මනුසත්කම බෙදාගන්න – හිතවත්කම රැගෙන ඔබ එන්න ‘ස්වර්ණ ශ්‍රී සහන සත්කාරය’ (VIDEO)
රටක් පිඩාවට පත්කළ අයහපත් කාලගුණ තත්ත්වයෙන් අවතැන් වූ ජනතාවට පිසූ ආහාර සෞඛ්‍යාරක්ෂිතව ලබාදෙන වැඩපිළිවෙළක් ‘ස්වර්ණ ශ්‍රී සහන සත්කාර’ වැඩසටහනෙන් ස්වර්ණවාහිනී මාධ්‍යජාලය ආරම්භ කළා.
ඒ අනුව මේ ක්‍රියාන්විතය සඳහා ද්‍රව්‍යමය ආධාර පමණක් නොව ශ්‍රම දායකත්වයද ලබාදීමේ අවස්ථාව ද හිමිවනවා.
මහ වැසි, නාය යෑම් හා ජල ගැලීම් හේතුවෙන් අපේ රටේ සෑම දිස්ත්‍රික්කයකම ජනතාව පත්ව ඇත්තේ දැඩි දුෂ්කරතාවකටයි.
වෙනදාට රටේ එක් කොටසක් පීඩාවට පත්වද්දී රටේ වැඩි කොටසක් ඔවුන්ට උපකාර කිරීමට හැකි මට්ට්මේ සිටියද මෙවර තත්ත්වය ඊට හාත්පසින්ම වෙනස්.
මුළු රටක්ම මේ වන විට පීඩාවට පත්ව අවසන්.
ඒ අතරින් ඇතැමෙකුට ඉතිරිව ඇත්තේ ඇඳිවත පමණයි.
අසරණවූ මේ අපේම ජනතාව වෙනුවෙන් උපකාර වන්නට ස්වර්ණවාහිනී මාධ්‍ය ජාලය ‘ස්වර්ණ ශ්‍රී සහන සත්කාරය’ ආරම්භ කළේ කවදත් ජනතාවාදී මාධ්‍ය මෙහෙවරක නියැලෙන්නන් ලෙසයි.
ඒ වැඩපිළවෙළේ තවත් පියවරක් ඉදිරියට තබමින් විපතට පත්වූවන් වෙත පිසූ ආහාරලබාදීමට අප කටයුතු කළේ ඔවුන්ට මේ මොහොතේ එය අත්‍යවශ්‍යම බව පසක් වූ නිසයි.
ඒ අනුව ඔරුගොඩවත්ත, ඔරියන්සිටිහි පිහිටි ස්වර්ණවාහිනී මූලස්ථාන පරිශ්‍රයේ විපතට පත් අපේම ජනතාව වෙනුවෙන් ආහාර පිසීමට ඊයේ සවස සිටම කටයුතු ආරම්භ කළේ මෙලෙසයි.
ඒ අනුව ස්වර්ණවාහිනී ප්‍රජා මුළුතැන් ගෙයි පිසූ ආහාර විපතට පත්වූවන් වෙත යුහුසුළුව රැගෙන යාමට ඊයේ රාත්‍රියේම කටයුතු කළා.
අපේම ජනතාවගේ හදගිනි නිවන ‘ස්වර්ණ ශ්‍රී සහන සත්කාරය’ ප්‍රජා මුළුතැන් ගෙය සඳහා සහල්, පරිප්පු, මිරිස්, තුනපහ ඇතුළු කුළුබඩු මෙන්ම සේයාමීට්, ලූණු, කරවල, බිත්තර, පිටිකල පොල්කිරි, පැකට් ආදිය රැගෙන අප වෙත පැමිණ ඔබට ද සහය විය හැකියි.
එම ද්‍රව්‍යමය පරිත්‍යාගයන්ට අමතරව අපේම සහෝදර ජනතාවගේ කුසගිනි නිවාලන මේ මහඟු මෙහෙවරට ඔබට ශ්‍රමයෙන්ද දායක වියහැකියි.
ඒ අනුව අද පෙරවරුවේ සිට ස්වර්ණවාහිනී ප්‍රධාන කාර්යාලයේ ක්‍රියාත්මක ප්‍රජා මුළුතැන් ගෙය සඳහා බොහෝ පිරිසක් අප සමඟ එක්වූයේ මෙලෙසයි.
ඊට අමතරව වියළි ආහාර, පානීය ජල බෝතල්, ඇඳුම්, සනීපාරක්ෂක ද්‍රව්‍ය සහ ඖෂධ වර්ග ගෙනැවිත් බාරදීම සඳහා අප දෙමටගොඩ කාර්යාලය මෙන්ම වැල්ලවත්ත සැවෝයි සිනමා ශාලාවද විවෘතයි.
හෙට්ටිවීදිය, බම්බලපිටිය, කිරිබත්ගොඩ, වත්තල, මීගමුව, නුගේගොඩ, මහරගම. කලුතර, ගාල්ල හා මාතර පිහිටි ස්වර්ණමහල් ශාඛා වෙත ද ඔබට පරිත්‍යාග ලබාදීමේ හැකියාව පවතිනවා.
පැය 24 පුරා ක්‍රියාත්මක ‘ස්වර්ණ ශ්‍රී සහන සත්කාරය’ට දායක වී අපේම සහෝදර ජනතාවට ශක්තියක් වන්නට අපත් සමඟ ඔබත් එක්වන්න.
මේ අසීරු මොහොතේ මනුසත්කම් බෙදා ගන්න හිතවත්කම රැගෙන ඔබත් එන්න.
