දුම්රිය ධාවනය අදත් සීමා කරයි – දුම්රිය මාර්ග රැසක් තවම ධාවනයට සුදුසු තත්ත්වයක නෑ
අදත් දුම්රිය ගමන්වාර කිහිපයක් පමණක් ක්‍රියාත්මක කරන බව දුම්රිය දෙපර්තමේන්තුව පවසනවා.
එම දෙපාර්තමේන්තුව පවසන්නේ මුහුදුබඩ දුම්රිය මාර්ගයේ බෙලි අත්ත දක්වා දුම්රියක් ධාවනය වන බවයි.
පුත්තලම මාර්ගයේ මීගමුව දක්වාත්, කැලණි වැලි මාර්ගයේ පාදුක්ක දක්වාත් දුම්රිය ගමන්වාර කිහිපයක් ධාවනය වන බව දුම්රිය දෙපාර්තමේන්තුව පැවසුවා.
ප්‍රධාන දුම්රිය මාර්ගයේ තවදුරටත් ගම්පහ – වේයන්ගොඩ සහ බුජ්ගමුව ප්‍රදේශවලින් ගිලා බැසීම් සහ ජලයෙන් යටවීම නිසා තවදුරටත් එම ප්‍රදේශ ඔස්සේ දුම් රිය ධාවනය නොවන බව එම දෙපාර්තමේන්තුව සඳහන් කළා.
අද පෙරවරුවේ සිදු කරන දුම්රිය මාර්ග පරීක්ෂාවෙන් පසුව හෙට දිනයේ වේයන්ගොඩ දක්වා හෝ දුම්රියක් ධාවනය කරවීමට තීරණය කරන බව දුම්රිය දෙපාර්තමේන්තු පාලනාධිකාර‍ය පැවසුවා.
උඩරට දුම්රිය මාර්ගයේ රඹුක්කනින් ඉහළට සහ පොල්ගහවෙල සිට බදුල්ල දක්වාත් , පුත්තලම මාර්ගයේ මීගමුව සිට පුත්තලම දක්වාත් දුම් රිය ධාවනයට තවමත් හැකියාවක් නැහැ.
එමෙන්ම කැලණි වැලි දුම්රිය මාර්ගයේ පාදුක්ක සිට අවිස්සාවේල්ල දක්වාත් , උතුරු දුම්රිය මාර්ගයේ පොල්ගහවෙල සිට කන්කසන්තුරේ දක්වාත්, මඩකලපුව – පොල්ගහවෙල සිට කන්කසන්තුරය දක්වාත් දැනට දුම්රිය ධාවනය සිදු කිරීමට හැකියාවක් නොමැති බව දුම්රිය දෙපාර්තමේන්තුව පැවසුවා.