වැලිගම සිද්ධියට රනිල්ගෙන් ප්‍රකාශයක් ගන්න CIDය සැරසෙයි
2023 වසරේ වැලිගම පැලෑන ප්‍රදේශයේ හෝටලයක් අසල සිදුවු වෙඩිතැබීමේ සිද්ධියකට අදාළව හිටපු ජනාධිපති රනිල් වික්‍රමසිංහගෙන් ප්‍රකාශයක් ගන්නා බව අපරාධ පරික්ෂණ දෙපාර්තමේන්තුව විසින් මාතර මහෙස්ත්‍රාත් අධිකරණයට දැනුම් දී තිබෙනවා.
එමෙන්ම හිටපු අමාත්‍ය ටිරාන් අලස් සම්බන්ධයෙන් වැඩිදුර විමර්ශන සිදුකරන බවද එම දෙපාර්තමේන්තුව අධිකරණය වෙත දැනුම්දී ඇති බව සඳහන්.
ඒ, අදාළ නඩුව අද (03) මාතර මහෙස්ත්‍රාත් අධිකරණය හමුවේ කැඳවූ අවස්ථාවේදීයි.
දැනට රක්ෂිත බන්ධනාගාරගත කර සිටින අනිවාර්ය නිවාඩු යවා සිටින පොලිස්පති දේශබන්දු තෙන්නකෝන් මහතාව දුම්බර බන්ධනාගාරය මගින් අධිකරණයට ඉදිරිපත් කරනු ලැබුවා.
එහිදී නීතිපතිවරයා වෙනුවෙන් අතිරේක සොලිසිටර් ජනරාල් දීලිප පිරිස් මහතා දිර්ඝව කරුණු දක්වමින් හිටපු පොලිස්පතිවරයාට ඇප දිම සම්බන්ධයෙන් දැඩිව විරුද්ධත්වය දැක්වූ අතර දේශබන්දු තෙන්නකෝන් මහතා වෙනුවෙන් පෙනී සිටි ජනාධිපති නිතිඥවරයා සඳහන් කළේ ඕනෑම කොන්දේසියක් යටතේ සිය සේවාදායකයාට ඇප ලබා දෙන ලෙසයි.
ඉදිරිපත් වූ සියලු කරුණු සලකා බැලු මහේස්ත්‍රාත් අරුණ ඉන්ද්‍රජිත් බුද්ධදාස මහතා සඳහන් කළේ කරුණු අධ්‍යයනය කර ලබන අප්‍රේල් 10 වැනිදා ඇප දෙනවාද නැද්ද යන්න නියෝගය ප්‍රකාශයට පත් කරන බවයි.
ඒ අනුව දේශබන්දු තෙන්නකෝන් මහතා ලබන අප්‍රේල් 10 දක්වා යළි රක්ෂිත බන්ධනාගාරගත කරන ලෙස මහෙස්ත්‍රාත්වරයා නියෝග කළා.