මෙම වසරේ පොල් පැල ලක්ෂ 25ක් සිටුවීමේ ව්‍යාපෘතියක්
මෙම වසරේ පොල් පැල ලක්ෂ 25ක් සිටුවීමට සැලසුම් කර ඇති බවත්, උතුරු පොල් ත්‍රිකෝණය ආශ්‍රිතව පැල ලක්ෂ 10ක් සහ අනෙක් ප්‍රදේශ වල පොල් පැල ලක්ෂ 15ක් වගා කිරීමට සැලසුම් කර ඇතැයි පොල් වගා කිරීමේ මණ්ඩලයේ සභාපති වෛද්‍ය සුනිමල් ජයකොඩි මහතා පවසනවා
ඔහු මේ බව කියා සිටියේ පොල් මිල ඉහළ යාම, පොල් නිෂ්පාදනය අඩුවිම ඇතුළු පොල් වගාකරුවන්ට ලබා දෙන සහන සම්බන්ධව අද (10) රජයේ ප්‍රවෘත්ති දෙපාර්තමේන්තුවේදී පැවති මාධ්‍ය හමුවකට එක් වෙමින්
2024 වර්ෂයේ දී පොල් ඵලදාව අඩු වූ බවත් සාමාන්‍යෙයන් දළ වශයෙන් වර්ෂයක පොල් ඵලදාව පොල් ගෙඩි මිලියන 3000ක් වන බවත් 2024 වර්ෂයේදී එය 10% ක් ඵලදාව අඩු වූ බවත් ඔහු එහිදී කියා සිටියා
පොල් අඩු වීමට බලපාන ප්‍රධාන කරුණු ලෙස තාක්ෂණික මෙන්ම කළමණාකරණ කරුණු බලපාන බවත් තාක්ෂණික කරුණු ලෙස පොල් ගසට අවශ්‍ය අත්‍යවශ්‍ය පෝෂණය ලබා දීම, ගසට අවශ්‍ය ජලය ලබා දීම, ගස රැකබලා ගැනීම අදාළ වන බවයි ඔහු එහිදී පැවසුවේ
එමෙන්ම රටේ කාලගුණික හා දේශගුණික බලපෑම පොල් වගාව සඳහා සෘජුවම බලපාන බවත් පසුගිය වර්ෂයේ (2024) පැවති අධික උෂ්ණත්වය හා අධික වර්ෂාව පොල් අස්වැන්න අඩු වීමට බලපෑ බවද ඔහු එහිදී පැවසුවා