කෘෂි හා කර්මාන්ත අංශ එකතුවෙන් සමුපාකාර බැංකු පද්ධතියක් පිහිටුවීමට කොරියාවේ සහාය
කොරියානු ජනරජය හා ශ්‍රී ලංකාව අතර ආයෝජන අවස්ථා පුළුල් කර ගැනීම පිළිබඳව එරට තානාපතිනි Miyon LEE මහත්මිය හා කර්මාන්ත සහ ව්‍යවසායකත්ව සංවර්ධන අමාත්‍ය සුනිල් හඳුන්නෙත්ති මහතා අතර විශේෂ සාකච්ඡාවක් පවත්වා තිබෙනවා.
ඒ කර්මාන්ත සහ ව්‍යවසායකත්ව සංවර්ධන අමාත්‍යාංශයේදී.
මෙහිදී අමාත්‍යවරයා සුප්‍රසිද්ධ කොරියානු සන්නාමවලට ලංකාවේ ආයෝජනය සඳහා ආරාධනා කළ අතර එම ආයෝජකයන් සඳහා අවශ්‍ය සියලු පහසුකම් කර්මාන්ත අමාත්‍යාංශය ප්‍රමුඛ රජය විසින් ලබාදෙන බවට සහතික වී ඇති බව සඳහන්.
කොරියාවේ ඉතා සාර්ථකව ක්‍රියාත්මක කරන Corporate Bank System (සමුපාකාර බැංකු පද්ධතිය) ඇගයීමට ලක් කළ අමාත්‍යවරයා කෘෂි කර්මාන්තය හා නිෂ්පාදන කර්මාන්ත ඒකාබද්ධ කරගනිමින් එවැනි සමුපාකාර බැංකු පද්ධතියක් ලංකාවේ ස්ථාපිත කිරීමට කොරියානු ජනරජයේ සහාය ඉල්ලා සිටි බවයි වාර්තා වන්නේ.
එයට ඉතාම සුබවාදී ප්‍රතිචාර දක්වමින් කොරියානු ජනරජයේ තානාපතිනි Miyon LEE මහත්මිය සඳහන් කර සිටියේ තම රටේ ක්‍රියාත්මක කරන සමුපාකාර බැංකු පද්ධතිය කොරියානු ආර්ථිකය වර්තමානයේ පවතින ඉහළ මට්ටමට ළඟා වීමට සුවිශේෂි සහයක් ලබාදුන් බවත් ශ්‍රී ලංකාවේද එවැනි බැංකු පද්ධතියක් ස්ථාපිත කිරීම සඳහා අවශ්‍ය සහාය ලබාදෙන බවයි.
එසේම කොරියානු ජනරජයේ ඉලෙක්ට්‍රොනික උපාංග හා තොරතුරු තාක්ෂණික ආයෝජකයින් ශ්‍රී ලංකාවේ ආයෝජනය සඳහා රැගෙන ඒමට කැමැත්ත පළ කළ ඇය එම ක්ෂේත්‍රවලවල නිෂ්පාදන ලංකාව තුළ සිදුකර එම නිෂ්පාදන දකුණු ආසියානු වෙළඳපලට යැවීමේ අවස්ථාව පිළිබඳව ද අවධානය යොමු කර තිබෙනවා.