තුසිත හල්ලොලුව රිමාන්ඩ් කෙරේ
ජාතික ලොතරැයි මණ්ඩලයේ ක්‍රියාකාරි අධ්‍යක්ෂවරයෙකුව සිටි තුසිත හල්ලොලුව කොටුව ප්‍රධාන මහෙස්ත්‍රාත් අධිකරණය මඟින් ජුනි මස 02 වැනිදා දක්වා රක්ෂිත බන්ධනාගාරගත කර තිබෙනවා.
ඒ ජාතික ලොතරැයි මණ්ඩලයට අයත් රාජ්‍ය දේපළක් සාපරාධී සාවද්‍ය පරිහරණය කිරීම සම්බන්ධයෙන් එම අධිකරණයේ පවතින නඩුවකට අදාළවයි.
ඔහු 2017 – 2019 කාල වකවානුවේ ජාතික ලොතරැයි මණ්ඩලයේ ක්‍රියාකාරී අධ්‍යක්ෂවරයා ලෙස කටයුතු කරමින් ජාතික ලොතරැයි මණ්ඩලයට අයත් රුපියල් 4,78,000ක් වටිනා අයිෆෝන් වර්ගයේ ජංගම දුරකථනයක්, ඇපල් මැක්බුක් පරිගණකයක් සාපරාධී සාවද්‍ය පරිහරණය කළ බවට ඔහුට චෝදනා එල්ලවී තිබුණා.
අද දිනයේදී කොටුව මහේස්ත්‍රාත් ලංකා නිලුපුලී ඉදිරියේදී මෙම නඩුව කැදවූ අවස්ථාවේදී අධිකරණයේ පෙනී සිටි කොටුව පොලීසියේ නිලධාරීන්, මෙම සිද්ධියට අදාළව සාවද්‍ය පරිහරණයට ලක් කළ දේපොළ පොදු දේපළ බවත් එබැවින් පොදු දේපළ පනත යටතට වැටෙන වැරදි සම්බන්ධයෙන් එම පනත යටතේ කරුණු ඉදිරිපත් කරන බවත් සඳහන් කළේ.
එම අවස්ථාවේ මින් පෙර මහේස්ත්‍රාත් අධිකරණයට විමර්ශන නිලධාරින් ඉදිරිපත් කළ වාර්තාවල එම කරුණු සඳහන් නොකළේ ඇයිදැයි මහේස්ත්‍රාත්වරිය විසින් නිලධාරීන්ගෙන් විමසිමක් කළා.
පසුව විමර්ශන නිලධාරීන්ගෙන් දුර්වල විමර්ශනයක් නිරීක්ෂණය කළ බවත් ඒ සම්බන්ධයෙන් විමර්ෂණයක් කළ කරුණු වාර්තා කරන ලෙසත් කොළඹ නියෝජ්‍ය පොලිස්පතිවරයාට මහේස්ත්‍රාත්වරිය විසින් නියෝගයක් නිකුත් කළා.
මෙම නඩුව ලබන 02 වන දින කැඳවීමට නියමිතයි.