මීගොඩ ඝාතනයට තවත් තිදෙනෙකු අල්ලයි
මීගොඩ, නාගහවත්ත ප්‍රදේශයේදී මෝටර් රථයකින් ගමන් කරමින් සිටි පුද්ගලයෙකු වෙඩි තබා ඝාතනය කිරීමේ සිද්ධිය සම්බන්ධයෙන් තවත් සැකකරුවන් තිදෙනෙකු අත්අඩංගුවට ගෙන තිබෙනවා.
හෝමාගම හා මීගොඩ ප්‍රදේශවලදී අත්අඩංගුවට ගෙන ඇති මෙම සැකකරුවන් අවුරුදු 22,26 හා 38 යන වයස්වල පසුවන්නන් බවයි පොලිස් මාධ්‍ය කොට්ඨාසය සඳහන් කළේ.
අදාළ සිදුවීම සම්බන්ධයෙන් මීගොඩ පොලිස් ස්ථානය හා බස්නාහිර පළාත් දකුණ අපරාධ කොට්ඨාසය විසින් ක්‍රියාත්මක කරන ලද විමර්ශනවලට අදාළව මෙම සැකකරුවන් අත්අඩංගුවට ගෙන තිබෙනවා.
ඒ අනුව බස්නාහිර පළාත් දකුණ අපරාධ කොට්ඨාසයේ නිලධාරීන් කණ්ඩායමක් විසින් පසුගිය 19 වනදා මෙම සිද්ධිය සම්බන්ධයෙන් වෙඩික්කරු ලෙස කටයුතු කළ සැකකරුවෙකු හා එයට ආධාර අනුබල දුන් තවත් සැකකරුවෙකු අත්අඩංගුවට ගෙන තිබුණා.
එම සැකකරුවන්ගෙන් සිදුකරන ලද ප්‍රශ්න කිරීම් අනුව ලැබුණු තොරතුරු මත ඊයේ මෙම අනෙක් සැකකරුවන් තිදෙනා අත්අඩංගුවට ගෙන ඇති බව සඳහන්.
මොවුන්ගෙන් එක් අයෙකු මෙම අපරාධය සිදුකිරීමට වෙඩික්කරු සමග පැමිණි පුද්ගලයෙකු වන අතර අනෙක් පුද්ගලයින් දෙදෙනා අපරාධය සිදුකිරීමට ආධාර අනුබල දීම හා කුමන්ත්‍රණය කිරීම යන චෝදනා මත අත්අඩංගුවට ගෙන ඇති බවයි පොලිසිය සඳහන් කළේ.