ගාසා තීරයේ සටන් විරාමයක් වෙනුවෙන් එක්සත් ජාතීන්ගේ ආරක්ෂක මණ්ඩලය අද රැස්වෙයි
ගාසා තීරයේ වහාම සටන් විරාමයක් ඉල්ලා සිටිය යුතුද නැද්ද යන්න පිළිබඳව ඡන්දය ප්‍රකාශ කිරීම සඳහා එක්සත් ජාතීන්ගේ ආරක්ෂක මණ්ඩලය අද (08) රැස්වීමට නියමිත බව විදෙස් මාධ්‍ය පවසනවා .
මෙය සිදු වන්නේ මහලේකම් Antonio Guterres විසින් එක්සත් ජාතීන්ගේ ප්‍රඥප්තියේ 99 වැනි වගන්තිය ඉල්ලා සිටීමේ දුර්ලභ පියවර ගැනීමෙන් පසුවයි
මේ හේතුවෙන් “ජාත්‍යන්තර සාමය සහ ආරක්ෂාව පවත්වා ගැනීමට තර්ජනයක් විය හැකි ඕනෑම කරුණක්” කවුන්සිලයේ අවධානයට යොමු කිරීමට මහලේකම්වරයාට ඉඩ සලසන බවයි පැවසෙන්නේ
බදාදා දිනයේ කවුන්සිලයට ලිපියක් යවමින් Antonio Guterres පැවසුවේ ඊශ්‍රායලයේ සහ ගාසා තීරයේ තත්ත්වය ජාත්‍යන්තර සාමය සහ ආරක්ෂාව පවත්වාගෙන යාම සඳහා පවතින තර්ජන උග්‍ර කළ හැකි බවයි.
කවුන්සිලයේ සාමාජිකයන් අතර සමගිය සෙවීමේ පස්වන උත්සාහය මෙය වනු ඇති අතර යුද්ධය ආරම්භ වූ දා සිට මීට පෙර ඉදිරිපත් කළ කෙටුම්පත් යෝජනා හතරක් සභාව විසින් ප්‍රතික්ෂේප කළ බවද විදෙස් මාධ්‍ය පවසනවා