සුමති ටෙලි සම්මාන උළෙලේ දී ‘ස්වර්ණවාහිනිය’ සම්මාන රැසකින් පිදුම් ලැබූ වගයි
ඊයේ (26) බත්තරමුල්ල වෝටර්ස් එජ් හි පැවැත්වූ ‘සුමති ටෙලි සම්මාන උළෙලේදී ‘ ස්වර්ණවාහිනිය සම්මාන රැසකින් පිදුම් ලැබුවා.
මෙරට ටෙලි නාට්‍ය වංශකතාව තුළ හැරවුම් ලක්ෂ්‍යයක් සනිටුහන් කරමින් ඉතා කෙටි කාලයක් තුළ ඉමහත් ප්‍රේක්ෂක ආදරයක් දිනාගත් ‘නාඩගම්කාරයෝ’ ටෙලිනාට්‍යයේ, සරාගේ චරිතයට පණ පොවන ‘සජිත අනුත්තර ඇන්තනී’ වසරේ ජනප්‍රියම නළුවාට හිමි සම්මානය එහිදී දිනා ගනු ලැබුවා.
එමෙන්ම ‘නාඩගම්කාරයෝ’ ශ්‍රී ලාංකික ප්‍රේක්ෂක ජනතාවගේ ඉහළම ආදරය සහ අවදානය දිනූ ටෙලිනාට්‍ය බවට නැවත වරක් පසක් කරමින් එහි පාඨලීගේ චරිතයට පණ පොවන ‘සෙනාලි ෆොන්සේකා’ වසරේ ජනප්‍රියම නිළියට හිමි සම්මානයෙන් පිදුම් ලැබුවා.
මෙවර සම්මාන උළෙලේ හොඳම කලා අධ්‍යක්ෂණයට හිමි සම්මානය දිනා ගත්තේ ස්වර්ණවාහිනියෙන් විකාශය වූ ”රන් බැඳි මිනිස්සු” ටෙලි නාට්‍යයේ කලා අධ්‍යක්ෂණය කළ පියතිස්ස අකුරන්ගොඩයි.
හොඳම රූපවාහිනී ගවේෂණශීලි වාර්තාකරණය දෙවන ස්ථානය හිමි කර ගැනීමට ස්වර්ණවාහිනී ප්‍රවෘත්ති අංශයේ ප්‍රවෘත්ති සංස්කාරක ප්‍රසාද් රූපසිංහ සමත් වූ අතර හොඳම ප්‍රවෘත්ති නිවේදක තෙවන ස්ථානයට හිමි සම්මානය මෙවර දිනාගත්තේ ස්වර්ණවාහිනී විධායක ප්‍රවෘත්ති නිවේදිකා චවිකා ගුණසේකරයි.