අනුරාධපුරය ශ්‍රී ලංකාවේ පමණක් නොව විශ්වීය උරුමයක්
මෙරට ඓතිහාසික උරුමයක් වන අනුරාධපුර පූජා නගරය ආරක්ෂා කිරීමට යුනෙස්කෝව මැදිහත්වීම අගය කළ යුතු බවත්, අනුරාධපුරය ශ්‍රී ලංකාවේ පමණක් නොව විශ්වීය උරුමයක් බවත් අග්‍රාමාත්‍ය ආචාර්ය හරිනි අමරසූරිය මෙනවිය පවසනවා
ප්‍රංශයේ, යුනෙස්කෝ මූලස්ථානයේ අප්‍රේල් 01 වන දින ‘ශ්‍රී ලංකාවේ ලෝක උරුමයක් වූ අනුරාධපුර පූජා නගරය සුරක්ෂිත කිරීම සඳහා ඒකාබද්ධ සහ තිරසාර ප්‍රවේශයක්’ මැයෙන් පැවති ජාත්‍යන්තර විශේෂඥ සමුළුව අමතමින් අග්‍රාමාත්‍යවරිය මේ බව කියා සිටියා
යුනෙස්කෝව ශ්‍රී ලංකාව සමඟ හවුල්කාරිත්වයෙන් සංවිධාන කළ මෙම සමුළුව, සංස්කෘතික හා ඓතිහාසික වැදගත්කමක් ඇති UNESCO ලෝක උරුම අඩවියක් වන අනුරාධපුරය සංරක්ෂණය කිරීමට තිරසර උපායමාර්ග සාකච්ඡා කිරීම වෙනුවෙන් ජාත්‍යන්තර විශේෂඥයන්ගේ සහභාගීත්වයෙන් පැවැත්වුණා
එහිදී අදහස් දක්වමින් අග්‍රාමාත්‍ය ආචාර්ය හරිනි අමරසූරිය මෙනවිය වැඩිදුරටත් පැවසුවේ සංස්කෘතික ත්‍රිකෝණයේ පිහිටා ඇති අනුරාධපුර සහ පොළොන්නරුව රාජධානිවල පැවති ඉතා දියුණු ශිෂ්ටාචාරය සහ සෞන්දර්යය සංරක්ෂණය කිරීමට 1980 ගණන්වල සිට යුනෙස්කෝවේ සහාය ශ්‍රී ලංකාවට ලබා දී ඇති බවයි
එමෙන්ම ඉදිරියේදී ශ්‍රී ලංකාව, අනුරාධපුරය, යාපනය සහ මහනුවර නගර තුනක් ජාතික උරුම නගර ලෙස සංවර්ධනය කිරීමට රජය සැලසුම් කර ඇති බවද ඇය එහිදී ප්‍රකාශ කර තිබෙනවා.