ග්‍රීන්ලන්තය සහ ඇන්ටාක්ටික් අයිස් තට්ටු දියවීම නිසා මුහුදු මට්ටම ශිඝ්‍රයෙන් ඉහළට

ලෝකයේ මිරිදිය අයිස් සියල්ලම පාහේ රඳවාගෙන සිටින ග්‍රීන්ලන්තය සහ ඇන්ටාක්ටික් අයිස් තට්ටු බිය උපදවන වේගයකින් දියවී යන බව ජාත්‍යන්තර විද්‍යාඥයින් කණ්ඩායමක් පෙන්වා දෙනවා.

පසුගිය වසර 30 තුළ පෘථිවි අයිස් තට්ටුවලට සැතපුම් 12 ක් උස අයිස් කැටයක් නිර්මාණය කිරීමට ප්‍රමාණවත් තරම් අයිස් අහිමි වී ඇති බව නව පර්යේෂණයකින් හෙළි වී තිබෙනවා.

1992 සිට 2020 දක්වා කාලය තුළ ඇන්ටාක්ටිකාවේ සහ ග්‍රීන්ලන්තයේ සිදු කරන ලද චන්ද්‍රිකා සමීක්ෂණ 50ක දත්ත ඒකාබද්ධ කරමින්, Ice Sheet Mass Balance Inter-comparison Exercise හෙවත් IMBIE හි විද්‍යාඥයින්, අයිස් තට්ටුවල පරිමාවේ සහ අයිස් ප්‍රවාහයේ වෙනස්කම් නිරීක්ෂණය කිරීමට සමත් වී තිබෙනවා.

පරිසර දූෂණයෙන් වාර්තාගත ලෙස ගෝලීය උෂ්ණත්වය ඉහළ යාම නිසා පසුගිය වසර 30 තුළ අයිස් තට්ටු දියවීම හය ගුණයකින් වැඩි වී ඇති බව ඔවුන් සඳහන් කරනවා.

සමස්තයක් වශයෙන්, 1992 සහ 2020 අතර ධ්‍රැවීය අයිස් තට්ටුවලට අයිස් ටොන් ට්‍රිලියන 8.3 කට වඩා අහිමි වී ඇති බවයි එම වාර්තාවේ වැඩිදුරටත් සඳහන් කරන්නේ.

වාර්තාවට අනුව, අයිස් අහිමි වීම සාගරවලට සැලකිය යුතු බලපෑමක් ඇති කරන අතර මුහුදු මට්ටම මිලිමීටර් 21 කින් ඉහළ යන අතර එය භයානක තත්ත්වයක් බවයි විද්‍යාඥයින් පෙන්වා දෙන්නේ.