මවගෙන් වෙන්කර වෙඩි වැදුනු අලි පැටවකු උඩවලවට රැගෙන යයි (VIDEO)
පාදයේ ආබාධයක් සහිතව කලාවැව ජාතික වනෝද්‍යානයේ රැදී සිටි කුඩා අලි පැටවෙකු විශේෂ ප්‍රතිකාර ලබාදීම සදහා උඩවලව ඇත්අතුරු සෙවණට රැගෙන යාමට වන ජීවී නිලධාරීන් පියවර ගත්තා.
මෙම අලි පැටවා මවගෙන් වෙන්කර ගැනීම සදහා මහත් පරිශ්‍රයක් දැරීමට සිදුවූ අතර, අලි පැටවා නිර්වින්දනය කර රැගෙන යාමට හැකිවූයේ පැය 6 ක මෙහෙයුමකින් අනතුරුවයි.
කලාවැව ජාතික වනෝද්‍යානයේ පාදයේ ආබාධයකට ලක්ව සිටි අලි පැටවෙකු හදුනාගැනීමට පශු වෛද්‍ය අංශ සමත්වුනේ මීට දින කිහිපයකට ඉහතදීයී.
කලාවැව ජාතික වනෝද්‍යානය තුළ සිටියදී ප්‍රතිකාර ලබාදීම අපහසු බැවින් එම අලි පැටවා උඩවලව ඇත්අතුරු සෙවණ වෙත රැගෙන යාමට පශු වෛද්‍ය නිලධාරීන් තීරණය කළා.
ඒ අනුව පැටවා රංචුවෙන් මුදා ගැනීම සදහා විශේෂ මෙහෙයුමක් දියත් කිරිමට පශු වෛද්‍ය නිලධාරීන්ට සිදුවුණා.
පණුඩලගම පශු වෛද්‍ය ඒකකයේ වෛද්‍ය චන්දන ජයසිංහ මහතා සහ වෛද්‍ය උදේශිකා මධුවන්ති මහත්මියගේ ප්‍රධානත්වයෙන් යුතු කණ්ඩාවයමක් එම මෙහෙයුමට එක්වුණා.
කණ්ඩායමේ මූලික අපේක්ෂාව වූයේ පැටවා මවගෙන් වෙන්කර ගැනීමයි.
කෙසේ වෙතත් එහිදී එම කණ්ඩායමට අනපේක්ෂිත තත්ත්වයකට මුහුණ දීමට සිදුවුණා.
මෙහෙයුම සාර්ථක කරගැනීම වෙනුවෙන් මවත්, පැටවාත් දෙදෙනාම නිර්වින්දනය කිරීමටයි එහිදී පියවර ගත්තේ.
අනතුරුව ප්‍රතිකාර සඳහා අලි පැටවා උඩවලව ඇත් අතුරු සෙවණ වෙත රැගෙන යාමට පියවර ගත්තා.