පොසොන් උත්සවයට අද සිට විශේෂ බස් සේවාවක්
පොසොන් උත්සවයට සහභාගී වන ජනතාවගේ පහසුව සඳහා සුපුරුදු පරිදි ධාවනය වන බස්රථ කාල සටහන්වලට අමතරව අනුරාධපුරය, මිහින්තලය හා තන්තිරිමලය දක්වා අතිරේක බස්රථ 400 ක් පමණ යොදවා ඇති බව ශ්‍රී ලංකා ගමනාගමන මණ්ඩලයේ සභාපති ඉංජිනේරු ලලිත් ද අල්විස් මහතා පවසනවා
ඒ අනුව දිවයිනේ ප්‍රධාන නගර ආවරණය වන පරිදි අවශ්‍යතාවය අනුව බස්රථ යෙදවීමට ඩිපෝ කළමණාකාර මහත්වරුන්ට උපදෙස් ලබා දී ඇති බවයි ඔහු කියා සිටියේ
මෙම බස්රථ සේවාවන් අද (20) පස්වරුවේ සිට ආරම්භ වෙන අතර ලබන 24 වන දා පෙරවරුවෙන් අවසන් කිරීමටයි සැලසුම් කර ඇත්තේ
ශ්‍රී ලංකාව තුළ උත්සවාකාරයෙන් සමරන මෙවර පොසොන් උත්සවය අනුරාධපුර පූජනීය නගරය කේන්ද්‍ර කර ගනිමින් පැවැත්වෙන අතර ශ්‍රී ලංකා ගමනාගමන මණ්ඩලය මඟින් අනුරාධපුර, තන්තිරිමලේ, මිහින්තලය පූජනීය නගර කේන්ද්‍ර කර ගනිමින් විශේෂ ප්‍රවාහන සැලැස්මක් ක්‍රියාත්මක කිරීමට සැලසුම් කර තිබෙනවා
ඒ අනුව, මධ්‍යම බස්රථ කාර්යාලය, මහනුවර ප්‍රධාන බස් නැවතුම්පොලෙහි, කුරුණෑගල ප්‍රධාන බස් නවතුම්පොලෙහි සිට පැය 24 පුරා ආවරණය වන පරිදි අනුරාධපුරය දක්වා බස්රථ යෙදවීමට සැලසුම් කර ඇති අතර මහව, ගල්ගමුව, හොරොව්පතාන, කැබිතිගොල්ලෑව, මැදවච්චිය, කැකිරාව නගරවල සිට අඛණ්ඩව සේවාවක් අනුරාධපුරය හා මිහින්තලය ආවරණය වන පරිදි යොදවා ඇති බව සඳහන්
එමෙන්ම උතුරු දුම්රිය මාර්ගයෙහි දුම්රිය ධාවන කටයුතු මහව දුම්රිය ස්ථානයට පමණක් සිමා වන හෙයින් දුම්රියෙන් පැමිණෙන බැතුමතුන් වෙනුවෙන් ඔවුන්ගේ ගමන් පහසුකම් වෙනුවෙන් මහව දුම්රිය ස්ථානයේ සිට අනුරාධපුර නගරය දක්වා ශ්‍රී ලංගම බස්රථ සේවාවක් දුම්රිය කාල සටහන් අනුව ක්‍රියාත්මක කිරීමට සැලසුම් කර ඇති අතර ඒ සඳහා අවශ්‍ය බස්රථ මහව, ගල්ගමුව, හා වාරියපොළ, ශ්‍රී ලංගම ඩිපෝ මඟින් යෙදවීමට උපදෙස් ලබා දී තිබෙනවා
අදාළ බස්රථ සේවාවන් පිළිබඳ විස්තර 1958 දුරකථන අංකය ඇමතීමෙන් හෝ මධ්‍යම බස්රථ කාර්යාලයේ විමසීම් අංශයේ දුරකථන අංක 011-2328081 හෝ නියෝජ්‍ය සාමාන්‍යධිකාරී (ධාවන) ගේ දුරකථන අංක 077-1065032 ඇමතීමෙන් ලබා ගත හැකි වනවා
මීට අමතරව මාර්ග ගත ක්‍රමය ඔස්සේ https://sltb.eseat.lk/ යොමුව මඟීන් හෝ 1315 ක්ෂණික ඇමතුම් අංකය ඔස්සේ ද ආසන වෙන් කරවා ගැනීමේ පහසුකම් සපයා තිබෙන බව හෙතෙම වැඩිදුරටත් සඳහන් කළේ.