ගංවතුර මට්ටම ඉහළ යාම හේතුවෙන් කොටුගොඩ 220/132/33kV ග්‍රිඩ් උපපොළ තාවකාලිකව වසා දමයි
කොටුගොඩ ප්‍රදේශයේ ඇති වූ දැඩි ගංවතුර තත්ත්වය හේතුවෙන් කොටුගොඩ 220/132/33kV ග්‍රිඩ් උපපොළ තාවකාලිකව ක්‍රියා විරහිත කර ඇති බව ලංකා විදුලිබල මණ්ඩලය (CEB) මහජනතාවට දැනුම් දෙනවා.
අඛණ්ඩ අධික වර්ෂාපතනය හේතුවෙන් අවට ගංවතුර ජලය වේගයෙන් ඉහළ ගොස් ඇති අතර, එහි ප්‍රතිඵලයක් ලෙස මුළු උපපොළ පරිශ්‍රයම ජලයෙන් යට වී තිබෙනවා.
ඊයේ සවස (29 වන සෙනසුරාදා) වන විට ජල මට්ටම පාලක පැනල මට්ටමට ළඟා වී තිබූ බව ලංකා විදුලි බල මණ්ඩලය පැවසුවා.
තත්ත්වය දැන් ආරක්ෂිත මෙහෙයුම් සීමාවන් ඉක්මවා ගොස් ඇති බැවින්, CEB ආරක්ෂිතව කොටුගොඩ ග්‍රිඩ් උපපොළ විසන්ධි කර තිබෙනවා.
ලංකා විදුලි බල මණ්ඩලය පවසන්නේ මෙම තීරණය ගනු ලැබුවේ මහජන ආරක්ෂාව, ස්ථානයේ සේවකයින්ගේ ආරක්ෂාව සහ තීරණාත්මක විදුලි යටිතල පහසුකම් ආරක්ෂා කිරීම සඳහා බවයි.
ලංකා විදුලිබල මණ්ඩලයේ කණ්ඩායම් තත්ත්වය සමීපව නිරීක්ෂණය කරමින් සිටින අතර, ජල මට්ටම අඩු වූ වහාම සහ උපපොළ ක්‍රියාත්මක වීමට ආරක්ෂිත බව තහවුරු කළ වහාම විදුලිය යථා තත්ත්වයට පත් කිරීම ආරම්භ කරනු ඇති.
මෙම හදිසි අවස්ථාව තුළ මහජනතාවගේ අවබෝධය සහ සහයෝගය අගය කරන අතර, සිදුවන ඕනෑම අපහසුතාවයක් පිළිබඳව ලංවිම අවංකවම කණගාටුව පළ කරනවා.