විශේෂිත කුසලතා ඇති විදේශීය වෘත්තිකයන් බඳවා ගැනීමේ වීසා අයදුම්කරුවන් සඳහා ඩොලර් 100,000 අයකරන ප්‍රකාශයකට ට්‍රම්ප් අත්සන් තබයි
සංක්‍රමණ මර්දනය කිරීමේ නවතම උත්සාහය ලෙස, එක්සත් ජනපද ජනාධිපති ඩොනල්ඩ් ට්‍රම්ප්, H-1B වීසා අයදුම්කරුවන් සඳහා ඩොලර් 100,000 (රුපියල් ලක්ෂ 88 කට වැඩි) ගාස්තුවක් පනවන ප්‍රකාශයකට අත්සන් තැබුවා.
එය ඉන්දියාවෙන් සහ චීනයෙන් පැමිණෙන දක්ෂ සේවකයින් මත දැඩි ලෙස රඳා පවතින තාක්‍ෂණ අංශයට සැලකිය යුතු පහරක් එල්ල කළ හැකි පියවරක් ලෙසයි ජාත්‍යන්තර මාධ්‍ය පවසන්නේ.
ට්‍රම්ප්ට අනුව, මෙම පියවර අරමුණු කර ඇත්තේ රටට ගෙන එන පුද්ගලයින් “ඇත්ත වශයෙන්ම ඉතා ඉහළ කුසලතා ඇති” බවත්, ඇමරිකානු සේවකයින් ප්‍රතිස්ථාපනය නොකරන බවත් සහතික කිරීමයි.
“අපට සේවකයින් අවශ්‍යයි. අපට විශිෂ්ට සේවකයින් අවශ්‍යයි, මෙය සිදුවීමට යන දේ බොහෝ දුරට සහතික කරයි,” යනුවෙන් ඔහු පැවසුවා.
ධවල මන්දිර කාර්ය මණ්ඩල ලේකම් විල් ෂාර්ෆ් මේ සම්බන්ධයෙන් පැවසුවේ H1B සංක්‍රමණ නොවන වීසා වැඩසටහන රටේ වත්මන් සංක්‍රමණ ක්‍රමයේ ” අපයෝජනයට ලක් වූ වීසා” පද්ධතිවලින් එකක් බවයි.
“මෙම ප්‍රකාශයට අත්සන් තැබීමත් සමග සමාගම් H-1B අයදුම්කරුවන්ට අනුග්‍රහය දැක්වීම සඳහා ගෙවන ගාස්තුව ඩොලර් 100,000 දක්වා ඉහළ නංවනු ඇති.
ඇමරිකාවට ගෙන එන පුද්ගලයින් සැබවින්ම ඉතා ඉහළ කුසලතා ඇති බවත්, ඔවුන් ඇමරිකානු සේවකයින් විසින් පූරණය කළ නොහැකි පුද්ගලයින් බවත් සහතික කරනු ඇතැයි ට්‍රම්ප් ගේ අදහසයි.
H-1B වීසා යනු තාවකාලික එක්සත් ජනපද රැකියා වීසා බලපත්‍රයක් වන අතර එමඟින් සමාගම්වලට විශේෂිත කුසලතා ඇති විදේශීය වෘත්තිකයන් බඳවා ගැනීමට ඉඩ සලසනවා.
එය 1990 දී නිර්මාණය කරන ලද්දේ රැකියා පිරවීම දුෂ්කර යැයි සැලකෙන ක්ෂේත්‍රවල, විශේෂයෙන් විද්‍යාව, තාක්ෂණය, ඉංජිනේරු විද්‍යාව සහ ගණිතය යන ක්ෂේත්‍රවල උපාධියක් හෝ ඊට වැඩි පුද්ගලයින් සඳහායි.
වීසා බලපත්‍රය මුලින් වසර තුනක් සඳහා ප්‍රදානය කරනු ලැබෙන අතර, උපරිම වශයෙන් වසර හයක් දක්වා දීර්ඝ කිරීමේ හැකියාව පවතිනවා.
හරිත කාඩ්පතක් (ස්ථිර පදිංචිය) ලබාගත් අය සඳහා, වීසා බලපත්‍රය දින නියමයක් නොමැතිව අලුත් කළ හැකියි.
අයදුම් කිරීම සඳහා, අපේක්ෂකයින් එක්සත් ජනපද පුරවැසිභාවය සහ ආගමන සේවා (USCIS) සමඟ මාර්ගගතව ලියාපදිංචි වන අතර, ඉන් පසුව ලොතරැයි ක්‍රමයක් අහඹු ලෙස අයදුම්කරුවන් තෝරා ගනී.
කෙසේ වෙතත්, ට්‍රම්ප් පරිපාලනය අයදුම්පත් සලකා බලන ආකාරය පිළිබඳ තවදුරටත් වෙනස්කම් කිරා මැන බලමින් සිටින බව බ්ලූම්බර්ග් වාර්තා කරයි.