අක්කර 5ට අඩු පොල්වතු හිමියන්ට සහන මිලට පොල් පොහොර
අස්වැන්න වැඩි කරන්න අක්කර 5ට අඩු පොල්වතු හිමියන්ට සහන මිලට පොල් පොහොර ලබා දීම මෙම මස අගදි සිදු කිරිමට නියමිතව තිබෙනවා
වැවිලි හා ප්‍රජා යටිතල පහසුකම් අමාත්‍ය සමන්ත විද්‍යාරත්න මහතා මේ බව කියා සිටියේ වැවිලි සහ ප්‍රජා යටිතල පහසුකම් අමාත්‍යාංශීය උපදේශන කාරක සභාව අමාත්‍යවරයාගේ සභාපතිත්වයෙන් ඊයේ(05) පාර්ලිමේන්තුවේදී රැස්වූ අවස්ථාවේයි
ඒ අනුව වෙළඳපළ රුපියල් 9500 ක් වන කිලෝ ග්‍රෑම් 50ක පොහොර මිටිය රුපියල් 4000ක් වැනි සහන මිලකට ලබා දෙන බවයි වැවිලි හා ප්‍රජා යටිතල පහසුකම් අමාත්‍ය සමන්ත විද්‍යාරත්න මහතා පැවසුවේ
රුසියාවෙන් පරිත්‍යාගයක් ලෙස ලැබුණු පොහොර මේට්‍රික් ටොන් 27,500ක් යොදා ගනිමින් එයට එප්පාවල රොක් පොස්පේට් සහ යූරියා කවලම් කර පොල් සඳහා වු විශේෂිත පොහොර මෙට්‍රික් ටොන් 56,000ක් සකස් කිරීම පොහොර සංස්ථාව මේ වනවිට සිදු කෙරෙන බවත් අක්කර 5ට අඩු පොල් වගා වගාකරුවන්ට සහන මිලකට එම පොහොර ලබාදීම සිදුකරන බවත් අමාත්‍යවරයා සඳහන් කළා
එමෙන්ම මෙරට පොල් වගාව දියුණු කිරීමේ අරමුණින් බීජ පොල් මිලියන 2.5ක් මෙම වර්ෂය සඳහා නිෂ්පාදනය කරන බවත් පැවසූ අමාත්‍යවරයා මෙම වසර තුළ අක්කර 36,000ක් තුළ අලුතින් පොල් වගාව සිදුකිරීමට සැලසුම් කර ඇති බවත් ඉන් අක්කර 16,000ක් උතුරු පොල් ත්‍රිකෝණයටත් ඉතුරු 20,000 අනෙකුත් ප්‍රදේශවලට අයත් වන බවත් පැවසුවා