සුළි කුණාටුවෙන් සිදු වූ හානිවලට ප්‍රතිචාර වශයෙන් ශ්‍රී ලංකාවට හදිසි ආධාර
සුළි කුණාටුවෙන් ශ්‍රී ලංකාවට සිදු වූ දැවැන්ත හානිවලට ප්‍රතිචාර වශයෙන් ජපාන රජය, ජපාන ජාත්‍යන්තර සහයෝගිතා ඒජන්සිය (JICA) හරහා ශ්‍රී ලංකාවට තක්සේරු කණ්ඩායමක් එවීමට තීරණය කර තිබෙනවා.
JICA කාර්ය මණ්ඩලය සහ වෛද්‍ය නිලධාරීන් ඇතුළු සාමාජිකයින් 4 දෙනෙකුගෙන් සමන්විත මෙම කණ්ඩායම, භූමියේ වෛද්‍ය අවශ්‍යතා නිරීක්ෂණය කරනු ඇති අතර, සුළි කුණාටුවෙන් පසු ජපානය ආපදා තක්සේරු කණ්ඩායමක් ශ්‍රී ලංකාවට එවීම සම්බන්ධීකරණය කරනු ඇතැයි ජපාන තානාපති කාර්යාලය නිවේදනය කළා.
මෙම කණ්ඩායම අද (30) ජපානයෙන් ශ්‍රී ලංකාව බලා පිටත් වීමට නියමිතයි.
මේ අතර ජපාන රජය JICA හරහා විපතට පත් ජනතාවට කූඩාරම් සහ බ්ලැන්කට් ඇතුළු හදිසි සහන භාණ්ඩ ලබා දීමට ද තීරණය කර තිබෙනවා.
ජපානය තීරණය කර ඇත්තේ මානුෂීය දෘෂ්ටිකෝණය සහ ශ්‍රී ලංකාවේ ජනතාව සමඟ ඇති සමීප සම්බන්ධතාවය සැලකිල්ලට ගනිමින්, සුළි කුණාටුවෙන් පීඩාවට පත් වූවන්ට හදිසි ආධාර ලබා දීමටයි.
හානි පිළිබඳ දළ විශ්ලේෂණය ඊයේ(29) සවස 6 වන විට ජපාන තානාපති කාර්යාලය දක්වා ඇත්තේ මේ ආකාරයෙන්.
අඛණ්ඩව පවතින මෝසම් වැසි හේතුවෙන් ඇති වූ අයහපත් කාලගුණික තත්ත්වයන්ට අමතරව, නොවැම්බර් 27 වන දින දිට්වා සුළි කුණාටුව රටට බලපෑ අතරඑහි ප්‍රතිඵලයක් ලෙස පුද්ගලයින් 153 දෙනෙකු මිය ගිය අතර, ආසන්න වශයෙන් 770,000 ක් ජනතාව පීඩාවට පත්ව තිබෙනවා.