ගණේමුල්ල සංජීව ඝාතන කිරීමේ සිද්ධියේ සැකකරුවන් පිළිබඳව කොළඹ අපරාධ කොට්ඨාසයෙන් වැඩිදුර වර්තාවක්

ගණේමුල්ල සංජීව ඝාතන කිරීමේ සිද්ධියට අදාලව ආධාර අනුබල ලබා දුන් බව කියන විසි පස්වන සහ තිස් පස්වන සැකකරුගෙන් ප්‍රකාශ ලබා ගැනීමට පියවර ගන්නා ලෙස කොළඹ ප්‍රධාන මහේස්ත්‍රාත් අසංග එස්.බෝදරගම ඊයේ (21) දැනුම් දුන්නා.

කොළඹ අපරාධ කොට්ඨාසය සිද්ධියට අදාලව වැඩිදුර බී වාර්තාවක් අධිකරණයට ඉදිරිපත් කරමින් සිද්ධියට අදාල එම සැකකරුවන් දෙදෙනාගේ ප්‍රකාශ විමර්ශන කටයුතුවලට අවශ්‍ය බව පවසා සිටි අවස්ථාවේදී එලෙස නියෝග කළා .

නඩුව කැඳ වූ අවස්ථාවේදී සිද්ධිය සම්බන්ධව රක්ෂිත බන්ධනාගාරගතව සිටි සැකකරුවන් 5 දෙනෙකු බූස්ස බන්ධානාගරය මඟින් ස්කයිප් තාක්ෂණය ඔස්සේ අධිකරණයට ඉදිරිපත් කිරීමට කටයුතු කළා.

පහළොස්වන සැකකාර ඉෂාරා සෙව්වන්දි හට පලා යාමට අධාර අනුබල දීම මත රක්ෂිත බන්ධනාගාර ගත කළ සැකකරුවන් 3 ක් සහ සැකකාරියන් 2ක් බන්ධනාගාර නිළධාරින් විසින් විවෘත අධිකරණයට ඉදිරිපත් කළා.

සිද්ධියට අදාළව එම ප්‍රධානපෙළේ සැකකරුවන් 9 දෙනා සහ 28 වන සැකකරු සිට 36 සැකකරු දක්වා නම් කරන බව කොළඹ අපරාධ කොට්ඨාශය අධිකරණයට දැනුම් දුන්නා.

විමර්ශන නිලධාරීන් අධිකරණයට කරුණු දක්වමින් පැවසුවේ එම නම් කරන ලද සංවිධානත්මක සැකකරුවන් 9 දෙනා අතරින් සිව්දෙනෙකු අපරාධ පරික්ෂණ දෙපාර්තමේන්තුවේ සහ කොළඹ අපරාධ කොට්ඨාශයේ රඳවා තබාගෙන ප්‍රශ්න කරන බවයි.

අනෙක් නම් කරන ලද සැකකරුවන් සිව්දෙනා අත්අඩංගුට ගෙන අධිකරණට ඉදිරිපත් කිරීමට ද කටයුතු කරන බව විමර්ශන නිළධාරින් අධිකරණයට දන්වා සිටියා.

විමර්ශන නිලධාරීන් අධිකරණයට දැනුම් දුන්නේ සිද්ධියට අදාලව නම් කරන ලද 35 වැනි සැකකරු පෑලියගොඩ අපරාධ කොට්ඨාශය මගින් සිදු කරන ලද වෙනත් නඩුවකට අදාළව රක්ෂිත බන්ධනාගාරගත කර සිටින බවයි.

එම සැකකරු මීළඟ නඩු දිනයේදී අධිකරණයට ඉදිරිපත් කරන ලෙසද මහේස්ත්‍රාත්වරයා එහිදී කරුණු දැක්වුවා.

දැනට සිද්ධියට අදාල 18 වන සහ 21 වන සැකකරු පෑලියගොඩ අපරාධ කොට්ඨාශයේ සහ අපරාධ පරීක්‍ෂණ දෙපාර්තමේන්තුවේ රැඳවුම් නියෝග මත සිටින බවට වර්තාවක් ද විමර්ශන නිලධාරීන් ඊයේ (21) අධිකරණයට ඉදිරිපත් කළා.

මෙම සිද්ධියට අදාලව අනෙක් සැකකරුවන් පිළිබඳව කොටුව මහෙස්ත්‍රාත් අධිකරණයට සහ අලුත් කඩේ අංක 8 අතිරේක මහෙස්ත්‍රාත් අධිකරණයට කරුණු වර්තා කර තිබෙන බවද විමර්ශන නිලධාරීන් අධිකරණය හමුවේ පැවසුවා.

මෙම සිද්ධියට අදාළව රක්ෂිතබන්ධනාගාරගතව සිටින සැකකරුවන්ට එරෙහිව ඇති අපරාධ චෝදනා සම්බන්ධයෙන් වෙන් වෙන්ව අධිකරණයයට වර්තාවක් ඉදිරිපත් කරන ලෙස අධිකරණයෙන් කරන ලද නියෝගයට අනුව කොළඹ අපරාධ කොට්ඨාසය එම වර්තා ඉදිරිපත් කර තිබුණා.

සිද්ධියට අදාලව සැකකරුවන් වෙනුවෙන් අධිකරණයේ පෙනී සිටි නීතිඥවරුන් සඳහන් කර සිටියේ, ඉෂාරා සෙව්වන්දිට නවාතැන් පහසුකම් ලබා දුන් බව කියන පිරිසට ඇප ලබාදෙන ලෙසයි.

එම සැකකරුවන් ඝාතනය සිදුකිරීම සම්බන්ධයෙන් කිසිදු චෝදනාවකට අයත් නොවන බව නීතිඥවරුන් සඳහන් කර සිටි අතර කොළඹ අපරාධ කොට්ඨාශය 190 වගන්තිය යනුවෙන් අලුත් නීති සාදා මෙම සැකකරුවන් රක්ෂිත බන්ධනගත කරන බවට නිතිඥවරුන් පැවසුවා.

ඉදිරිපත් වූ කරුණු සලකා බැලූ මහේස්ත්‍රාත්වරයා ඇප ලබාදීම සම්බන්ධයෙන් සාක්ෂි සම්පීඩන වාර්තා සලකා බලා මීලඟ නඩු දිනයේදී ඇප ලබාදීමේ ඉල්ලීම පිළිබඳ සලකා බලන බව අධිකරණයට දන්වා සිටියා.

සිද්ධියට අදාළව කරුණු සලකා බැලූ මහේස්ත්‍රාත්වරයා විමර්ශනයේ ප්‍රගතිය දෙසැම්බර් 5 කැඳවන ලෙස නියෝග කරමින් සැකකරුවන් රක්ෂිත එදින තෙක් යළි රක්ෂිත බන්ධනාගාරගත කිරීමට නියෝග කළා.