මැණික් අපනයන ඇ.ඩො බිලියනයක් දක්වා වර්ධනය කර ගැනීමට අපේක්ෂාවක්

මෙම වසරේ මෙරට මැණික් අපනයනය ඩොලර් බිලියනයක් දක්වා වර්ධනය කරගැනීමට අපේක්ෂා කරන බව මැණික් හා ස්වර්ණාභරණ අධිකාරියේ සභාපති නවීන් සූරියආරච්චි මහතා පවසනවා

ඔහු මේ බව පැවසුවේ අද (04) රජයේ ප්‍රවෘත්ති දෙපාර්තමේන්තුවේ පැවති මාධ්‍ය හමුවකට එක්වෙමින්

දැනට මැණික් අපනයනය සිදුවන්නේ 90%ක් පමණ අවිධිමත් ආකාරයට බවද මේ වන විට පවත්නා ලොකුම අභියෝගය වනුයේ මැණික් අපනයනය විධිමත් අපනයනයක් බවට පත්කිරීම යැයිද ඔහු එහිදී සඳහන් කළා

මැණික් අපනයනය අවිධිමත් වීමට හේතු සොයා බලා ඒවා නිරාකරණය කරගැනීමට හැකි වුවහොත් මෙම මැණික් අපනයන විධිමත් කරගැනීමට හැකියි බවද සභාපතිවරයා කියා සිටියා.

එලෙස මැණික් අපනයනය විධිමත් කරගැනීමට හැකි වුවහොත් මෙම වසර අවසාන වන විට දැනට සිදුවන ඩොලර් මිලියන 360ක් වන අපනයන ඉක්මවමින් ඩොලර් බිලියනය දක්වා මැණික් අපනයනය වර්ධනය කරගැනීමට හැකිවනු ඇතැයිද ඔහු එහිදී කියා සිටියා

මෙම වසරේ නව වැඩසටහන් කිහිපයක් ක්‍රියාත්මක බවත්, ඒ අනුව මෙම වසරේදී එම තත්ත්වය ළඟාකර ගැනීමට හැකිවනු ඇතැයි අපේක්ෂා කරන බවද සභාපතිවරයා සඳහන් කළා