ලංකාවේ අලින්ගේ සංගණනයක් අගෝස්තු මාසයේදී

වසර දහතුනකට පසුව අගෝස්තු මාසයේදී අලි සංගණනයක් පැවැත්වීමට කටයුතු යොදා ඇති බව වනජීවී දෙපාර්තමේන්තුවේ අලි සංරක්ෂණ අංශය පවසනවා.

ඒ අනුව අගෝස්තු 19 වනදා සහ 20 වනදා මෙම සංගණනය සිදු කිරීමට සැලසුම් කර ඇති බවයි වාර්තා වන්නේ.

දිවයින පුරා දිය මංකඩ 2500ක් ඉලක්ක කරමින් මෙම වනඅලි සංගණනය සිදු කිරීමට නියමිතයි.

මේ සඳහා වනජීවී සංරක්ෂණ දෙපාර්තමේන්තුවට අනුයුක්ත කර තිබෙන බහු කාර්ය සංවර්ධන නිලධාරීන් සහ සිවිල් ආරක්ෂක බලකා සාමාජිකයන් හත්දාස් පන්සීයක පමණ පිරිසක් යොදවන බවයි වනජීවී දෙපාර්තමේන්තුවේ අලි සංරක්ෂණ අංශය පවසන්නේ.

සෑම වසර දහයකට වරක් අලි සංගණනයක් සිදු කරන අතර අවසන් වරට එය සිදු කරනු ලැබුවේ පසුගිය 2011 වසරේදීයි.

ඒ අනුව අවසන් වරට සිදුකරනු ලැබූ අලි සංගණනයේදී අලි 5800ක් පමණ සිටින බව සටහන් වී තිබුණා.