අගමැති දිනේෂ් හමුවූ ඉන්දීය විදේශ ඇමති
ඉන්දීය විදේශ කටයුතු අමාත්‍ය ආචාර්ය එස්. ජයශංකර් මහතා සහ අග්‍රාමාත්‍ය දිනේෂ් ගුණවර්ධන මහතා අතර හමුවක් සිදුව තිබෙනවා.
ඒ, අද (20) අරලියගහ මන්දිරයේදීයි.
එහිදී භාරතීය ජනතා පක්ෂයේ නායකත්වයෙන් යුත් ජාතික ප්‍රජාතන්ත්‍රවාදී සන්ධානයේ මැතිවරණ ජයග්‍රහණය පිළිබඳව අග්‍රාමාත්‍යවරයා විසින් ඉන්දීය විදේශ අමාත්‍යවරයා වෙත සුබ පැතූ අතර සමීප ද්විපාර්ශ්වික සබඳතා තවදුරටත් ශක්තිමත් කිරීම සඳහා එක්ව කටයුතු කිරීමට ශ්‍රී ලංකාවේ කැපවීම සහතික කර තිබෙනවා.
එමෙන්ම කොවිඩ් වසංගතයෙන් සහ ආර්ථික අර්බුදයෙන් පසු මෑත දුෂ්කර කාලවලදී ලබාදුන් සහාය වෙනුවෙන් අග්‍රාමාත්‍යවරයා ඉන්දියාවට ස්තූතිය පළ කර ඇති බව සඳහන්.
එහිදී අදහස් දක්වමින් ඉන්දීය විදේශ අමාත්‍යවරයා ප්‍රකාශ කර ඇත්තේ ශ්‍රී ලංකාව වැනි අසල්වැසියන් ඉන්දියාවට අතිශයින් වැදගත් වන අතර ඉන්දියාව තුළ ශ්‍රී ලංකාව කෙරෙහි ඉමහත් හොඳ හිතක් පවතින බවයි.
ඉන්දීය රජය ‟අසල්වැසියා පළමුව″ යන ප්‍රතිපත්තිය යළි තහවුරු කරන බවත්, තම සංචාරයේ ප්‍රධාන අරමුණ ශ්‍රී ලංකාව සිය සමීපතම සමුද්‍රීය අසල්වැසියා සහ මිතුරා ලෙස ඉන්දියාවේ අඛණ්ඩව කැපවීම අවධාරණය කිරීම බවත් ඉන්දීය විදේශ කටයුතු අමාත්‍යවරයා අවධාරණය කර තිබෙනවා.
අග්‍රාමාත්‍යවරයා සහ ඉන්දීය අමාත්‍යවරයා මෙරට ඉන්දීය ආයෝජන, සංවර්ධන ව්‍යාපෘති, සම්බන්ධතා ව්‍යාපෘති සහ විවිධ ක්ෂේත්‍රවල අන්‍යෝන්‍ය වශයෙන් වාසිදායක සහයෝගීතාව පිළිබඳව අදාළ හමුවේදී සාකච්ඡා වී ඇති බව සඳහන්.