කුඩු ප්‍රියංකර ගේ කෝටි 8 ක හෙරොයින් සමග 4 ක් අත්අඩංගුවට
මහා පරිමාණ මත්ද්‍රව්‍ය ජාවාරම්කරුවෙකු වන විදෙස් ගතව සිටින කුඩු ප්‍රියංකර නැමැත්තාට අයත් බවට කියන රුපියල් කෝටි 8 කට ආසන්න වටිනා හොරයින් මත්කුඩු තොගයක් සමග පුද්ගලයන් සිව් දෙනකු කොළඹ මධ්‍යම කොට්ඨාස අපරාධ විමර්ශන ඒකකය අත්අඩංගුවට ගෙන තිබෙනවා.
පොලිසිය පැවසුවේ ඒ අතර කාන්තාවන් දෙදෙනෙකු වන බවයි.
එම කාන්තාවන් දෙදෙනා අතර මහා පරිමාණ මත්ද්‍රව්‍ය ජාවාරම්කාරියක් වන කුඩු බානු නමැත්තියද වන බව පොලිසිය සදහන් කළා.
එම සැකකරුවන් සමග මත්කුඩු කිලෝ 4 ග්‍රෑම් 302 ක් පොලිස් භාරයට ගෙන තිබෙනවා.
මාලිගාවත්ත ප්‍රදීපා මාවතේ, සංඝරාජ වටරවුම අසලදී හොරයින් මත්කුඩු ග්‍රෑම් 206 ක් සමග අත්අඩංගුවට ගත් කාන්තාවකගෙන් සිදු කළ ප්‍රශ්න කිරීමේදී සැකකාරිය පදිංචි අංගොඩ – අවිස්සාවේල්ල පාරේ සිරි නිවාස පාර නිවස වටලා සිදුකළ පරික්ෂා කිරීමේදී පාර්සල් හතරක අඩංගු හොරයින් මත්කුඩු ග්‍රෑම් 3784 සොයා ගැනීමට හැකිවූ බව පොලිසිය සදහන් කළා.
පොලිසිය පැවසුවේ එම සැකකාරියගෙන් සිදුකළ ප්‍රශ්න කිරීමේදී තවත් කාන්තාවක හොරයින් මත්කුඩු ග්‍රෑම් 106 ක් සමග කොළඹ 14 ශාන්ත ජෝසප් වීදිය පදිංචි නිවසේදී අත්අඩංගුවට ගත් බවයි.
සැකකාරියගෙන් අනාවරණ වූ තවත් තොරතුරක් මත කෙසෙල් වත්ත පිර්සයිබු වීදිය පදිංචි පුද්ගලයකු කෙසෙල් වත්තේ රාජ්‍ය බැංකුවක් අසලදී හොරයින් මත්කුඩු ග්‍රෑම් 206 ක් සමග අත්අඩංගුවට ගැනීමට හැකිවූ බව පොලිසියය පැවසුවා.
මෙම ජාවාරමට ආධාර අනුබල දුන් පුද්ගලයෙකුද හොරයින් මත්කුඩු ප්‍රවාහනය කිරීමේ වරදට සහ ළඟ තබා ගැනීමේ චෝදනාව මත මාළිගාවත්ත සංඝරාජ වටරවමේදී අත්අඩංගුවට ගත් බව පොලිසිය වැඩි දුරටත් සදහන් කළා.
අත්අඩංගුවට ගත් ප්‍රධාන සැකකාරිය ඇතුළු සැකකරුවන් සිව්දෙනා මාලිගාකන්ද මහේස්ත්‍රාත් අධිකරණය වෙත ඉදිරිපත් කර රැඳවුම් නියෝග ලබා ගැනීමට නියමිතයි.