ජාත්‍යන්තර බෞද්ධ සමුළුවක් ඉන්දියාවේදී ඇරඹේ
“ආසියාව ශක්තිමත් කිරීමේදී බුද්ධ ධර්මයේ කාර්යභාරය” යන තේමාව යටතේ පළමු ආසියානු බෞද්ධ සමුළුව 2024 ආරම්භ වී තිබෙනවා.
ඉන්දියාවේ නවදිල්ලි අගනුවරදී එම සමුළුව ආරම්භ වුණා.
සමුළුව ආරම්භ කෙරුණේ ඉන්දීය ජනාධිපති ද්‍රෞපදි මුර්මුගේ ප්‍රධානත්වයෙන්.
ලොව බෞද්ධ රටවල් රැසක් නියෝජනය කරමින් බෞද්ධ භික්ෂූන් වහන්සේලා සහ රාජ්‍ය තාන්ත්‍රිකයින් රැසක් සමුළුවට සහභාගී වීම සඳහා ඉන්දියාවට පැමිණ තිබෙනවා.
සමුළුව සඳහා අනුග්‍රහය දක්වන්නේ ජාත්‍යන්තර බෞද්ධ සම්මේලනයයි.
ආසියානු බෞද්ධ සමුළුවේ වැදගත්කම අවධාරණය කරමින් ජාත්‍යන්තර බෞද්ධ සම්මේලනයේ අධ්‍යක්ෂ ජනරාල් අභිජිත් හල්ඩර් පැවසුවේ, උස්බෙකිස්ථානය, ටජිකිස්ථානය සහ කසකස්ථානය වැනි මධ්‍යම ආසියාවෙන් බොහෝ දෙනෙක් ඇතුළුව විවිධ රටවලින් නියෝජිතයන් 160 ක් පමණ ඊට සහභාගී වන බවයි.
”මෙම රටවල් විශේෂයෙන් සිත්ගන්නා සුළු වන්නේ ඒවා පැරණි සේද මාවත දිගේ පිහිටා ඇති බැවිනි, වෙළෙන්දෝ සහ භික්ෂූන් ඉන්දියාවේ සිට චීනය දක්වා ගමන් කරමින් බුදුන්ගේ ඉගැන්වීම් ප්‍රචාරය කළ ඓතිහාසික වෙළඳ මාර්ගයකි.” ඔහු එහිදී ප්‍රකාශ කර තිබෙනවා.