබාදීමට කොමිසම සූදානම්ව සිටින බවත් සිහිපත් කරනවා.
මහජන ආරක්ෂක සහ පාර්ලිමේන්තු කටයුතු අමාත්‍යාංශයේ ලේකම්වරයාට දන්වා ඇත්තේ , කොමිසම මාර්ගගත ආරක්ෂණ පනත් කෙටුම්පත පිළිබඳ සිය නිරීක්ෂණ සහ නිර්දේශ ලබා දුන් බව සිහිපත් කරන කොමිසම, ඉන් සමහරක් නීතිපතිවරයා විසින් ශ්‍රේෂ්ඨාධිකරණයට යෝජනා කරන ලද කමිටු අදියර සංශෝධනවලට ඇතුළත් කර ඇතැයි ද පෙන්වා දෙනවා.
ඉතා මැනවින්, ක්‍රියාකාරී අයිතිවාසිකම්වලට බලපාන ඕනෑම යෝජිත නීති සම්පාදනයක් පිළිබඳ කොමිසමේ නිරීක්ෂණ සහ නිර්දේශ ගැසට් කිරීමට පෙර ලබා ගත යුතු බව සිහිපත් කරන මානව හිමිකම් කොමිසමේ සභාපතිවරයා එමඟින් කෙටුම්පත් කිරීමේ ක්‍රියාවලියේදී මුල් අවධියේදී උපදෙස් ලබා දීමට කොමිසමට හැකි වන බව පවසනවා.
පනත් කෙටුම්පතේ සාරය සම්බන්ධයෙන් අර්ථවත් මැදිහත්වීමක් ලබා ගැනීම සඳහා හැකි ඉක්මනින් රාජ්‍ය නොවන සංවිධාන (ලියාපදිංචි කිරීම සහ අධීක්ෂණය) පනත් කෙටුම්පත කොමිසම වෙත ලැබීමට සලස්වන ලෙස අමාත්‍යාංශ ලේකම්වරයාට කොමිසමේ සභාපතිවරයා නිර්දේශ කර තිබෙනවා.
