මියන්මාරයේදී ප්‍රාණ ඇපයට ගත් එක් ලාංකිකයෙකු වෙනුවෙන් ත්‍රස්තයෝ ඩොලර් 8000ක් ඉල්ලයි (VIDEO)
මියන්මාරයේ පරිගණක අපරාධ කඳවුරක ප්‍රාණ ඇපකරුවන් වශයෙන් රඳවා ගෙන සිටින ශ්‍රී ලාංකිකයන් 56 දෙනා මුදා ගැනීම සඳහා ඔවුන් රඳවාගෙන සිටින ත්‍රස්තවාදී කණ්ඩායම සමග මියන්මාර රජයේ මැදිහත්වීමෙන් සාකච්ඡා අරඹා ඇති බව මියන්මාරයේ සිටින ශ්‍රී ලංකා තානාපති ජානක බණ්ඩාර මහතා පවසනවා.
දැනටමත් එම කඳවුරේ රඳවා ගෙන සිටි තවත් ශ්‍රී ලාංකිකයන් 32 දෙනකු මියන්මාර රජයේ මැදිහත් වීමෙන් පැවැති සාකච්ජාවලින් අනතුරුව නිදහස් කරගෙන ඇති බවයි ඔහු වැඩිදුරටත් සඳහන් කරන්නේ.
මියන්මාර නගරයක් වන ‘මයාවෙඩ්ඩි’ සිට කිලෝ මීටර් 25ක් පමණ දුරින් තිබෙන දුෂ්කර මාර්ගයක පිහිටි කැලයක ඉදි කර තිබෙන ත්‍රස්තවාදී කණ්ඩායමක් විසින් පාලනය කරනු ලබන පරිගණක අපරාධ කඳවුරේ ශ්‍රී ලාංකීය තරුණ පිරිසට අමතරව ඉන්දියාව, නේපාලය ඇතුළු ආසියාතික රටවලින් පැහැරගත් පිරිසක් ද රඳවාගෙන සිටින බව අනාවරණය වී තිබෙනවා
රැකියා සොයාගෙන තායිලන්තයට ගොස් සිටියදී ප්‍රාණ ඇපකරුවන් බවට පත්ව සිටින අදාළ ශ්‍රී ලාංකීය තරුණ පිරිස ත්‍රස්තවාදීන්ගේ ග්‍රහණයට හසු වී ඇති බවයි වාර්තා වන්නේ.
තොරතුරු තාක්ෂණ ක්ෂේත්‍රයට සම්බන්ධ රැකියා ලබා දීම සඳහා බව පවසමින් මෙම පිරිස තායිලන්තයට ගෙන්වාගෙන ඇති බවද සඳහන්.
රැකියා සඳහා ගිය මෙම පිරිස මියන්මාර -තායිලන්ත දේශසීමාවේ ක්‍රියාත්මක වන ත්‍රස්තවාදී කණ්ඩායමට හසු වීමෙන් පසු ඔවුන් දැඩි ලෙස අමානුෂීය ප්‍රහාරයකට මුහුණ පා ඇති බව මියන්මාර ආරංචි සඳහන් කරනවා.
එමෙන්ම මෙම ශ්‍රී ලාංකීය තරුණ පිරිස නිදහස් කිරීම සඳහා ත්‍රස්තවාදී කණ්ඩායම විසින් එක් අයකු වෙනුවෙන් ඇමරිකානු ඩොලර් 8000ක මුදලක් ඉල්ලා ඇති බවයි වැඩිදුරටත් වාර්තා වන්නේ.