පාකිස්ථානය ඉතිහාසයේ වැඩිම අගයකින් තෙල් මිල නංවයි

ආර්ථික අර්බුද හමුවේ ජාත්‍යන්තර මූල්‍ය අරමුදලේ (IMF) සහාය බලාපොරොත්තු වන පාකිස්ථානය IMF කොන්දේසිවල පියවරක් ලෙස, ඉන්ධන මත ලබාදී ඇති සහනාධාර අඩු කිරීම සඳහා පියවර ගෙන තිබෙනවා.

ඒ අනුව සියලුම ඛනිජ තෙල් නිෂ්පාදන ලීටරයක මිල රුපියල් 30 කින් වැඩි කිරීමට නව ආණ්ඩුව කටයුතු කර ඇති බවයි විදෙස් මාධ්‍ය පවසන්නේ.

මෙය පාකිස්ථානයේ සියලුම ඛණිජ තෙල් නිෂ්පාදනවල මිල එකවර ඉහළ ගිය ඉහළම අගය බව එරට වාර්තා සඳහන් කරනවා.

ප්‍රවෘත්ති සාකච්ඡාවකදී අදහස් දක්වමින්එරට මුදල් අමාත්‍ය මිෆ්තා ඉස්මයිල්, සඳහන් කළේ පවතින තත්ත්වය මත රජයට තෙල් මිල වැඩි කිරීම හැර වෙනත් විකල්ප නොමැති බවයි.

රුපියල් 30 කින් මිල ඉහළ යාමත් සමග පාකිස්ථානයේ පෙට්‍රල් ලීටරයක මිල රුපියල් 179.86 දක්වාත්, සුපිරි ඩීසල් රුපියල් 174.15 දක්වාත්, භූමිතෙල් රුපියල් 155.56 දක්වාත් ඉහළ යනු ඇති බව මුදල් අමාත්‍යවරයා පැවසුවා.

කෙසේ වෙතත්, රජය තවදුරටත් සුපිරි ඩීසල් සඳහා ලීටරයකට රුපියල් 56.71 ක්, සැහැල්ලු ඩීසල් සඳහා රුපියල් 37.84 ක්, පෙට්‍රල් සඳහා රුපියල් 21.83 ක් සහ භූමිතෙල් සඳහා රුපියල් 17.02 ක් පමණ සහනාධාරයක් ගෙවනු ලබන බවත් ඔහු මෙහිදී අනාවරණය කළා.

මේ අතර එරට රජයේ ඉහළ නිලධාරියෙකු පවසා ඇත්තේ මීළඟ වාරිකය හැකි ඉක්මනින් නිකුත් කරන ලෙස IMF වෙත ඒත්තු ගැන්වීමේ පළමු පියවර ලෙස මෙලෙස ඉන්ධන මිල ඉහළ දැමු බවයි.