බස් රථවල ආසන පටි මිල ඉහළ දමන ජාවාරමක් (VIDEO)
අධිවේගී මාර්ගයේ ධාවනය කරන මගී බස් රථවල සියලු මගීන් ආසන පටි පැළැදීම අනිවාර්ය කිරීමේ තීරණයත් සමඟ වෙළඳපළේ මෙතෙක් රුපියල් 2000 කට පමණ අලෙවි වූ බඳ පටියක් රුපියල් 5000ත් 7000ත් අතර ගණනකට ඉහළ ගොස් තිබෙනවා.
ප්‍රවාහන අමාත්‍ය බිමල් රත්නායක මහතා පවසන්නේ පාරිභෝගික කටයුතු අධිකාරිය මේ පිළිබඳව පරීක්‍ෂා කර බැලිය යුතු බවයි.
අධිවේගී මාර්ගවල ධාවනය වන පෞද්ගලික වාහනවල පසුපස වාහනවල ගමන් ගන්නා මගීන්ද ආසන පටි පැළැඳවීම මේ වන විට අනිවාර්ය කර තිබෙනවා.
ඊට සමගාමීව සියලු බස් රථවල රියදුරන් ආසන බඳ පටි පැළදීම අනිවාර්ය කෙරුණා.
එහි ඊළඟ අදියර ලෙස අධිවේගී මාර්ගවල ධාවනය වන පොදු ප්‍රවාහන සේවා බස් රථවල සියලු මගීන්ද ආසන පටි පැළැඳවීම අනිවාර්ය කිරීමටයි තීරණය කර ඇත්තේ.
ඊට අදාළ ගැසට් නිවේදනය හෙට දිනයේ නිකුත් කරන බව පසුගියදා පාර්ලිමේන්තුවේදී පැවති ප්‍රවාහන ආමාත්‍යාංශයේ උපදේශ කාරක සභා රැස්වීමේදී අමාත්‍ය බිමල් රත්නායක මහතා පැවසුවා.
එහි ඊළඟ පියවර ලෙස අධිවේගී මාර්ගවල ගමන් ගන්නා පාසල් බස් රථ, කාර්යාල සේවාක ප්‍රවාහන බස් රථ හා විනෝද චාරිකා බස් රථ ඇතුළු අනෙකුත් බස් රථ සඳහාද ආසන පටි අනාවාර්ය කිරීමට තීරණය කර තිබෙනවා.
එම බස් රථවල හිමිකරුවන්ට ආසන පටි සවිකර ගැනීම සඳහා මාස 3ක කාලයක් ලබාදීමට නියමිතයි.
අනතුරුව සියලුම මාර්ගවල දුරගමන් බස් රථවලටද සියලු මගීන් සඳහා බඳ පටි නීතිය ක්‍රියාත්මකවීමට නියමිතයි.
මෙවන් පසුබිමක වෙළඳපොළේ රුපියල් 2000කට පමණ පැවති එක් ආසන පටියක් මේ වන විට රුපියල් 5000ත් 7000ත් අතර මිලක් දක්වා ඉහළ ගොස් ඇති බවයි පැවසෙන්නේ.
මේ පිළිබඳව පාරිභෝගික කටයුතු අධිකාරිය මැදිහත්ව වහා පරීක්‍ෂා කළ යුතු බව ප්‍රවාහන අමාත්‍ය බිමල් රත්නායක මහතා අමාත්‍යාංශ උපදේශක කාරක සභා රැස්වීමේදී පවසා තිබෙනවා.
මේ අතර අධිවේගී මාර්ගවලට ඇතුලු කරන වාහනවල තත්ත්වය පරීක්‍ෂා කර ලකුණුදීමේ ක්‍රමයක් ආරම්භ කිරීමටද සැලසුම් කර තිබෙනවා.
ප්‍රවාහන අමාත්‍ය බිමල් රත්නායක මහතා එම අමාත්‍යාංශයීය උපදේශ සභා රැස්වීමේදී අවධාරණය කර තිබෙන්නේ එහිදී වාහනවල ටයර් සම්බන්ධයෙන් වැඩි අවධානයක් යොමු කිරීමට නියමිත අතර ටයර් නිසි ප්‍රමිතියෙන් නොපවතින්නේ නම් එම වාහනවලට ඉදිරියේදී අධිවේගී මාර්ගයට ඇතුළුවීමට ඉඩ නොදෙන බවයි.