තවත් අයිස් නිෂ්පාදනය කළ නිවාඩු නිකේතනයක් වටලයි
කළුතර අපරාධ කොට්ඨාසය මඟින් රැඳවුම් නියෝග ලබාගෙන ප්‍රශ්න කරමින් සිටින ‘ඇඹිලිපිටියේ සුරංග’ නැමැති අපරාධකරුගෙන් ලද තොරතුරු මත අයිස් මත්ද්‍රව්‍ය නිෂ්පාදනය කළ බවට සැකකෙරෙන හම්බන්තොට ප්‍රදේශයේ නිවාඩු නිකේතනයක් වටලා තිබෙනවා.
පොලිසිය සඳහන් කළේ, එහි තිබී අයිස් මත්ද්‍රව්‍ය නිෂ්පාදනයට යොදාගත් බවට සැක කෙරෙන උපකරණ සහ රසායනික ද්‍රව්‍ය මෙන්ම අයිස් මත්ද්‍රව්‍ය ප්‍රවාහනය කළ බවට සැක මෝටර් රථයක් සොයාගත් බවයි.
අදාළ මෝටර් රථය දැනට විදේශගතව සිටින සංවිධානාත්මක අපරාධ කල්ලි සාමාජිකයකුගේ නමට ලියාපදිංචි කර ඇති බව අනාවරණය වී ඇත්තේ.
ඒ අනුව පානදුර, අරුක්ගොඩ ප්‍රදේශයේ දී වයස අවුරුදු 21ක පුද්ගලයෙක් අත්අඩංගුවට ගෙන සිදුකළ ප්‍රශ්න කිරීම්වල දී හම්බන්තොට, මයුරපුර ප්‍රදේශයේ පිහිටි නිවාඩු නිකේතනයක් පරීක්ෂා කිරීමට පොලිසිය කටයුතු කර තිබෙනවා.
එම නිවාඩු නිකේතනයේ තිබී අයිස් මත්ද්‍රව්‍ය නිපදවීමට යොදාගත් බවට සැක කෙරෙන රසායනික ද්‍රව්‍ය ලීටර් 4ක කෑන් 13ක් සහ අයිස් මත්ද්‍රව්‍ය සෑදීමට යොදාගත් බවට සැකකරන තවත් උපකරණ රැසක් ද කළුතර අපරාධ කොට්ඨාසය විසින් සොයාගෙන තිබෙනවා.
මේ අතර අදාළ නිවාඩු නිකේතනය තුළ ඉරාන ජාතිකයින් කිහිපදෙනෙකු සහ මෙරට පුද්ගලයින් කිහිපදෙනෙකු එක්ව මෙම අයිස් නිෂ්පාදනය කර ඇති බව වාර්තා වෙයි.
කෙසේ වෙතත් මෙම අයිස් මත්ද්‍රව්‍ය නිෂ්පාදනයට සම්බන්ධ වූ අනිත් සැකකරුවන් සොයා කළුතර අපරාධ කොට්ඨාසය ඉදිරි විමර්ශන කටයුතු ක්‍රියාත්මක කරයි.
මේ අතර අත්අඩංගුවට ගත් 21 හැවිරිදි සැකකරු අද (15) දින පානදුර මහේස්ත්‍රාත් අධිකරණයට ඉදිරිපත් කිරීමට නියමිතයි.