පුත්තලම මහාධිකරණය රිමාන්ඩ් කළ නීතිඥවරිය නිදහස් කරන ලෙස නියෝග

අධිකරණයට අපහාස කිරීමේ චෝදනාව මත පුත්තලම මහාධිකරණය විසින් රක්ෂිත බන්ධනාගාර ගත කළ, නීතිඥ පී. උදයංගනී වහාම නිදහස් කරන ලෙස අභියාචනාධිකරණය නියෝග කර තිබෙනවා.

ශ්‍රී ලංකා නීතීඥ සංගමයේ සභාපති නීතීඥ රජීව අමරසූරිය මහතා විසින් ඉදිරිපත් කළ පෙත්සමක් විභාග කිරීමෙන් අනතුරුව අභියාචනාධිකරණ වැඩබලන සභාපති මොහොමඩ් ලෆාර් තාහීර් සහ ප්‍රියන්ත ප්‍රනාන්දු යන මහත්වරුන්ගෙන් සමන්විත විනිසුරු මඩුල්ලක් විසින් මෙම නියෝගය ඊයේ (31) නිකුත් කරනු ලැබුවා.

නිදහස් වීමෙන් පසුව එම නීතිඥවරියට අප්‍රේල් මස 28 වනදා අභියාචනාධිකරණය හමුවේ පෙනී සිටින ලෙස ද විනිසුරු මඩුල්ල නියෝග කර තිබෙනවා.

අධිකරණයට අපහාස වන ලෙස හැසිරුණු බව කියන නීතිඥවරියක ඇප කොන්දේසි සපුරාලන තුරු හලාවත – ආරච්චිකට්ටුව පදිංචි නීතිඥවරියක් වන පි.උදයංගනි රක්ෂිත බන්ධනාගාරගත කරන ලෙස පසුගිය 28 වැනිදා පුත්තලම මහාධිකරණ විනිසුරු නදී අපර්නා සුහන්දුරුගොඩ නියෝග කරනු ලැබුවා.

පුත්තලම අධිකරණ බල සීමාවේ පදිංචිකරුවන් දෙදෙනකු විසින් රුපියල් ලක්ෂ 25ක ශරීර ඇප අත්සන කළ යුතු බවත් එම ඇපකරුවන්ගේ ආදායම් වාර්තා සනාථ කර ගත යුතු බවත් විනිසුරුවරිය විසින් නිකුත් කර ඇති නියෝගයේ සඳහන්.

එදින සිකුරාදා දිනයක් වු බැවින් අදාළ ඇප කොන්දේසි සපුරාලීමට නොහැකි වු බැවින් ඇප මත නිදහස් වීමට නොහැකි වු එම නීතිඥවරිය රක්ෂිත බන්ධනාගාරගත කර තිබුණා.

වයඹ පළාත්බද පුත්තලම මහාධිකරණයේදී පසුගිය 07 වැනිදා ඇය යම් ඇප අයැදුමකට අදාළව කරුණු සැල කර ඇප අයැදීමේදී මහාධිකරණය හෝ අධිකරණ විනිශ්චකාරවරිය සුදුසු පරිදි ගෞරවාන්විතව ඇමතීම චේතානාන්විතව නොකර සිටීම ඇයට එල්ලවූ එක් චෝදනාවක් වනවා.

එමෙන්ම පසුගිය 28 වැනිදා මෙම අධිකරණයේ අධිකරණ බල සීමාවේ පිහිටි විවෘත අධිකරණ ශාලාවට ඇතුළු වීමේදී අධිකරණයට හිස නමා ආචාර කර ගෞරව කිරීම චේතානාන්විතව නොකර සිටීම ඇයට එල්ල වී ඇති අනෙක් චෝදනාව වන බව සඳහන්.