ඇමරිකා ව්‍යාපාරික චින්තන පර්ෂද නියෝජිතයින් ආයෝජන මණ්ඩලයේ සභාපති හමුවී සාකච්ඡාවක්
ඉහළ මට්ටමේ එක්සත් ජනපද ව්‍යාපාරික චින්තන පර්ෂද නියෝජිතයින්ගේ සංචාරයේදී ශ්‍රී ලංකාවේ ශක්තිමත් ආයෝජන ගමන් පථය BOI සභාපතිවරයා නැවත තහවුරු කරයි.
ප්‍රමුඛ පෙළේ ඇමරිකානු චින්තන පර්ෂද සහ පෞද්ගලික අංශයේ ව්‍යවසායන්හි ජ්‍යෙෂ්ඨ නියෝජිතයින්ගෙන් සමන්විත 23 දෙනෙකුගෙන් යුත් එක්සත් ජනපද දූත පිරිසක් ශ්‍රී ලංකා ආයෝජන මණ්ඩලයේ (BOI) සභාපති අර්ජුන හේරත් මහතා හමුවී සාකච්ඡාවක නිරත වුණා.
මෙම දූත පිරිසට හඩ්සන් ආයතනයේ, ඇමරිකානු ව්‍යවසාය ආයතනයේ ප්‍රමුඛ සාමාජිකයින් සහ තාක්‍ෂණ හා මානව ප්‍රාග්ධන සංවර්ධන අංශ නියෝජනය කරන විධායක නිලධාරීන් ඇතුළත්.
ශ්‍රී ලංකා ආයෝජන මණ්ඩල සභාපති හේරත් මහතාගේ ප්‍රධානත්වයෙන් පැවති ඉහළ මට්ටමේ රැස්වීමේදී, ශ්‍රී ලංකා රජයේ ජ්‍යෙෂ්ඨ නිලධාරීන් සහ හඩ්සන් ආයතනයේ මහාචාර්ය වෝල්ටර් රසල් මීඩ් මහතාගේ නායකත්වයෙන් යුත් කීර්තිමත් එක්සත් ජනපද දූත පිරිස එක්ව සිටියා.
ශ්‍රී ලංකා ආයෝජන මණ්ඩලය පැවසුවේ ආර්ථික සබඳතා ශක්තිමත් කිරීම, ආයෝජන අවස්ථා පුළුල් කිරීම සහ වේගයෙන් විකාශනය වන භූ දේශපාලනික භූ දර්ශනයක ශ්‍රී ලංකාවේ උපායමාර්ගික භූමිකාව කෙරෙහි සාකච්ඡා කේන්ද්‍රගත වූ බවයි.
ශ්‍රී ලංකාවේ ආර්ථික පරිවර්තනය, කලාපීය ස්ථානගත කිරීම සහ සංවර්ධන ප්‍රමුඛතා තේරුම් ගැනීමට උනන්දුවක් දක්වන එක්සත් ජනපදයේ ව්‍යාපාරික නායකයින්, ආයෝජකයින්, අන්තර්ගත සංවර්ධකයින් සහ ප්‍රතිපත්ති විශේෂඥයින් තම දූත පිරිසට ඇතුළත් වූ බව මහාචාර්ය මීඩ් පැහැදිලි කළා.
ආයෝජන වාතාවරණය, තාක්‍ෂණික භාවිතය සහ දේපළ වෙළඳාම් සංවර්ධනය ඇතුළු පුළුල් පරාසයක මාතෘකා පිළිබඳව නියෝජිත කණ්ඩායමේ සාමාජිකයින් ගතික සාකච්ඡාවක නිරත වී තිබෙනවා.
මෙම කරුණු ආමන්ත්‍රණය කරමින්, ආයෝජන මණ්ඩලයේ සභාපති අර්ජුන හේරත් මහතා දේශපාලන ස්ථාවරත්වය, විනිවිදභාවය සහ ආර්ථික ප්‍රතිසංස්කරණ සඳහා ශ්‍රී ලංකාවේ කැපවීම අවධාරණය කර තිබෙනවා.
“අපගේ රජය දැඩි ලෙස වෙළඳපොළ නැඹුරු වන අතර, මූල්‍ය විනය සහතික කිරීම, දූෂණය තුරන් කිරීම සහ යහපාලනය ප්‍රවර්ධනය කිරීම සඳහා ජාත්‍යන්තර මූල්‍ය අරමුදල සමඟ සමීපව කටයුතු කරනවා. ශ්‍රී ලංකාවේ ආර්ථික ගමන් පථය ශක්තිමත්, ඉදිරි දැක්මක් ඇති සහ ව්‍යාපාර සඳහා විවෘතයි.” යනුවෙන් මෙහිදී ආයෝජන මණ්ඩලයේ සභාපතිවරයා පවසා තිබෙනවා.
ඊට එක්වූ නිලධාරීන් සඳහන් කළේ “අපගේ බාහිර සබඳතාවලදී අපි මධ්‍යස්ථව සහ ස්වාධීනව සිටිමු, ඇමරිකා එක්සත් ජනපදය සමඟ අපගේ සබඳතා ඓතිහාසික හා කල් පවතින ඒවා වන අතර ඒවා බෙදාගත් ප්‍රජාතන්ත්‍රවාදී වටිනාකම් සහ ජනතාව අතර සම්බන්ධතා තුළ මුල් බැස තිබෙනවා.” යනුවෙනුයි.
ආයෝජන මණ්ඩලය ශ්‍රී ලංකාවේ ආයෝජකයින් සඳහා උපායමාර්ගික වාසි අවධාරණය කර තිබෙනවා.
ඉහළ උගත් සහ පුහුණු කළ හැකි, ඉංග්‍රීසි කතා කරන ශ්‍රම බලකායක්; නැගෙනහිර-බටහිර ප්‍රධාන නැව් මාර්ග ඔස්සේ උපාය මාර්ගික ස්ථානයක්; සහ සැපයුම්, පුනර්ජනනීය බලශක්තිය, තාක්ෂණය, ඖෂධ, ඛනිජ, ඇඟලුම්, සංචාරක සහ දේපළ වෙළඳාම් සංවර්ධනය වැනි ඉහළ වර්ධන අංශවල තරඟකාරී අවස්ථා පිළිබඳව මෙහිදී ශ්‍රී ලංකාව පර්ශ්වයෙන් ඇමරිකානු දූත පිරිසට පෙන්වා දී තිබුණා.
උපායමාර්ගික ආයෝජන තවදුරටත් පෝෂණය කිරීම සඳහා ඉදිරියට එන නියාමන ප්‍රතිසංස්කරණ මගින් සහාය දක්වන තාක්ෂණය, රෙදිපිළි සහ ඖෂධ සඳහා විශේෂිත ආර්ථික කලාප, නව ඩිජිටල් ආර්ථික මුලපිරීම් සහ වරාය සැපයුම් සහ කාර්මික යටිතල පහසුකම්වල පුළුල් වූ අවස්ථා ඇතුළු ඉදිරි මුලපිරීම් කිහිපයක් ද නිලධාරීන් විසින් එහිදී ගෙනහැර දක්වා තිබෙනවා.
