යුක්තිය මෙහෙයුමෙන් සැකකරුවන් 1467 දෙනෙකු අත්අඩංගුවට (VIDEO)
දිවයින පුරා සිදු කළ යුක්තිය මෙහෙයුම යටතේ සැකකරුවන් 1467 දෙනෙකු අත්අඩංගුවට ගත් බව මහජන ආරක්ෂක අමාත්‍යාංශය පවසනවා.
ඊයේ (28) අලුයම සිට අද අලුයම 3.00 දක්වා සිදුකළ මෙහෙයුම්වලදී එම සැකකරුවන් අත්අඩංගුවට ගෙන ඇති අතර ඔවුන් සතුව තිබූ හෙරොයින් 460g, අයිස් මත්ද්‍රව්‍ය 653g, ගංජා කිලෝ 03යි ග්‍රෑම් 637ක්, ගංජා පැළ 103,793 ක්, මාවා 342g සහ මත්පෙති 562 ක් පොලිස් භාරයට ගෙන ඇති බව සඳහන්.
සැකකරුවන් 56 දෙනෙකු සම්බන්ධව රැදවුම් නියෝග මත වැඩිදුර විමර්ශන සිදුකරන බවයි මහජන ආරක්ෂක අමාත්‍යාංශය සඳහන් කළේ.
එමෙන්ම මත්ද්‍රව්‍යවලට ඇබ්බැහිවූ පුද්ගලයින් 51 දෙනෙකු පුනරුත්ථාපන මධ්‍යස්ථාන වෙත යොමු කර ඇති අතර පොලිස් මත්ද්‍රව්‍ය නාශක කාර්යංශය සහ විශේෂ කාර්යංශයේ ලේඛනගත සැකකරුවන්ගේ ලැයිස්තුවේ සිටි සැකකරුවන් 164 දෙනෙකු මෙම මෙහෙයුමේදී අත්අඩංගුවට ගෙන තිබෙනවා.